અમિત શાહ આજે રાજકોટમાં : રેસકોર્સમાં સહકાર સરિતા સંમેલન હજારોની મેદની ઉમટશે,ગૃહમંત્રીના આગમન પહેલાં પોલીસનું સઘન કોમ્બીંગ
આજે રાજકોટમાં સહકાર સરિતા સંમેલનનું આયોજન રેસકોર્સ ગ્રાઉન્ડમાં કરવામાં આવ્યું હોય તેમાં કેન્દ્રીય ગૃહ અને સહકાર મંત્રી અમિતભાઈ શાહ ઉપરાંત અન્ય કેન્દ્રીય મંત્રીઓ તેમજ રાજ્ય સરકારના મંત્રીઓ મોટી સંખ્યામાં ઉપસ્થિત રહેશે. બપોરે 1ઃ30 વાગ્યાથી શરૂ થનારા આ સંમેલનમાં હજારોની સંખ્યામાં મેદની ઉમટી પડવાનો અંદાજ છે ત્યારે પોલીસ માટે આ કાર્યક્રમ સાંગોપાંગ પૂર્ણ થાય તેનો પડકાર પણ રહેશે. બીજી બાજુ અમિતભાઈ શાહ ઘણા લાંબા સમય બાદ રાજકોટ આવી રહ્યા હોય તેમને આવકારવા માટે શહેર ભાજપ દ્વારા પણ તડામાર તૈયારી કરવામાં આવી હતી.
અમિતભાઈ શાહ અહીં રાજકોટ જિલ્લા બેન્ક ખાતે સ્વ.વિઠ્ઠલભાઈ રાદડિયાનું પ્રતિમાનું પણ અનાવરણ કરશે. તેમના આગમનને લઈને પોલીસ ઉપરાંત સુરક્ષા એજન્સીઓ એલર્ટ મોડ પર મુકાઈ ગઈ હતી. પોલીસ દ્વારા બે દિવસ અગાઉથી જ નાઈટ કોમ્બીંગ શરૂ કરવામાં આવ્યું હતું સાથે સાથે રવિવારે ઠેર-ઠેર પોઈન્ટ ઉપર પોલીસ દ્વારા વાહન સહિતનું ચેકિંગ પણ કરાયું હતું. જ્યારે રવિવારે બપોરે જ રિહર્સલ પણ કરવામાં આવ્યું હતું. મહાપાલિકા દ્વારા રેસકોર્સ આસપાસના વિસ્તાર તેમજ પોલીસ કમિશનર કચેરી આસપાસના વિસ્તારમાં આવેલી ફૂટપાથને રંગરોગાન કરવા ઉપરાંત નડતરરૂપ વૃક્ષોને કાપવામાં આવ્યા હતા તો રસ્તાને પણ ચોખ્ખા-ચણાંક કરી દેવાયા હતા.
ડિવિડન્ડમાં વધારા સહિતની કોઈ મોટી જાહેરાત થઈ શકે
આ કાર્યક્રમમાં સહકારી મંડળી, દૂધ ઉત્પાદક મંડળી, ક્રેડિટ મંડળી, મત્સ્ય મંડળી, સખી મંડળ સહિતની મંડળીઓના હોદ્દેદારો ખાસ ઉપસ્થિત રહેશે. આજે કેન્દ્રીય ગૃહ અને સહકાર મંત્રી અમિતભાઈ દ્વારા ડિવિડન્ડ વધારા સહિતની કોઈ મોટી જાહેરાત પણ કરવામાં આવે તેવી શક્યતા છે કેમ કે સાત સહકારી સંસ્થાઓની સામાન્ય સભા દર વર્ષે જામકંડોરણા ખાતે મળતી હોય છે પરંતુ આ વર્ષે પ્રથમ વખત રાજકોટમાં મળતી હોય લોકો કોઈ મોટી જાહેરાત થશે તેવી અપેક્ષા પણ રાખી રહ્યા હોવાનું જાણવા મળ્યું હતું.
