બોર્ડ પરીક્ષાઓ નજીક આવતા શિક્ષણ તંત્ર એક્શન મોડમાં આવી ગયું છે. તાજેતરમાં ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા પરીક્ષા સંચાલન માટે એક્શન પ્લાન જાહેર કરવામાં આવ્યો હતો, ત્યારબાદ રાજકોટ જિલ્લા શિક્ષણ અધિકારીએ પણ જિલ્લા સ્તરે વિગતવાર આયોજન રજૂ કર્યું છે.
આ આયોજનના ભાગરૂપે ધોરણ ૧૦ના પ્રશ્નપત્રો રાજકોટ ખાતે સુરક્ષિત સ્ટ્રોંગ રૂમમાં સીલ કરી દેવામાં આવ્યા છે. શહેરની ચૌધરી હાઇસ્કુલ ખાતે ખાસ સ્ટ્રોંગ રૂમ તૈયાર કરવામાં આવ્યો છે. શુક્રવારે બોર્ડના અધિકારીઓએ પોલીસના ચુસ્ત બંદોબસ્ત વચ્ચે રાજકોટ સહિત સૌરાષ્ટ્ર-કચ્છના વિવિધ જિલ્લાઓમાંથી લાવવામાં આવેલા પ્રશ્નપત્રોને સઘન સુરક્ષા વ્યવસ્થામાં સીલ કર્યા હતા. સમગ્ર પ્રક્રિયા દરમિયાન અધિકારીઓની દેખરેખ અને સીસીટીવી મોનીટરીંગ હેઠળ કામગીરી હાથ ધરાઈ હતી.
શિક્ષણ તંત્રના સૂત્રો મુજબ આગામી ૨૨ અને ૨૩ તારીખે પ્રશ્નપત્રોને તબક્કાવાર રીતે અલગ અલગ જિલ્લાઓમાં મોકલવામાં આવશે. આ કામગીરી દરમિયાન પણ કડક સુરક્ષા જાળવવામાં આવશે અને જિલ્લા કક્ષાએ પહોંચ્યા બાદ પ્રશ્નપત્રોને નિર્ધારિત કેન્દ્રોમાં પહોંચાડવાની પ્રક્રિયા હાથ ધરાશે. બોર્ડ પરીક્ષાઓ નિષ્પક્ષ અને સુચારૂ રીતે યોજાય તે માટે તંત્ર દ્વારા તમામ જરૂરી વ્યવસ્થાઓ પૂર્ણ કરી દેવાઈ હોવાનું જણાવાયું છે.
સૌરાષ્ટ્ર-કચ્છના પ્રશ્નપત્ર બોર્ડના અધિકારીઓ દ્વારા સજ્જડ સુરક્ષા સાથે રાજકોટ લવાયાં:૨૨ અને ૨૩ ફેબ્રુઆરીએ પોલીસ બંદોબસ્ત સાથે અલગ અલગ જિલ્લામાં પહોંચાડાશે
