રાજકોટમાં કોરોનાની રી-એન્ટ્રી! 150 ફૂટ રોડ પર ઓમનગરમાં વિસ્તારમાં 42 વર્ષીય યુવકનો રિપોર્ટ આવ્યો પોઝિટિવ
અમદાવાદમાં કોરોનાના કેસો મળવા લાગતાં નવી ચિંતા વ્યાપી જવા પામી છે ત્યારે હવે રાજકોટમાં પણ કોરોના દેખાં દેવા લાગતાં લોકોમાં ફરી ફફડાટ ફેલાયો છે. શહેરના 150 ફૂટ રોડ પર ઓમનગર વિસ્તારમાં રહેતો 42 વર્ષીય યુવક કોરોનાગ્રસ્ત થતાં આસપાસના વિસ્તારોમાં ભય ફેલાઈ ગયો હતો. જો કે આ યુવક વિદેશ જઈને આવ્યો હોય ત્યાંથી તેને કોરોના અડ્યો હોવાનું સામે આવ્યું છે આમ છતાં આરોગ્ય શાખા દ્વારા યુવકના પરિવારજનોના ટેસ્ટ કરવામાં આવતાં તમામના રિપોર્ટ નેગેટિવ આવ્યા હતા.
આ યુવક થોડા સમય પહેલાં જ વિદેશ ગયો હતો જ્યાંથી પરત આવ્યા બાદ રાજકોટમાં તેને તાવ આવતાં ટેસ્ટ કરાયો હતો જેમાં તેને કોરોના હોવાનું નિદાન થતાં તાત્કાલિક આઈસોલેટ કરી દેવામાં આવ્યો હતો. હાલ યુવકની તબિયત સ્થિર હોવાથી તેને હોસ્પિટલાઈઝડ કરાયો નથી અને ઘરમાં જ આઈસોલેટ કરવામાં આવ્યો હોવાનું આરોગ્ય શાખાના સૂત્રોએ જણાવ્યું હતું.
બીજી બાજુ રાજકોટમાં કોરોનાની ફરી એન્ટ્રી થઈ જતાં અત્યારથી જ લોકો માસ્ક પહેરતાં થઈ ગયા છે જે અત્યંત સારી બાબત છે. અત્રે ઉલ્લેખનીય છે કે સિંગાપોર સહિતના દેશમાં કોરોનાએ ફરી ઉપાડો લીધો છે અને દરરોજ મોટી સંખ્યામાં કેસ મળી રહ્યા છે. જો કે કોરોનાનું આ ઓમિક્રોન વેરિયેન્ટ એટલું ઘાતક નહીં હોવાનું પણ નિષ્ણાત તબીબોએ કહ્યું હતું સાથે સાથે લોકોને કોરોનાથી ડરવાની જગ્યાએ સાવધાની રાખવાની સલાહ આપવામાં આવી હતી.
