સરધાર પાસે અકસ્માત કરનાર કારચાલક પકડાયો : ગોંડલમાં એક સાથે 4 લોકોની અર્થી સાથે ઉઠતાં આખું ગામ હિબકે ચડ્યું
શનિવારે રાજકોટ-ભાવનગર હાઈ-વે પર સરધાર તથા ભૂપગઢ વચ્ચે અલ્ટો અને હોન્ડા સિટી કાર વચ્ચે ભયંકર ટક્કર થયા બાદ બન્ને કાર સળગી જવાથી અલ્ટોમાં બેસેલા બે મહિલા અને બે બાળકો એમ ચાર લોકોના સળગીને મૃત્યુ નિપજ્યાની ઘટનામાં આજી ડેમ પોલીસે હોન્ડા સિટી કારના ચાલકની ધરપકડ કરી હતી.
આ બનાવ અંગે જાણવા મળતી વિગતો પ્રમાણે અલ્ટો કારમાં આઠ લોકો બેસી ભંડારિયા ગામે જઈ રહ્યા હતા ત્યારે સરધાર-ભૂપગઢ વચ્ચે રોંગસાઈડમાં આવતી હોન્ડા સિટી જીજે1-એચએન-7890 સાથે તેની જોરદાર ટક્કર થઈ હતી. આ પછી બન્ને કાર થોડી જ વારમાં અગનગોળો બની જતાં ગોંડલના વિજયનગરમાં રહેતા નિરૂબેન અતુલભાઈ મકવાણા (ઉ.વ.30), તેમની પુત્રી હેત્વી (ઉ.વ.3), હેમાંક્ષી સાહિલ સરવૈયા (ઉ.વ.20) અને મિતુલ અશોકભાઈ સાકરિયા (ઉ.વ.13)ના સળગીને મૃત્યુ નિપજ્યા હતા. જ્યારે સાહિલ ભૂપતભાઈ સરવૈયા, હિરેન અતુલભાઈ મકવાણા, નીતાબેન અશોકભાઈ સાકરિયા સહિતને સિવિલ હોસ્પિટલમાં સારવાર માટે ખસેડવામાં આવ્યા હતા.
આ બનાવ બાદ આજીડેમ પોલીસ મથકે હોન્ડા સિટી કાર નંબરના આધારે તેના ચાલકની શોધખોળ શરૂ કરતાં આ કાર ભંડારિયા ગામે રહેતાં ગોપાલ વલ્લભભાઈ સભાડની હોવાનું ખુલતાં તેની ધરપકડ કરી પૂછપરછ કરતાં તેણે કહ્યું હતું કે તે સરધારમાં દુકાન ધરાવે છે જ્યાંથી તે રોંગસાઈડમાં ભંડારિયા જઈ રહ્યો હતો ત્યારે આ બનાવ બન્યો હતો. કાર સાથે ટક્કર થતાં જ બન્ને સળગવા લાગી હતી. આ વેળાએ ગોપાલની કારનો દરવાજો બંધ થઈ જતાં તે પાછલી સીટમાંથી બહાર નીકળી ગયો હતો. બહાર નીકળ્યા બાદ તેણે અન્ય બે રાહદારીઓ સાથે અલ્ટોમાં બેઠેલા લોકોને બહાર કાઢવાનો પ્રયાસ કર્યો હતો પરંતુ ત્રણ લોકોને જ બહાર કાઢી શક્યો હતો.
અલ્ટો કારમાં આઠ વ્યક્તિ મુસાફરી કરી રહી હતી
ગોંડલથી ભંડારિયા ગામે લગ્નમાં ગયેલો સાહિલ ભૂપત સાકરિયા અલ્ટો કાર ચલાવતો હતો સાથે તેની પત્ની હિમાક્ષી હતી. અલ્ટો કારમાં લગ્નમાંથી પરત ફરતી વખતે નાના બાળકો અને મોટા મળીને આઠ વ્યક્તિ સવાર હતા
3 પરિવારે સ્વજનો ગુમાવ્યા
અકસ્માતમાં ગોંડલના ચાર વ્યક્તિએ જીવ ગુમાવ્યા હતા. ત્રણ પરિવારે સ્વજનો ખોયા છે. મકવાણા પરિવારે માતા-પુત્રી તેમજ સાકરિયા પરિવારના તરૂણ તથા સરવૈયા . દંપતીમાં પત્નીએ જીવ ગુમાવ્યો છે. જ્યારે પતિની હાલત ગંભીર ગણાવાઈ રહી છે
ગોંડલમાં ચાર લોકોની અર્થી એક સાથે ઉઠતાં આખું ગામ હિબકે ચડ્યું
રાજકોટના સરધાર-ભાડલા રોડ નજીક ભૂપગઢ પાસે અલ્ટો અને હોન્ડા સિટી કાર વચ્ચે ગંભીર અકસ્માત સર્જાયો હતો. અકસ્માતમાં બંને કાર વચ્ચે ટક્કર બાદ કારમાં આગ ફાટી નીકળી હતી. આ દુર્ઘટનામાં અલ્ટો કારમાં સવાર માતા-પુત્રી સહિત ચાર લોકોના કરૂણ મોત નીપજ્યા હતા. જ્યારે ત્રણ લોકો ગંભીર રીતે ઈજાગ્રસ્ત થયા હતા. ઘટનામાં મોત થનાર અને ઈજાગ્રસ્ત ગોંડલના હતા, ત્યારે આજે રવિવારે ચાર લોકોની એક સાથે અંતિમયાત્રા નીકાળવામાં આવી હતી. મૃતક હેમાંશી સરવૈયાના બે મહિના પહેલા જ લગ્ન થયા હતા. જ્યારે મૃતક મહિલાના પતિ પણ ઈજાગ્રસ્ત હોવાથી હાલ સારવાર હેઠળ છે, ત્યારે તેમના દિયરે મૃતકોને અગ્નિદાહ આપ્યો હતો.
