28 વર્ષ લડ્યા બાદ રાજકોટની નિર્મલા સ્કૂલને મળ્યું પ્લેગ્રાઉન્ડ! હાઈકોર્ટે લાલ આંખ કરતાં જ કમિશનરે તાત્કાલિક દરખાસ્ત રવાના કરી
રાજકોટની પ્રતિષ્ઠિત નિર્મલા સ્કૂલે 28 સુધી મહાપાલિકા સામે કોર્ટમાં લડત ચલાવ્યા બાદ આખરે તેને પ્લે ગ્રાઉન્ડ મળ્યું હતું. બીજીબાજુ હાઈકોર્ટ દ્વારા નિર્મલા કોન્વેન્ટ સ્કૂલને પ્લે ગ્રાઉન્ડ સોંપવાનો હુકમ કર્યો હોવા છતાં જનરલ બોર્ડ દ્વારા મંજૂરી આપવામાં ન આવતાં લાલ આંખ કરતાં જ મ્યુ.કમિશનરે તાત્કાલિક દરખાસ્ત તૈયાર કરી રવાના કરી દેતાં મંગળવારે જનરલ બોર્ડની કાર્યવાહીમાં દરખાસ્તને મંજૂરી મળતાં જ હવે સ્કૂલની પાછળ જ આવેલુ ગ્રાઉન્ડ નિર્મલા સ્કૂલને મળી ગયું છે જેનો ઉપયોગ પ્લે ગ્રાઉન્ડ માટે કરી શકાશે.
મહાપાલિકાની ટાઉન પ્લાનિંગ સ્કીમ નં.1 (રાજકોટ) 1984 માં મંજૂર થઈ હતી. આ પછી કપાત સહિતની કાર્યવાહી કરવામાં આવતાં રેવન્યુ સર્વે નં.457 પૈકી મુળખંડ નં.29 ને આખરી ખંડ (પ્લોટ)માં કપાત આવી હતી. આ કપાતના બદલામાં સ્કૂલ દ્વારા ટાઉન પ્લાનિંગ સ્કીમનો પ્લોટ નં.423 પ્લે ગ્રાઉન્ડના હેતુ માટે માંગ્યો હતો. આ દરખાસ્ત ચાલુ વર્ષે 29 જાન્યુઆરીએ જ સ્ટેન્ડિંગ કમિટીએ મંજૂર કરી હતી પરંતુ જનરલ બોર્ડની મંજૂરી અર્થે દરખાસ્ત કરવામાં આવી ન્હોતી. જોકે તે પહેલાં કપાતના બદલામાં પ્લોટની ફાળવણી કરવા મુદ્દે સ્કૂલને મહાપાલિકા સાથે વિવાદ થતાં 1998 થી આ મુદ્દો હાઈકોર્ટ સુધી પહોંચ્યો હતો. હાઈકોર્ટ દ્વારા સ્કૂલની તરફેણમાં ચુકાદો આપી દેવાયો હતો જેથી મહાપાલિકા સુપ્રીમ કોર્ટમાં પહોંચી હતી જ્યાં હાઈકોર્ટના ચુકાદાનો અમલ કરવાનો હુકમ કરવામાં આવ્યો હતો.
એકંદરે સુપ્રીમ તરફથી પણ ઝટકો લાગતાં આખરે ચાલુ વર્ષે જ મ્યુ.કમિશનર દ્વારા સ્કૂલને 4197 ચોરસમીટરનો પ્લોટ પ્લે ગ્રાઉન્ડ હેતુ માટે ફાળવવાની દરખાસ્ત સ્ટેન્ડિંગ કમિટીને કરાઈ હતી જેને મંજૂરી પણ આપી દેવામાં આવી હતી પરંતુ મંગળવારે સ્પેશિયલ બોર્ડ મળે તે પહેલાં દરખાસ્ત બોર્ડને મોકલવામાં આવી ન હોય હાઈકોર્ટ દ્વારા મ્યુ.કમિશનરને ઠપકો પણ આપવામાં આવ્યો હતો જે બાદ તાત્કાલિક અરજન્ટ બિઝનેસ દરખાસ્ત તૈયાર કરી બોર્ડમાં મોકલી દેવામાં આવતાં તેને મંજૂરી આપી દેવામાં આવી હતી.
