‘વુમન્સ ડે’ ગિફ્ટની વાઇરલ લિંકથી સાવધાન !! ડી માર્ટના નામની લિંક પર ક્લિક કરતાં જ પર્સનલ ડેટાની થશે ચોરી

8 માર્ચના રોજ આંતરરાષ્ટ્રીય મહિલા દિવસ સમગ્ર વિશ્વમાં ઊજવવામાં આવે છે. આંતરરાષ્ટ્રીય મહિલા દિવસની આડમાં સાયબર અપરાધીઓએ મહિલાઓનો પર્સનલ ડેટા ચોરવા માટે ડિ-માર્ટના નામની ફેક લિંક વાઇરલ કરી છે, જેના માધ્યમથી અનેક લોકોને આ લિંક ફોર્વર્ડ કરવાનું કહી ગિફ્ટ બોક્સ ખોલવાનું કહી અલગ-અલગ ટાસ્ક આપી છેતરપિંડી આચરવામાં આવી રહી છે. પરંતુ આ છેતરપિંડીથી કેવી રીતે બચવું.

આંતરરાષ્ટ્રીય મહિલા દિવસની આડમાં સાયબર અપરાધીઓ દ્વારા જે ફેક લિંક વાઇરલ કરી છે, એ લિંકના માધ્યમથી સાયબર અપરાધીઓ તમામ મહિલાઓને જણાવી રહ્યા છે કે આંતરરાષ્ટ્રીય મહિલા દિવસની ઉજવણી નિમિત્તે ડિમાર્ટ તરફથી જે મહિલાઓ આ લિંક પર ક્લિક કરશે અને મિસ્ટ્રી બૉક્સ પર ક્લિક કરશે તો તે છ હજાર રૂપિયા જીતશે. એકવાર છ હજાર રૂપિયા જીતી લીધા બાદ તે મહિલાએ રૂપિયા મેળવવા માટે ફરજિયાત પણે ડિમાર્ટના નામની ફેક લિંકને 5 વ્હોટ્સએપ ગ્રુપ્સ પર કાં તો 20 વ્હોટ્સએપ યુઝર્સને મોકલવી પડશે. ત્યાર બાદ એક રજિસ્ટ્રેશન ફોર્મ ફરજિયાતપણે ભરવું પડશે, જેમાં પર્સનલ ડેટા, જેમ કે નામ, સરનામું, મોબાઈલ નંબર જેવી વિગતો ભરવી પડશે. ત્યાર બાદ પાંચથી સાત દિવસમાં 6000 રૂપિયા તેમને મળી શકશે.

‘ડિમાર્ટને આ લિંક સાથે કોઈ સંબંધ નથી’

ત્યાર બાદ ત્રાહિત વેબસાઈટ પર યુઝરને ડાઇવર્ટ કરીને પેસિવ ઈન્કમ માટે યુઝરને ધકેલવાનો કારસો રચવામાં આવે છે તેમજ 6000 રૂપિયા ક્લેઈમ કરવા માટે યુઝરની બેંક માહિતી પણ મેળવવામાં આવી રહી છે. આમ, આ લિંક ફેક અથવા ભ્રામક છે અને ડિમાર્ટને આ લિંક સાથે કોઈ સંબંધ નથી.

સાવચેતી રાખવાની બાબતો

(1) લાલચ આપતી આવી લિંકોથી દૂર રહેવું જોઈએ તેમજ તેને ફોર્વર્ડ કરવાથી પણ બચવું જોઈએ.
(2) ઈન્ટરનેટ પર કાર્ય કરતી વેળાએ ઝીરો ટ્રસ્ટ પોલિસીને અનુસરવું જોઈએ.
(3) પોતાનો પર્સનલ ડેટા કોઈપણ ત્રાહિત વ્યક્તિ સાથે ક્યારેય શેર કરવો જોઈએ નહીં.
(5) જો આર્થિક નુકસાન થાય તો 1930 પર કોલ કરીને ત્વરિત ફરિયાદ દાખલ કરવી જોઈએ.