બેડી, પાળ, કાંગશીયાળી, ખોખડદડનો આવશે ‘જમાનો’: જકોટ અર્બન ડેવલપમેન્ટ ઓથોરિટી દ્વારા ટાઉન પ્લાનિંગ સ્કીમનો ઈરાદો જાહેર
કોઈ પણ વિસ્તારનો વિકાસ કરવો હોય તો ત્યાં ટાઉન પ્લાનિંગ કરવું અત્યંત આવશ્યક હોય. મહાપાલિકા તેમજ રાજકોટ અર્બન ડેવલપમેન્ટ ઓથોરિટી (રૂડા) દ્વારા આ દિશામાં તજવીજ ચાલી રહી છે. જો કે મહાપાલિકાની તુલનાએ રૂડા દ્વારા ટાઉન પ્લાનિંગ સ્કીમને તૈયાર કરી ઈરાદો તથા ડ્રાફ્ટ જાહેર કરવામાં ઝડપ રાખવામાં આવી રહી હોય. ખોખડદડ, બેડી, પાળ, કાંગશિયાળી સહિતના ગામોમાં ટીપી સ્કીમનો ઈરાદો તથા ડ્રાફ્ટ જાહેર કરી દેવામાં આવ્યો છે. આ વિસ્તારોમાં ટાઉન પ્લાનિંગ સ્કીમ અમલમાં આવતાં જ તેનો જમાનો આવશે તે નિશ્ચિત બની ગયું છે.
રૂડા દ્વારા ખોખડદડ ટાઉન પ્લાનિંગ સ્કીમ નં. 53 (113.35 હેક્ટર વિસ્તાર), ખોખડદડ ટીપી સ્કીમ નં. 54 (119.38 હેક્ટર વિસ્તાર), ખોખડદડ ટીપી સ્કીમ નં. 55 (127.51 હેક્ટર વિસ્તાર) અને ખોખડદડ ટીપી સ્કીમ નં. 57 (142.91 હેક્ટર વિસ્તાર) માટેનો ડ્રાફ્ટ જાહેર કરી દેવામાં આવ્યો છે.
પાળ+કાંગશિયાળી ટાઉન પ્લાનિંગ સ્કીમ, જેમાં કુલ 195.93 હેક્ટર વિસ્તાર સમાવિષ્ટ છે, તે ઉપરાંત પાળ ટીપી સ્કીમ નં. 37 (122.37 હેક્ટર વિસ્તાર), બેડી ટીપી સ્કીમ (202.69 હેક્ટર વિસ્તાર) અને પાળ ટાઉન પ્લાનિંગ સ્કીમ નં. 34 (119.97 હેક્ટર વિસ્તાર)નો ઈરાદો જાહેર કરવામાં આવ્યો છે.
આ તમામ ટાઉન પ્લાનિંગ સ્કીમમાં કયા કયા જમીનના સર્વે નંબર સમાવિષ્ટ કરવામાં આવ્યા છે તે સહિતની વિગતો દર્શાવતા નકશા જામનગર રોડ પર આવેલી રૂડા કચેરીમાં મુકવામાં આવ્યા છે. અરજદારો રજાના દિવસો સિવાય કચેરીના કામકાજ સમયે અહીં નકશા જોઈ શકશે અને સાથે વાંધા-સૂચન પણ રજૂ કરી શકશે. વાંધા-સૂચનની મુદત પૂર્ણ થયા બાદ તંત્ર દ્વારા ટાઉન પ્લાનિંગ સ્કીમની પ્રક્રિયા આગળ વધારવામાં આવશે.
