ભાજપના 60 કોર્પોરેટરોની એક જ વાત, RMCના આરોગ્ય અધિકારીને ઘરભેગા કરો
રાજકોટ મહાપાલિકામાં છેલ્લા ઘણા સમયથી આરોગ્ય અધિકારી ડૉ.જયેશ વંકાણી અને ભાજપના કોર્પોરેટરો વચ્ચે ગજગ્રાહ ચાલી રહ્યો હોય થોડા દિવસ પહેલાં જનરલ બોર્ડ અને ત્યારબાદ સ્ટેન્ડિંગ કમિટીની સંકલન બેઠકમાં સપાટી પર આવી ગયો હતો. આ પછી ડૉ.વંકાણીની સત્તા જેમાં ખાસ કરીને આર્થિક બાબતોની સત્તા પર કાપ મુકી દેવાયા બાદ શુક્રવારે મળેલી સ્ટેન્ડિંગ સંકલન બેઠકમાં ફરી ૬૦થી વધુ કોર્પોરેટરો ડૉ.વંકાણીને ઘરભેગા કરવા માટેની ફરી મેયર સમક્ષ માંગણી કરતા હવે તેમની વિદાયનું કાઉન્ટ ડાઉન શરૂ થઈ જવા પામ્યું હોવાનું જાણકારોએ જણાવ્યું હતું.
આ અંગે જાણવા મળેલી વિગતો પ્રમાણે સંકલન બેઠકમાં કોર્પોરેટરોએ મેયરને કહ્યું હતું કે આરોગ્ય અધિકારીની સત્તા પર કાપ મુક્યે કશું થવાનું નથી. તેમને ડિસમિસ કરવા જરૂરી બની જાય છે કેમ કે તેમના વિરુદ્ધ ભ્રષ્ટાચાર સહિતના અનેક પૂરાવા ઉપલબ્ધ છે. આ પ્રકારની વાતચીત થયા બાદ મેયર દ્વારા હવે મ્યુનિસિપલ કમિશનરને આ અંગે પત્ર લખવામાં આવશે.
આ પછી મામલો સિલેક્શન કમિટી સમક્ષ પહોંચશે કેમ કે ડૉ.વંકાણીની પસંદગી સિલેક્શન કમિટી મારફતે જ થવા પામી હોય તેમને ડિસમિસ કરવા માટે પણ કમિટી જ મામલો હાથ પર લેશે. આ કમિટીમાં મેયર, ડેપ્યુટી મેયર, સ્ટેન્ડિંગ કમિટી ચેરમેન, શાસક પક્ષના નેતા અને વિપક્ષ નેતા સામેલ હોય છે. જો કે હાલ મહાપાલિકામાં વિપક્ષના નેતા ન હોવાથી કમિટીમાં ચાર લોકો જ સમાવિષ્ટ છે. કમિટી દ્વારા ડૉ.વંકાણીને ડિસમીસ કરવા માટેની દરખાસ્ત મ્યુ.કમિશનરને રવાના કરાયા બાદ તેમની વિદાયનું કાઉન્ટડાઉન શરૂ થઈ જશે તેવું જાણકારોએ જણાવ્યું હતું.
