એકનો પતિ દુબઈમાં હવાલા થકી કમિશન પર પૈસાની હેરફેર કરતો હોય બીજી સહેલીને જાણકારી મળતાં જ પતિને વાત કર્યા બાદ વ્યવસ્થિત પ્લાનિંગ કરી ૫૦ લાખ પડાવી લેવાયા
રાજકોટમાં આંગડિયા પેઢીના કર્મચારીને દોઢ કલાક સુધી બંધક બનાવનાર બીજો શખસ પણ પકડાયો: દુબઈના બે શખસોના નામ પણ ખુલ્યાકર્મચારીએ આંગડિયા પેઢીના માલિકને ૫૦ લાખ મળી ગયા છે એટલુ કહ્યું’ને દુબઈમાં રહેલા ફરિયાદીએ આરોપીને ૫૦ લાખ ચૂકવી દીધા
રાજકોટની સોની બજારમાં ગોલ્ડન માર્કેટમાં આવેલી એસ.પી.આંગડિયા પેઢીના કર્મચારીને દોઢ કલાક સુધી બંધક બનાવી ત્રણ શખસોએ દુબઈમાં ૫૦ લાખનો હવાલો પડાવી દીધાનો ગુનો ક્રાઈમ બ્રાન્ચમાં નોંધાતાં જ પોલીસે આ કાંડમાં સામેલ બે શખસોને દબોચી લીધા હતા. આ આખોયે મામલો દુબઈમાં બે સહેલીઓ વચ્ચે પતિના ધંધા' અંગે થયેલી વાતચીત બાદ શરૂ થયો હતો અને ત્યાંથી જ અપહરણનો પ્લાન બનાવી પૈસા પડાવી લેવાનોખેલ’ શરૂ કરવામાં આવ્યો હતો. પોલીસે રાજકોટના બે શખસોને પકડી પાડ્યા છે જ્યારે દુબઈમાં રહેલા સાગર અને વૈભવ નામના શખસોને પકડવા માટે કાયદાકીય તજવીજ હાથ ધરાશે.
એસ.પી.આંગડિયા પેઢીના કર્મચારી વિરલ જશવંતભાઈ વ્યાસ તેમજ તેના સાથી કર્મચારી કિશન દિનેશભાઈ વીસપરાનું ગત તા.૧૦-૧૧-૨૦૨૫ના જામનગર રોડ પર નંબર પ્લેટ વગરની સફેદ કલરની બીએમડબલ્યુ કારમાં દોઢ કલાક સુધી અપહરણ કરી ફરિયાદી વિરલને આંગડિયા પેઢીના માલિક મિહિરભાઈ મુકેશભાઈ દત્તાણી પાસે એવું બોલાવડાવ્યું હતું કે તેને ૫૦ લાખની રકમ મળી ચૂકી છે. દુબઈમાં રહેતાં વિમલભાઈ પાંધી દ્વારા એસ.પી.આંગડિયા પેઢીના સંચાલકને ૫૦ લાખની રકમ રાજકોટમાંથી લેવાની હોવાનું કહેતાં જ આખોયે ખેલ શરૂ થયો હતો.
આ ગુનામાં સામેલ બજરંગવાડીના શબ્બીર ઉર્ફે જાબર સિદીકભાઈ જુણેજા અને તોફિક જમીલહુસેન શેખને પકડી પાડ્યા હતા. બન્નેની પૂછપરછમાં ખુલાસો થયો હતો કે તેમને આ હવાલો પાડવાનું દુબઈ બેઠેલા વૈભવે કહ્યું હતું. આના બદલામાં શબ્બીર ઉર્ફે જાબરને પાંચ લાખ રૂપિયા ચૂકવવાનો વાયદો કરવામાં આવ્યો હતો.
પોલીસ તપાસમાં સામે આવ્યા પ્રમાણે આરોપી વૈભવ પટેલની પત્ની તેમજ ફરિયાદી વિમલભાઈ પાંધીની પત્ની બન્ને દુબઈમાં આવેલા ધાર્મિક સ્થળે નિયમિત અવર-જવર કરતા હોય બન્ને વચ્ચે પરિચય કેળવાયો હતો. આ મુલાકાત દરમિયાન જ એકબીજાના પતિના વ્યવસાય અંગે ચર્ચા થતાં વૈભવની પત્નીએ તેનો પતિ આંગડિયાના પૈસા કમિશન મારફતે ફેરવતો હોવાનું કહી તેમની પાસે નાણાંની હેરફેર કરવા માટે એક પાર્ટી હોવાનું કહેતાં વિમલ પાંધીના પત્નીએ વિમલને વાત કર્યા બાદ વિમલ અને વૈભવ પટેલ વચ્ચે સંબંધ કેળવાયો હતો. આ ગુનામાં સાગર વ્યાસ નામનો શખસ પણ સામેલ હોવાનું ખુલતાં બન્નેને પકડવા તજવીજ આદરાઈ છે.
એકંદરે વિમલ પાંધીને ઉલ્લુ બનાવવા માટે વૈભવ અને સાગરે કાવતરું રચ્યું હતું. આ બન્નેએ વિમલ પાંધીને કહ્યું હતું કે તેમને રાજકોટમાંથી ૫૦ લાખનું પેમેન્ટ લેવાનું છે. આ પેમેન્ટ સ્વીકારવા માટે વિમલ પાંધીએ રાજકોટની આંગડિયા પેઢીના માલિક મિહિર દત્તાણીનો સંપર્ક કર્યો હતો જે બાદ વિરલ પૈસા લેવા માટે ગયો હતો અને તેનું અપહરણ કરી આરોપીઓએ જબરદસ્તીથી એવું બોલાવડાવ્યું હતું કે તેને ૫૦ લાખ રૂપિયા મળી ગયા છે. જેવો ૫૦ લાખનો મેસેજ પાસ થયો કે તુરંત જ વિમલ પાંધીએ વૈભવને ૫૦ લાખ ચૂકવી દીધા હતા !
