શ્રી હરિકોટા બાદ ISRO ગુજરાતના આ જિલ્લામાં બનાવશે દેશનું બીજા નંબરનું સૌથી મોટું અવકાશમથક, 31 ઉપગ્રહોનું કરશે લોન્ચિંગ
આવનારા સમયમાં ગુજરાત-સૌરાષ્ટ્રને એક બહુ મોટો પ્રોજેક્ટ મળવા જઈ રહ્યો છે. ભારતીય અવકાશ સંશોધન સંગઠન એટલે કે ઈસરોનાં સ્પેસ એપ્લીકેશન સેન્ટરના ડીરેક્ટર નીલેશ દેસાઈએ આપેલી માહિતી અનુસાર, ઈસરો સૌરાષ્ટ્રમાં વેરાવળ અને દીવની વચ્ચેના દરિયાકાંઠે દેશનું બીજું સૌથી મોટુ સ્પેસ સ્ટેશન સ્થાપવા જઈ રહ્યુ છે. અંદાજે ૧૦,૦૦૦ કરોડના આ પ્રોજેક્ટ ઉપર બહુ ઝડપથી કામ ચાલી રહ્યુ છે અને આ સ્પેસ સ્ટેશન ઉપરથી રોકેટ અને ઉપગ્રહનું પ્રક્ષેપણ થશે. હાલમાં ઈસરો શ્રીહરિકોટા ખાતેથી રોકેટનું લોન્ચિંગ કરે છે અને તે દેશનું એક માત્ર લોન્ચિંગ પેડ છે.
આ સ્પેસ સ્ટેશન દીવ અને વેરાવળ વચ્ચે સ્થિત હશે, અને SALV અને PSLV રોકેટના પ્રક્ષેપણને ટેકો આપશે.દીવ અને વેરાવળ વચ્ચે સુત્રાપાડા, ધામળેજ, મૂળ દ્વારકા, માઢવાડ બંદર અને છારા બીચ જેવા સ્થળ આવેલા છે અને તેમાંથી કોઈ એકની પસંદગી થશે. ગુજરાત અવકાશ મથક કેન્દ્ર-રાજ્ય સહયોગી પહેલ હેઠળ PPP મોડેલ પર વિકસાવવામાં આવશે.
તેમણે કહ્યું હતું કે ગુજરાતની વિષુવવૃત્તની નિકટતા અવકાશ પ્રક્ષેપણ માટે વ્યૂહાત્મક ફાયદા પ્રદાન કરે છે. તેમણે એ પણ જણાવ્યું હતું કે, ઈસરો હવે સંદેશાવ્યવહાર, નેવિગેશન અને રિમોટ સેન્સિંગ ટેકનોલોજીને પ્રાથમિકતા આપી રહ્યું છે, જે તેના વર્તમાન ધ્યાનનો 70% હિસ્સો ધરાવે છે.
ગુજરાત સરકારે કેન્દ્રના વિઝન સાથે સંરેખિત એક સમર્પિત અવકાશ મિશન નીતિ રજૂ કરી છે, જેનો હેતુ ભારતના અવકાશ ક્ષેત્રમાં રાજ્યની ભૂમિકાને વેગ આપવાનો છે. ભારત એપ્રિલ 2026 સુધીમાં સર્વેલન્સ નક્ષત્ર માટે 52 ઉપગ્રહોમાંથી પ્રથમ લોન્ચ કરશે.
અહેવાલો અનુસાર, ISRO આમાંથી 31 ઉપગ્રહોનું નિર્માણ અને લોન્ચિંગ કરશે, જ્યારે બાકીનાનું ઉત્પાદન સરકારના નિર્દેશન હેઠળ ત્રણ ખાનગી કંપનીઓ દ્વારા કરવામાં આવશે, જેમાં સમગ્ર નેટવર્ક 2029 સુધીમાં શરૂ કરવાનું લક્ષ્ય રાખવામાં આવ્યું છે.
