ગજબનો ટોપીબાજ !! 90થી વધુ નકલી વેબસાઇટ બનાવી, લોકોના કરોડો રૂપિયા સેરવી લીધા અને પછી…

છેતરપિંડીની ઘટનામાં દિવસે ને દિવસે વધારો થતો જાય છે. સાયબર ગઠિયાઓ નવી-નવી રીતે લોકો છેતરવાના કિમિયાઓ અપનાવતા હોય છે. ત્યારે ગૃહમંત્રી હર્ષ સંઘવીના આદેશ મુજબ સાયબર માફિયાઓને પકડી પાડવા માટે રેન્જ આઇજી અશોક કુમાર યાદવ અને મોરબી એસપી રાહુલ ત્રિપાઠીની આગેવાનીમાં આંતરરાજ્ય સાયબર માફિયાઓને પકડવામાં મોરબી પોલીસને મોટી સફળતા મળી છે જેમાં મોરબીમાં ટાટા ઝુડિયો કંપનીની ફ્રેન્ચાઇઝી લેવાના બહાને 28 લાખની છેતરપિંડી થયાની ફરિયાદ નોંધાઈ હતી જેની તપાસમાં પોલીસને મોટી સફળતા હાથ લાગી છે અને આંતરરાજ્ય રેકેટનો પર્દાફાશ થયો છે.

શું છે સમગ્ર મામલો ?

મોરબીમાં ટાટા ઝુડિયો કંપની ની ફ્રેન્ચાઈઝી આપવાના બહાને 28 લાખની છેતરપિંડી થયાની સાયબર ક્રાઇમ પોલીસ મથકમાં ફરિયાદ નોંધાઈ હતી જે અંગે તપાસ હાથ ધરી પોલીસે તે વેબસાઇટ અને ડોમેનને ટ્રેક કરતા અને ડોમેનનો  પીછો કરતા પોલીસે બિહાર,છાતીસગઢ જેવા રાજ્યોમાં પહોંચી હતી.

કઈ રીતે પકડાયો સાયબર ગઠિયો ??

આ બાબતે પોલીસને બાતમી મળી હતી કે કેસનો માસ્ટર માઇન્ડ આરોપી રીતુ આનંદ પરમેશ્વર  સિંઘ(મૂળ.રહે.ઝારખંડ)છતીસગઢના ભીલાઇ શહેરમાં છે.જેથી પોલીસે ત્યાં પહોંચી હતી પરંતુ મકાનમાં આરોપીની હાજરી મુદે પોલીસ અસમંજસમાં હતી ત્યારે પોલીસ સત્તત વોચ ગોઠવી હતી તે દરમિયાન પોલીસને જાણવા મળ્યું હતું કે આરોપી દરરોજ એક લોન્ડ્રી વાળાને કપડા ધોવા અને ઈસ્ત્રી કરવા માટે આપે છે તેથી પોલીસે લોન્ડ્રી વાળા બનીને આરોપીના ઘરે ગયા હતા અને જેવો આરોપીએ દરવાજો ખોલ્યો તે તુરંત આરોપીનું નામ કન્ફર્મ કરી તેને દબોચી લેવામાં આવ્યો હતો.

આરોપીએ કેટલી અને કેવા પ્રકારની વેબસાઇટ બનાવી ?

આરોપી IT એન્જિનિયર છે અને તે વેબ ડેવલપરનુ કામ કરે છે અને આ પ્રકારની તેને 90 જેટલી વેબસાઇટ બનાવી હોવાનું હાલ ધ્યાનમાં આવ્યું છે જેમાં પ્રધાનમંત્રી મુદ્રા યોજના,પ્રધાનમંત્રી લોન યોજના, જન ઔષધિ યોજના,સીએનજી પંપ મેળવવા માટેની,તેમજ કૃષિ સોલાર પંપ મેળવવા સહિતની સરકારી યોજના ને ભળતી વેબસાઇટ બનાવી હતી સાથે જ આરોપી દ્વારા વિવિધ કંપનીઓ ની પણ નકલી વેબ બનાવી હતી અને IPLની પણ નકલી વેબસાઇટ બનાવી હતી.આ તમામ વેબસાઇટને ગુગલ એડમાં મૂકવામાં આવતી હતી જેથી કોઈ વ્યક્તિ માહિતી માટે વેબસાઇટ સર્ચ કરે તો આ નકલી વેબસાઇટ સૌ પ્રથમ દેખાય અને કોઈ વ્યક્તિ આ વેબસાઇટ પર ક્લિક કરે બાદમાં તેમાં જરૂરી માહિતીઓ ભરે અને આ રીતે લોકોને ભોગ બનાવવામાં આવતા હતા.સાથે આરોપી પાસેથી હેકિંગ ની જાણકારી આપતી બુક પણ મળી આવી છે.

કઈ કઈ વસ્તુઓ આરોપીના ઘરમાંથી મળી ??

આરોપી પાસેથી બે લેપટોપ,આઠ સીમકાર્ડ ,બે મોબાઈલ ચૂંટણી કાર્ડ પાનકાર્ડ,ચાર પાસબુક કબ્જે કરવામાં આવી છે.આ સાથે જ આરોપીની પ્રાથમિક પૂછપરછમાં ગુજરાત રાજસ્થાન અને મહારાષ્ટ્રના ત્રણ ગુનાનો ભેદ ઉકેલાયો છે જે ત્રણ ગુનામાં આરોપીઓએ 1.15 કરોડનું સાયબર ફ્રોડ આચર્યું હતું.

 હાલ પોલીસે આ મામલે રિમાન્ડ મેળવવા સહિતની કાર્યવાહી હાથ ધરી છે અને પૂછપરછમાં હજુ પણ અન્ય રાજ્યોના ગુનાનો ભેદ ઉકેલાઈ શકે છે અને હજુ વધુ લોકોની સંડોવણી સામે આવી શકે છે.