કરારા જવાબ…વધુ એક ગેંગ સામે ગુજસીટોક: રાજકોટ શહેર ક્રાઇમ બ્રાન્ચે 89 ગુના આચરનાર ઇભલા ગેંગના ગળામાં નાખ્યો મજબૂત ગાળિયો
રાજકોટ શહેરમાં ઉત્પાત મચાવતી અસામાજિક ઈસમો, ગાંઠિયા દાદાઓની ગેંગોના સફાયા-સુધશરણા અભિયાનરૂપ ગુજસીટોકના શસ્ત્ર હેઠળ થતી કાર્યવાહીમાં શહેર ક્રાઈમ બ્રાન્ચે શહેરમાં વર્ષોથી ઉત્પાત મચાવતી કૂખ્યાત ઈભલા ગેંગના ગળામાં ગુજસીટોકનો ગાળિયો નાખ્યો છે સાથે સાથે ચોક્કસ દિશામાં કરારા જવાબ પણ અપાયો છે કે શહેરમાં કાયદો વ્યવસ્થા જાળવવા પોલીસ કોઈ શેહશરમ નહીં રાખે, આકરાં ડોઝ તો આપતી જ રહેશે. ઈભલા ગેંગ ઉપરાંત વધુ ત્રણ ગેંગ પણ ગુજસીટોકના રડારમાં છે.
રાજકોટ શહેરના જૂના મોરબી રોડ શાળા નં.77 નજીક ખાટકીવાસમાં રહેતા ઈબ્રાહીમ ઉર્ફે ઈભલો કરીમભાઈ કાથરોટિયા દ્વારા ગેંગ બનાવીને આર્થિક લાભ મેળવવા કે ઉત્પાત મચાવવા માટે સંગઠિત ગુનાખોરી આચરવામાં આવતી હતી. ઈભલો પકડાય, જેલમાં જાય, છૂટે અને ફરી સાગરીતો સાથે મળીને ગુના આચરતો રહેતો. પાસામાં પુરાવા છતાં કડકાઈ જાણે બેઅસર જેવી રહેતી હોય તેમ ગુનાની હારમાળા કરતો રહેતો હતો. શહેરમાં ગુનેગારોની કમર તોડી નાખવા માટે ક્રાઈમ બ્રાન્ચે પેંડા ગેંગથી અજમાવેલા ગુજસીટોકના શસ્ત્રનો રામબાણ ઈલાજનો આરંભ કર્યો છે.
કૂખ્યાત ઈભલાને પણ કાયદાનો પાઠ ભણાવવા માટે ડીસીપી ક્રાઈમ જગદીશ બાંગરવા, એસીપી ક્રાઈમ બી.બી. બસીયા, પીઆઈ એમ.આર. ગોંડલિયા, એમ.એલ. ડામોર, સી.એચ. જાદવ, પીએસઆઈ સી.બી. જાડેજા તથા ક્રાઈમ બ્રાન્ચ ટીમે ઈભલા અને તેની ગેંગના ગુનાખોરીના ઈતિહાસના ચિઠ્ઠા એકત્રિત કર્યા હતા. ઈભલો તેના ભાઈઓ તેમજ સાગ્રીતો સાથે મળી ગુનાઓ આચરતો, ઈભલો તેના ત્રણ ભાઈઓ સહિત સાત શખસોની ગેંગે 89 ગુનાઓ આચર્યા હોવાના પુરાવાઓ સાથે ગુજસીટોક હેઠળ કાર્યવાહી કરવામાં આવી છે.
બી-ડિવિઝન પોલીસ મથકમાં ગુજસીટોક હેઠળ ગુનો નોંધાવી ઈભલાના ત્રણ ભાઈઓ સલીમ ઉર્ફે સલીયો કરીમભાઈ કાથરોટિયા, મહેબુબ ઉર્ફે મેબલો અને અશરફ (રહે.બધા મોરબી રોડ સ્કૂલ નં.77 સામે, ખાટકીવાસ) તેમજ ગેંગના સાગરીત જૂના રેલનગરમાં ભગીની ટાઉનશિપની બાજુમાં બ્લોક નં.1/Tમાં રહેતા લખન વિક્રમભાઈ કમેજડિયાની ધરપકડ કરવામાં આવી છે. જ્યારે ઈભલો અને તેનો અન્ય એક ભાઈ જાવિદ ઉર્ફે જાવલો કરીમભાઈ કાથરોટિયા (રહે.છત્રપતિ શિવાજીનગર ટાઉનશિપ બ્લોક નં.102, રેલનગર) બન્ને બૈકી ઈભલો રાજકોટ જેલમાં તેમજ જાવિદ મોરબી જેલમાં હોવાથી બન્નેના આ ગુનામાં કબજો મેળવીને ધરપકડ કરવામાં આવશે.
ગેંગ દ્વારા હત્યાના પ્રયાસ, લૂંટ, અપહરણ, છેડતી જેવા નોંધાયેલા જ માત્ર 89 ગુનાઓ
રાજકોટ શહેરમાં ઈભલા ગેંગથી કૂખ્યાત ઈસમો દ્વારા હત્યાના પ્રયાસના 4, લૂંટ બળજબરી, અપહરણના 5, ગેરકાયદે મંડળી રચીને ધમાલ મચાવવીના 11 ગુના, છેડતીનો 1 તેમજ 29 ગુનાઓ મારામારીના તો જ્ઞાતિપ્રત્યે હડધૂત કરવાના એટ્રોસિટી એક્ટ હેઠળ 5 ગુનાઓ નોંધાયેલા છે. જ્યારે ફરજમાં રૂકાવટ કરવા અને દારૂ, જુગાર, આર્મ્સ એક્ટ (ગેરકાયદે ) રિવોલ્વર કે આવા હથિયારના મળી 34 ગુનાઓ સાથે અત્યાર સુધીમાં 89 ગુનાઓ નોંધાયેલા છે. જો નહીં નોંધાયેલા કે અરજીઓ પર કાર્યવાહી થઈ હોય કે અટકાયતી પગલાંઓ લઈને પુરૂ કરાયું હોય એવા બનાવો પણ અઢળક હશે તેવું જાણકારોનું માનવું છે.
ઇભલો અને તેના ચાર ભાઇઓની મિલકતો ટાંચમાં લેવાની થશે કાર્યવાહી
મોરબી રોડના કૂખ્યાત ઈસમ ઈભલાએ તેના અન્ય ચાર ભાઈઓ સલીમ ઉર્ફે સલીયો, મહેબુબ ઉર્ફે મેબલો, અશરફ તથા જાવેદ ઉર્ફે જાવલોએ મળીને ગુનાખોરીનું સામ્રાજ્ય કે વિસ્તારમાં ભય ફેલાવી દીધો હતો. ગુજસીટોક હેઠળ ગુનો નોંધાતા હવે પાંચેય ભાઈઓએ ગુનાઓ આચરીને ગેરકાયદે મિલકતો વસાવી હશે તો તેની મિલકતો અંગે પોલીસ દ્વારા જરૂરી પુરાવાઓ એકત્રિત કરાશે અને આવી મિલકતો ટાંચમાં લેવા માટેની કાર્યવાહી થશે. ગુજસીટોક હેઠળના ગુનામાં એસીપી બી.જે. ચૌધરીએ તપાસ હાથ ધરી છે.
ગુનેગારોને સાફ કરવાની ઝૂંબેશ કડક વર્તન સાથે આક્રમક રીતે ચલાવાશે: DCP બાંગરવા
રાજકોટ શહેરમાં ક્રાઈમ બ્રાન્ચ દ્વારા ગુનેગારો સામે ચલાવાઈ રહેલી કડકાઈભરી કાર્યવાહી સંદર્ભે વધુ એક ઈભલા ગેંગ સામે ગુજસીટોક થતાં ડીસીપી ક્રાઈમ જગદીશ બાંગરવાએ મીડિયા સમક્ષ જણાવ્યું હતું કે, ગુનેગારોને દરેક રીતે તોડી પાડવા સી.પી. બ્રજેશકુમાર ઝા, એડી. સી.પી. ચૈતન્ય માંડલિકના માર્ગદર્શન હેઠળ રાજકોટ શહેરમાં વારંવાર ગુના આચરનાર, ભયનો માહોલ ફેલાવનારાઓ સામે ગુનેગારોને સાફ કરવાની આ ઝૂંબેશ આવનારા સમયમાં આક્રમક રીતે ચલાવવામાં આવશે. નિર્દોષ જનતા સાથે જે રીતે આ ગુનેગારો વર્તન કરતા હોય છે આવું કડક વર્તન અમે ગુનેગારો સાથે કરવા કટિબધ્ધ છીએ. તેમણે હજુ ત્રણ ગેંગ વિરૂધ્ધ કાર્યવાહીનો ઈશારો કર્યો છે. હવે આવા અન્ય ગુનેગારોમાં પણ ફફડાટ હશે કે ત્રણ ગેંગમાં કોણ ? આપણો નંબર નહીં હોય ને ?
