- ઉપરાંત વોર્ડ નં.૧,૪,૧૨,૧૮માં ગટર, પાણીની લાઈન સહિતની સુવિધા મળશે
- ગાંધીનગરમાં બેઠા બેઠા મુખ્યમંત્રી આખા ગુજરાતમાં વિકાસકાર્યોના કરશે લોકાર્પણ-ખાતમુહૂર્ત
વોઈસ ઓફ ડે, રાજકોટ
રાજ્ય સરકાર દ્વારા તત્કાલિન મુખ્યમંત્રી અને હાલના વડાપ્રધાન નરેન્દ્ર મોદીની ૨૩ વર્ષની વિકાસ ગાથાના ભાગરૂપે આખા ગુજરાતમાં `વિકાસ સપ્તાહ’ની ઉજવણી કરવામાં આવી રહી છે જેના ભાગરૂપે આખા ગુજરાતમાં કરોડો રૂપિયાના વિકાસકાર્યાના લોકાર્પણ અને ખાતમુહૂર્ત મુખ્યમંત્રી દ્વારા કરવામાં આવશે. આ અંર્તગત રાજકોટના અલગ-અલગ આઠ વોર્ડને મુખ્યમંત્રી દ્વારા ૨૧૫ કરોડ રૂપિયાના વિકાસકાર્યોની ભેટ આપવામાં આવશે.
જે વોર્ડને સૌથી વધુ લાભ મળવાનો છે તેમાં વોર્ડ નં.૧,૪, ૯, ૧૧, ૧૨, ૧૮ સહિતનો સમાવેશ થાય છે. આ તમામ વિસ્તારોમાં ડે્રનેજ, રોડ, ડીઆઈ પાઈપલાઈન સહિતની પ્રાથમિક સુવિધાઓ મળશે જેના કારણે બે લાખ લોકોને ફાયદો થશે. વોર્ડ નં.૧માં ડ્રેનેજ લાઈનના કામ અંતર્ગત સત્ય નારાયણ મેઈન રોડ પર લાખના બંગલા તરફ અને જામનગર હાઈરૂવેને જોડતાં ડે્રનેજ સીવરેજ કામનું ખાતમુહૂર્ત કરવામાં આવશે. આ ઉપરાંત રામાપીર ચોકડી સ્માર્ટ સિટી વિસ્તારમાં પેવિંગ બ્લોક, માધાપર ચોકથી રૈયાધાર તરફ રસ્તાનું કામ તેમજ વર્ધમાનનગરને જોડતા વિસ્તારમાં ભૂગર્ભ ગટરનું કામ શરૂ કરવામાં આવશે.
જ્યારે વોર્ડ નં.૯ના મુંજકામાં નવા રોડ, ડીઆઈ પાઈપલાઈન, રામધણથી પુનિતનગરના વોંકળા તરફ રિટેઈનિંગ વોલનું કામ, વોર્ડ નં.૧૧માં નવું ફાયર સ્ટેશન, વોર્ડ નં.૧૨ના મવડીમાં ડીઆઈ પાઈપલાઈન નાખવાના કામનું ખાતમુહૂર્ત કરવામાં આવશે.
ખાસ કરીને વોર્ડ નં.૩માં કોમ્યુનિટી હોલ તેમજ ટીબી સેન્ટરનું ખાતમુહૂર્ત પણ મુખ્યમંત્રી દ્વારા ગાંધીનગરમાં બેઠા બેઠા વર્ચ્યુઅલી રીતે કરવામાં આવશે. આ ઉપરાંત કોઠારિયા મેઈન રોડ, મયુર પાર્ક, મહાદેવ રેસિડેન્સી, સુંદરમ્ પાર્ક સહિતની સોસાયટીઓને પેવિંગ બ્લોક તેમજ મેટલ રોડથી મઢી દેવામાં આવશે.
જ્યારે રૈયા સ્માર્ટ સિટીમાં ૭.૯૨ કરોડના ખર્ચે બનેલું ઈલેક્ટ્રિક બસ ચાર્જિંગ સ્ટેશનનું લોકાર્પણ કરાશે તો કુલ ૧૦૧.૮૯ કરોડના બાંધકામ વિભાગના ૨૫ કામ, ૫૨.૨૩ કરોડના ડે્રનેજ વિભાગના પાંચ કામ અને ૫૩.૨૧ કરોડના વોટર વર્કસને લગતા ૧૧ કામનું ખાતમુહૂર્ત કરવામાં આવશે.