રાજકોટમાં દોઢ વર્ષથી લોકોના સ્વાસ્થ્ય સાથે ચેડાં કરતો બોગસ ડૉક્ટર પકડાયો : ઈન્જેક્શન, ટેબ્લેટ, સીરપ સહિતની દવાનો જથ્થો જપ્ત

રાજકોટમાં છેલ્લા દોઢ વર્ષથી લોકોના સ્વાસ્થ્ય સાથે ગંભીર ચેડાં કરનારા બોગસ ડૉક્ટરને આજીડેમ પોલીસ મથકે પકડી પાડી ઈન્જેક્શન, ટેબ્લેટ, સીરપ સહિતની દવાનો જથ્થો કબજે કર્યો હતો.

પોલીસે શીતળાધાર 25 વારિયાના ખૂણે વૃંદાવન પાર્કની સામે આવેલા કનૈયા મોબાઈલની બાજુમાં જ રાધે ક્લિનિકમાં દરોડો પાડી ચેકિંગ કરતાં ત્યાં કોઈ પણ પ્રકારની મેડિકલ ડિગ્રી વગર જ લોકોને દવા આપતો મીત રંગાણી નામનો યુવક પકડાયો હતો. 10 બાય 10ના આ ક્લિનિકમાં દર્દીઓને દાખલ કરવા માટેની વ્યવસ્થા પણ કરવામાં આવી હતી.

આ પણ વાંચો : વિસાવદર પેટાચૂંટણીનું પરિણામ જાહેર : જનતાએ પસંદગીનો કળશ આપ પર ઢોળ્યો, ગોપાલ ઇટલીયાની જંગી મતથી જીત

મિત રંગાણીને સકંજામાં લઈ પૂછપરછ કરવામાં આવતાં તેણે કહ્યું હતું કે તેની સાળી ડૉક્ટર છે અને આ ક્લિનિક તેનું જ છે પરંતુ તે ક્યારેક-ક્યારેક જ અહીં આવતી હોય તેની ગેરહાજરીમાં પોતે ડૉક્ટર બનીને દર્દીઓની સારવાર કરી રહ્યો હતો. આ ક્લિનિક દોઢ વર્ષથી ચાલી રહ્યાનું તેણે જણાવ્યું હતું. મિત દર્દીને દવા આપવાના બદલામાં 50 રૂપિયા ફી વસૂલતો હતો. આ ઉપરાંત દર્દીઓને ઈન્જેક્શન આપવું, દાખલ કરીને સારવાર કરવી, બ્લડ પ્રેશર માપવા સહિતની સારવાર પણ પોતે જ કરી નાખતો હતો.

મિતે બેચલર ઓફ એન્જિનિયરિંગ સુધીનો અભ્યાસ કર્યો હોવાનું તપાસમાં સામે આવ્યું હતું. પોલીસે સ્થળ પરથી સ્ટેટોસ્કોપ, બ્લડ પ્રેશર મોનિટર, ઈન્જેક્શન, બેબી કફ સીરપ, અલગ-અલગ પ્રકારની ટેબ્લેટ સહિત કુલ 18826 રૂપિયાની દવા તેમજ મેડિકલ સાધનો કબજે કરી મિત રંગાણીની ધરપકડ કરી હતી.