રાજકોટમાં યોજાનારી વાઇબ્રન્ટ સમિટનું કાઉન્ટડાઉન શરૂ: 7 ડોમ માટે 15 કરોડનો વીમો લેવાયો,હેલિપેડ માટે બેડી યાર્ડની જગ્યા પસંદ થશે
ગ્લોબલ એમ્બેશિયન્સ સાથે રાજકોટમાં યોજાનારી વાઈબ્રન્ટ ગુજરાત રિજિયોનલ સમિટનું કાઉન્ટડાઉન શરૂ થઈ ગયું છે. મારવાડી યુનિવર્સિટીના કેમ્પસમાં યોજાનારી આ ભવ્ય સમિટની તૈયારીઓ અંતિમ તબક્કામાં પહોંચી ગઈ છે અને આગામી 24 કલાકમાં તમામ કામગીરી પૂર્ણ થવાની સંભાવના વ્યક્ત કરવામાં આવી રહી છે.
વડાપ્રધાન નરેન્દ્ર મોદી 11મી તારીખે સોમનાથથી રાજકોટ આવશે. હેલિપેડ માટે સંભવત બેડી યાર્ડની જગ્યા પસંદ કરાઈ હોવાનું સૂત્રોએ જણાવ્યું હતું. વહીવટી તંત્ર અને એસપીજી ટીમે મારવાડી યુનિવર્સિટીના કેમ્પસ અથવા બેડીમાં બનેલા નવા યાર્ડની જગ્યાનું નિરીક્ષણ કર્યું હતું. જેમાં યાર્ડમાં 2 એકરથી વધુ જમીન અને ગ્રાઉન્ડ સી.સી.રોડથી બનેલું હોય જે 4 હેલિપેડ માટે વધુ અનુકૂળ હોય અહીં હેલિકોપ્ટર ઉતરાણ કરે તેવી સંભાવના છે.
વાઈબ્રન્ટ સમિટ માટેની મોટાભાગની તૈયારીઓ પૂર્ણ થઈ ચૂકી છે. મારવાડી યુનિવર્સિટીમાં કુલ 7 વિશાળ ડોમ તૈયાર કરવામાં આવ્યા છે. આ તમામ ડોમ માટે એજન્સી દ્વારા રૂ. 15 કરોડનું વીમા કવચ લેવામાં આવ્યું હોવાનું જાણવા મળ્યું છે. સાતેય ડોમની આગળ વડાપ્રધાન નરેન્દ્ર મોદીનાં વિશાળ હોિંર્ડગ્સ લગાવવામાં આવ્યા છે, જે સમગ્ર સ્થળને વિશેષ આકર્ષણ આપી રહ્યા છે.
વડાપ્રધાન માટે ખાસ રીતે તૈયાર કરાયેલું વિશાળ લોન્જ બનાવવામાં આવ્યું છે, જ્યારે દેશ-વિદેશથી આવનારા મહેમાનો અને બિઝનેસ ડેલીગેશન માટે અલગથી વી.વી.આઈ.પી. લોન્જ તૈયાર કરવામાં આવ્યા છે.એક હજાર લોકો એક સાથે બેસી શકે તેવી ક્ષમતા ધરાવતા ડોમમાં પ્લાયવુડ સાથે મજબૂત પ્લેટફોર્મ બનાવવામાં આવ્યું છે. આ ઉપરાંત સમિટ દરમિયાન ઉદ્યોગો અને વિવિધ ક્ષેત્રોને રજૂ કરવા માટે 400 સ્ટોલ ઉભા કરવામાં આવ્યા છે. ડોમ, સ્ટોલ અને લોન્જ સહિત સમગ્ર વ્યવસ્થા માટે રૂ. 15 કરોડનો ઇન્સ્યોરન્સ લેવામાં આવ્યો છે. વાઈબ્રન્ટ ગુજરાત રિજિયોનલ સમિટને લઈ રાજકોટમાં ઉત્સાહ અને ઉત્સવનો માહોલ જોવા મળી રહ્યો છે અને આ સમિટથી ઔદ્યોગિક વિકાસને નવી દિશા મળશે તેવી અપેક્ષા વ્યક્ત કરવામાં આવી રહી છે.
