ભારે વરસાદ માટે તૈયાર રહેજો!, ગુજરાત સહિત આ 8 રાજ્યો માટે ભયાનક આગાહી
દેશના અનેક રાજ્યોમાં દક્ષિણ પશ્ચિમ ચોમાસાની અસર જોવા મળી રહી છે. દરમિયાન, ભારતીય હવામાન વિભાગ (IMD) એ 26 ઓગસ્ટ સુધી કેટલાક રાજ્યોમાં ભારેથી અતિ ભારે વરસાદની આગાહી કરી છે. IMD અનુસાર, ઓડિશા, પશ્ચિમ બંગાળ અને સિક્કિમ, બિહાર, આસામ અને મેઘાલય, અરુણાચલ પ્રદેશમાં ભારેથી અતિ ભારે વરસાદની અપેક્ષા છે. IMDએ શુક્રવારે હિમાચલ પ્રદેશ માટે યલો એલર્ટ જાહેર કર્યું છે. હવામાન કચેરીએ એમ પણ કહ્યું કે રાજ્યના કેટલાક જિલ્લાઓમાં ભારે વરસાદની સંભાવના છે.
આખું ઓગસ્ટ ગુજરાતમાં કોરુ રહ્યું. ક્યાંક ક્યાંક છુટો છવાયો વરસાદ રહ્યો. ઓગસ્ટમાં વરસાદ હાથ તાળી આપીને જતો રહ્યો હોય તેવું લાગ્યુ. પરંતુ સપ્ટેમ્બર મહિનો કોરો નહિ જાય. સપ્ટેમ્બર મહિનાની આગાહી આવી ગઈ છે. હવામાનશાસ્ત્રી અંબાલાલની આગાહી મુજબ, ગુજરાતમાં ફરી વરસાદી માહોલ જામશે. હવામાન નિષ્ણાત અંબાલાલ પટેલે આગાહી કરતા જણાવ્યું કે, 27 થી 31 દરમિયાન દરિયાઈ વિસ્તારમાં વરસાદની શક્યતા છે. રાજ્યમાં 28 ઓગસ્ટથી તાપમાન વધશે. 31 ઓગસ્ટ બાદ બંગાળ ઉપસારમાં લો પ્રેશર બનતા ભારે ગતિવિધિ દેખાશે. અરબી સમુદ્રમાં 14 સપ્ટેમ્બરની આસપાસ લો પ્રેશરના કારણે સિસ્ટમ બનશે, જેને કારણે સપ્ટેમ્બરના પહેલા અને બીજા અઠવાડિયામાં વરસાદી ઝાપટા પડશે.
દિલ્હીમાં છેલ્લા કેટલાક દિવસોના વરસાદ બાદ ફરીથી તડકો પડવાની આશંકા છે. આવી સ્થિતિમાં લોકોને ભેજવાળી ગરમીનો સામનો કરવો પડશે. હવામાન વિભાગનું કહેવું છે કે આગામી પાંચ દિવસમાં દિલ્હીમાં વાદળછાયું વાતાવરણ રહેવાની સંભાવના છે. હવામાન વિભાગે સ્પષ્ટ કહ્યું છે કે આગામી દિવસોમાં વરસાદની કોઈ આગાહી નથી.
