ધો.૧૦-૧૨ બોર્ડની પરીક્ષાનું કાઉન્ટડાઉન શરૂ: સાયન્સની પ્રેક્ટીકલ પરીક્ષાનો પ્રારંભ
ટૂંક સમયમાં બોર્ડની પરીક્ષાનો એક્શન પ્લાન જાહેર થશે, રાજકોટ જિલ્લામાંથી કુલ ૭૮,૩૯૦ પરીક્ષાર્થીઓ નોંધાયા
પ્રાયોગિકનાં માર્કસ સ્ફુલો દ્વારા ઓનલાઈન અપલોડ કરાશે
બોર્ડની પરીક્ષાનો માહોલ ધોરણ ૧૨ વિજ્ઞાન પ્રવાહની પ્રેક્ટીકલ પરીક્ષા સાથે થયો છે. ગઈકાલથી શરૂ થયેલી પ્રેક્ટીકલ પરીક્ષા આગામી તારીખ ૧૬ ફેબ્રુઆરી ચાલશે ત્યારબાદ ૧૭મીથી સીબીએસઈ બોર્ડની પરીક્ષા અને ૨૬ મીથી ગુજરાત બોર્ડની ધોરણ ૧૦ અને ૧૨ ની લેખિત પરીક્ષા લેવામાં આવશે.
રાજકોટ શહેરના ૧૪ અને ગ્રામ્યમાં આઠ કેન્દ્ર મળી રાજકોટ જિલ્લામાં કુલ ૨૨ પરીક્ષા કેન્દ્ર ફાળવવામાં આવ્યા છે. ધોરણ ૧૨ સાયન્સ ની પ્રેક્ટીકલ પરીક્ષા શરૂ થતા પરીક્ષા બાદ તેના માર્કસ ઓનલાઈન પોર્ટલ પર એ જ દિવસે અપલોડ કરવાના રહેશે. રાજકોટમાંથી કુલ ૧૯૦૩૨ વિદ્યાર્થીઓ વિજ્ઞાન પ્રવાહની જુદા જુદા વિષયો પર પ્રેક્ટીકલ પરીક્ષા આપી રહ્યા છે આ પરીક્ષા ૧૬ ફેબ્રુઆરી સુધી લેવાશે ત્યારબાદ થીયરીટીકલ પરીક્ષા માટે વિદ્યાર્થીઓને માત્ર દસ દિવસ જ તૈયારી માટે મળશે..!!
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા બોર્ડની પરીક્ષાના જાહેર થયેલા કાર્યક્રમમાં ધોરણ ૧૦ અને ધોરણ ૧૨ માં ૭૮,૩૯૦ વિદ્યાર્થીઓ પરીક્ષા આપવાના છે એમાં રાજકોટ શહેરમાંથી ૩૦૮ બિલ્ડીંગ અને ૨૭૫૩ બ્લોકની વ્યવસ્થા કરવામાં આવી છે. આગામી સપ્તાહમાં રાજકોટ જિલ્લા શિક્ષણ વિભાગ દ્વારા બોર્ડની પરીક્ષાને લઈને એક્શન પ્લાન જાહેર થાય તેવી સંભાવનાઓ છે.
