રાજકોટમાં સિવિલ ડિફેન્સ વોલિન્ટિયરની થશે ભરતી : 1000 નાગરિકે એક વોલિન્ટિયર 12 પ્રકારની સેવા આપશે

ઓપરેશન સિંદૂર બાદ રાજ્યના સરહદી જિલ્લાઓમાં બ્લેક આઉટ અને એલર્ટની સ્થિતિમાં સિવિલ ડિફેન્સની નબળી કડી સામે આવતા રાજ્યના ગૃહ મંત્રાલય દ્વારા તમામ જિલ્લામાં સિવિલ ડિફેન્સ વોલિન્ટિયરની તાત્કાલિક અસરથી ભરતી કરવા આદેશ મળ્યો હોય જિલ્લા કલેકટર દ્વારા રાજકોટ જિલ્લાની વસ્તી મુજબ વોલિન્ટિયરની ભરતી માટે પ્રક્રિયા તેજ કરી સંબંધિત શાળા-કોલેજો અને એનસીસી સાથે બેઠક યોજી હોવાનું સામે આવ્યું છે. યુદ્ધની સ્થિતિમાં સિવિલ ડિફેન્સના વોલિન્ટિયર વિવિધ 12 પ્રકારની સેવાઓ આપશે અને અને તમામ વોલિન્ટિયરને જરૂરી તાલીમ પણ આપવામાં આવશે.

યુધ્ધ અને આકસ્મિક સંજોગોમાં સરકારી, અર્ધસરકારી વ્યવસ્થા તંત્ર, પોલીસ, સૈન્ય દળોથી લઈ રેડક્રોસ સહિતના સ્વૈચ્છીક સંગઠનો- એનજીઓની સહાયતામાં તાલિમબધ્ધ નાગરિક સંરક્ષળ દળ એટલે કે, સિવિલ ડિફેન્સ ફોર્સની અનિવાર્યતા રહે છે. પરંતુ, તાજેતરમાં ભારત-પાકિસ્તાન વચ્ચેના તંગ સંબંધ સમયે ગુજરાતમાં રાજ્યમાં સિવિલ ડિફેન્સ વોલિન્ટિયર ફોર્સની રચના લાંબા સમયથી થઇ જ ન હોવાનું સામે આવ્યું હતું.આ સ્થિતિ વચ્ચે રાજ્યના ગૃહવિભાગે બે દિવસ પૂર્વે તાત્કાલિક અસરથી સિવિલ ડિફેન્સ વોલિન્ટિયરની ભરતી કરવા આદેશ આપતા રાજકોટ જિલ્લા કલેકટર તંત્ર દ્વારા શાળા-કોલેજો અને એનસીસી સાથે બેઠક યોજી સિવિલ ડિફેન્સ વોલિન્ટિયરની ભરતી માટે પ્રક્રિયા શરુ કરી છે.

રાજકોટના અધિક જિલ્લા કલેકટર આલોક ગૌતમે જણાવ્યું હતું કે, ભારતનું નાગરિકત્વ ધરાવતી કોઈપણ 18 વર્ષથી વધુની ઉંમરની વ્યક્તિ સિવિલ ડિફેન્સ વોલિન્ટિયર બની શકે છે. વિવિધ સરકારી કચેરીમાંથી સર્વેએ નિવૃત થયેલા નાગરિકો, એક્સપર્ટ તેમજ ચાર ધોરણ સુધીનો અભ્યાસ કરનાર વ્યક્તિ પણ આ સેવામાં જોડાઈ શકે છે. ખાસ કરીને સિવિલ ડિફેન્સ વોલિન્ટિયર માટે શારીરિક સશક્તતા મહત્વની બાબત છે.આ ઉપરાંત આપદા મિત્રો, એનસીસી,એનએસએસ કર્મચારીઓ, એક્સ આર્મી સહિતના લોકો પણ સિવિલ ડિફેન્સ વોલિન્ટિયર તરીકે જોડાઈ શકે છે.

1000 નાગરિકે એક સિવિલ ડિફેન્સ વોલિન્ટિયર

સિવિલ ડિફેન્સ એક્ટની જોગવાઈ મુજબ દરેક શહેર જિલ્લામાં પ્રત્યેક 1000ની વસતી દીઠ એક સિવિલ ડિફેન્સ વોલિન્ટિયરની નિમણુંક કરવાની હોય છે તે જોતા રાજકોટ જિલ્લાની પ્રવર્તમાન વસતી 38 લાખથી વધુ હોય અંદાજે 4 હજાર જેટલા સિવિલ ડિફેન્સ વોલિન્ટિયરની ભરતી કરવી પડશે.

ડિઝાસ્ટર મેનેજમેન્ટ વિભાગ વોલિન્ટિયરની ભરતી કરશે

સામન્યતઃ તમામ જિલ્લામાં સિવિલ ડિફેન્સનું અલાયદું મહેકમ હોય છે પરંતુ રાજકોટ જિલ્લામા આવું અલાયદું મહેકમ ન હોવાથી હાલમાં જિલ્લા કલેકટર કચેરીના ડિઝાસ્ટર મેનેજમેન્ટ વિભાગ દ્વારા આ તમામ સિવિલ ડિફેન્સ વોલિન્ટિયરની ભરતી પ્રક્રિયા કરી તેઓને તાલીમબદ્ધ કરવામાં આવશે અને જયારે સિવિલ ડિફેન્સનું માળખું રચવામાં આવશે ત્યારે તમામ ડેટા સુપરત કરવામાં આવશે.

સિવિલ ડિફેન્સ વોલિન્ટિયર 12 પ્રકારની સેવા આપશે

રાજકોટ જિલ્લામાં સિવિલ ડિફેન્સ વોલિન્ટિયરની નિમણુંક માટે કાર્યવાહી શરૂ કરવામાં આવી છે ત્યારે યુદ્ધ સહિતની આપત્તિના સમયે આ સ્વયંસેવકોની ફૌજ મુખ્ય મથક સેવા, સંચાર સેવા, વોર્ડન સેવા, ઇજા સેવા, અગ્નિશમન સેવા, તાલીમ સેવા, બચાવ સેવા, પરિવહન સેવા, પુરવઠા સેવા, બચાવ સામાન સેવા, કલ્યાણ સેવા અને મૃતદેહ નિકાલ સેવા સહિતની 12 પ્રકારની સેવા આપશે.