આવતીકાલે રાજકોટમાં યોજાશે DGPની સૌરાષ્ટ્ર લેવલની ક્રાઈમ કોન્ફરન્સ: 9 SP, 3 રેન્જ IG રહેશે હાજર, સાયબર ક્રાઈમ, ટ્રાફિક સમસ્યા સહિતના મુદ્દે ચર્ચા
રાજકોટ પોલીસ કમિશનર કચેરી ખાતે કાલે રવિવારે રાજ્યના ઈન્ચાર્જ પોલીસવડા ડૉ. કે.એલ.એન. રાવની ઉપસ્થિતિમાં સૌરાષ્ટ્ર લેવલની ક્રાઈમ કોન્ફરન્સ યોજાવાની છે જેમાં રાજકોટ સહિત ત્રણ રેન્જના આઈજી તેમજ અલગ-અલગ જિલ્લાના પોલીસવડાઓ ખાસ ઉપસ્થિતિ રહેશે. ઈન્ચાર્જ ડીજીપી બન્યા બાદ ડૉ. રાવ પહેલીવાર રાજકોટ આવી રહ્યા હોય તૈયારીઓમાં પણ ખાસ્સી દોડધામ જોવા મળી છે.
આ કોન્ફરન્સમાં રાજકોટના પોલીસ કમિશનર, જોઈન્ટ પોલીસ કમિશનર, તમામ ડીસીપી હાજર રહેશે. આ ઉપરાંત રાજકોટ રેન્જ આઈજી અશોકકુમાર યાદવ, ભાવનગર રેન્જ આઈજી ગૌતમ પરમાર અને જૂનાગઢ રેન્જ આઈજી નિલેશ જાજડિયા ઉપરાંત રાજકોટ જિલ્લા પોલીસવડા વિજયસિંહ ગુર્જર, સુરેન્દ્રનગર જિલ્લા પોલીસવડા પ્રેમસુખ ડેલુ, જામનગર જિલ્લા પોલીસવડા ડૉ. રવિમોહન સૈની, ગીર-સોમનાથ એસપી ભગીરથસિંહ જાડેજા, મોરબી એસપી મુકેશ પટેલ, જૂનાગઢ એસપી સુબોધ ઓડેદરા, દેવભૂમિ દ્વારકામાં જયવીરસિંહ વાળા, ભાવનગર એસપી નિતેશ પાંડે, બોટાદ એસપી ધર્મેન્દ્ર શર્મા, અમરેલી એસપી સંજય ખરાત સહિતના જિલ્લા પોલીસવડાઓ ઉપરાંત હથિયારી એકમના વડા પી.કે. રોશન સહિતના અધિકારીઓ ઉપસ્થિત રહેશે.
પોલીસ અધિકારીઓની આ બેઠકમાં ગુજરાત રાજ્યમાં વધી રહેલા સાયબર ક્રાઈમ, ટ્રાફિક સમસ્યા, નશીલા પદાર્થોની હેરાફેરી અટકાવવા સહિતના મુદ્દે ફુલપ્રૂફ પ્લાનિંગ કરવામાં આવશે સાથે સાથે દરેક શહેર-જિલ્લામાં નોંધાયેલી ગુનાખોરી ઉપર પણ ચર્ચા કરવામાં આવશે.
