ઉના, ગીરગઢડા, તલાલામાં ધોધમાર, વડોદરામાં 4 ઈંચ

રવિવારે પણ મેઘરાજાએ સટાસટી બોલાવતા વડોદરામાં ફરી પૂરનું સંકટ : અમરેલી, ગીર સોમનાથ, ભાવનગર, પોરબંદર અને રાજકોટ જિલ્લામાં વરસાદ

રાજકોટ : રાજ્યમાં ભારે વરસાદની આગાહી વચ્ચે રવિવારે પણ મેઘરાજાએ સટાસટી બોલાવી હતી અને ગીરસોમનાથ જિલ્લાના ઉના, ગીરગઢડા, તલાલા પંથકમાં દે ધનાધન વરસાદ વરસાવવાની સાથે વડોદરા અને બોટાદમાં ધોધમાર વરસાદ વરસતા ગણતરીની મિનિટોમાં જ રસ્તાઓ પર પાણી ફરી વળ્યાં હતાં.વડોદરામાં તો ચાર કલાકમાં જ સાડાત્રણ ઈંચથી વધુ વરસાદ વરસી જતા ફરી એક વખત પુરનું સંકટ તોળાઈ રહ્યું છે.

આજથી સમગ્ર રાજ્યમાં વરસાદનું જોર ઘટવાની શક્યતા હવામાન વિભાગે વ્યક્ત કરી છે ત્યારે રવિવારે મેઘરાજાએ વડોદરા જિલ્લામાં આફતરૂપે ચાર ઈંચ જેટલો વરસાદ વરસાવતા વડોદરામાં ફરી એક વાર પૂરનું સંકટ છવાયું હતું, રોડ રસ્તા પર પાણી જ પાણી વચ્ચે વિશ્વામિત્રી નદીની સપાટીમાં સતત વધારો હતો ઉપરાંત આજવાની જળ સપાટીમાં પણ સતત વધારો થતા શહેરીજનોની ચિંતા વધવા પામી હતી.બીજી તરફ ગીર સોમનાથ જિલ્લાના ગીર ગઢડા અને ઉનામાં પણ ચાર કલાકમાં બે ઈંચ જેટલો વરસાદ વરસી જતા ચોતરફ પાણી-પાણીના દ્રશ્યો જોવા મળ્યા  હતા બન્ને તાલુકાના ગ્રામ્ય વિસ્તારોમાં પણ ધોધમાર વરસાદ વરસ્યો હતો.

સ્ટેટ ઇમરજન્સી ઓપરેશન સેન્ટરના સત્તાવાર સૂત્રોના જણાવ્યા મુજબ રવિવારે સવારે 6 વાગ્યાથી સાંજના 6 વાગ્યા સુધીમાં વડોદરામાં 96 મીમી, પાદરમાં 73 મીમી, નર્મદાના ડેડિયાપાડામાં 53 મીમી, ગિરસોમનાથના ગીરગઢડામાં 48 મીમી, ઉનામાં 44 મીમી, બોટાદના બરવાળામાં 40 મીમી, તાલાલામાં 30 મીમી, ધોલેરામાં 30 મીમી, અમરેલીના ખાંભામા 26 મીમી, બોટાદના ગઢડામાં 23 મીમી, ભાવનગરના વલ્લભીપુરમાં 23 મીમી, સુરેન્દ્રનગરના ચુડામાં 20 મીમી, ભાવનગરના શિહોરમાં 20 મીમી, ઉમરાળામાં 19 મીમી, જૂનાગઢના મેંદરડામાં 17 મીમી, પોરબંદરના કુતિયાણામાં 15 મીમી, રાજકોટના જસદણમાં 12 મીમી, ભાવનગરમાં 11 મીમી સહિત રાજ્યના 107 તાલુકાઓમાં વરસાદ વરસ્યો હતો.

ઉલ્લેખનીય છે કે, રાજ્યના કુલ 206 પૈકી 122 ડેમ ઓવરફ્લો થયા છે જેમાં સૌરાષ્ટ્ર –  કચ્છના 100 જળાશયો છલકાઈ ગયા છે. મધ્ય ગુજરાતના 10 ડેમ, દક્ષિણ ગુજરાતના નવ અને ઉત્તર ગુજરાતના ત્રણ જળાશયો સંપૂર્ણ છલકાઈ ગયા છે. પાણીની આવક થવાના કારણે રાજ્યના 178 જળાશયો હાઈએલર્ટ,એલર્ટ અથવા વોર્નિંગ પર છે. 90 ટકાથી વધુ છલકાઈ ગયા હોય તેવા 158 ડેમ હાઈએલર્ટ પર છે. જ્યારે 80થી 90 ટકા સુધી ભરાયેલા 13 ડેમ એલર્ટ પર અને 70થી 80 ટકા ભરાયેલા આઠ ડેમ વોર્નિંગ પર છે.

રાજ્યમાં ચોમાસાની સિઝનમાં અત્યાર સુધીમાં 134.40 ટકા વરસાદ વરસી ચૂક્યો છે. સૌથી વધુ કચ્છમાં સિઝનનો 184.86 ટકા વરસાદ પડ્યો છે, જ્યારે સૌરાષ્ટ્રમાં સિઝનનો અત્યાર સુધીમાં 142.12 ટકા વરસાદ વરસ્યો છે. દક્ષિણ ગુજરાતમાં અત્યાર સુધીમાં 138.85 ટકા વરસાદ અને મધ્ય ગુજરાતમાં સિઝનનો 130.31 ટકા વરસાદ પડ્યો છે. ઉત્તર ગુજરાતમાં સિઝનનો અત્યાર સુધીમાં 113.07 ટકા વરસાદ વરસી ચૂક્યો છે.