સિલેક્શન કેમ્પમાં મને લાત મારી ભગાડી દેવાતો હતો !!
વર્લ્ડકપમાં ટીમ ઈન્ડિયા વતી સૌથી વધુ વિકેટ લેનારા મોહમ્મદ શમીએ ક્રિકેટ એસો.ની ખોલી પોલ
ઉત્તર પ્રદેશ ક્રિકેટ એસોસિએશન (યુપીસીએ)ની પસંદગી પ્રક્રિયા હંમેશાથી ચર્ચાસ્પદ અને વિવાદાસ્પદ જ રહી છે. અનેક વખત કૌભાંડના આરોપોને કારણે આબરુ પર બટ્ટો લાગ્યો જ છે પરંતુ આ વખતે જે થયું છે તેણે યુપીસીએની ધજ્જીયા ઉડાવી દીધી છે. ટીમ ઈન્ડિયાના ફાસ્ટ બોલર મોહમ્મદ શમીએ એક ઈન્ટરવ્યુમાં જણાવ્યું કે તેણે ઉત્તર પ્રદેશ તરફથી રમવા માટે બે વર્ષ મહેનત કરી હતી પરંતુ જ્યારે તે ફાઈનલ રાઉન્ડમાં પહોંચ્યો ત્યારે તેની સાથે શરમજનક વ્યવહાર કરવામાં આવ્યો હતો જેથી તેણે યુપીનો હોવા છતાં બંગાળ તરફથી રમવાનું પસંદ કર્યું હતું.
વર્લ્ડકપમાં સૌથી વધુ વિકેટ લેનારા શમીએ કહ્યું કે ઉત્તરપ્રદેશ માટે તેણે બે વખત ટ્રાયલ આપ્યું હતું. ત્યાં ૧૬૦૦થી વધુ બાળકો ભાગ લેતા હતા. તે પોતાના ભાઈ સાથે ટ્રાયલ આપવા જતો હતો. જો કે જેવો તે ટ્રાયલના ફાઈનલમાં પહોંચ્યો તો તેને લાત મારીને ભગાડી દેવામાં આવ્યો હતો.
શમીએ યુપીસીએના પસંદગીકારોના વ્યવહાર પર મોટું નિવેદન આપતા કહ્યું કે મુખ્ય પસંદગીકારે મને એવું કહીને પરત કર્યો કે તારામાં પ્રતિભા તો બહુ છે પરંતુ શું તું મારી ખુરશી હલાવી શકીશ ? આ પછી મારા ભાઈએ ટ્રાયલ ફોર્મ ફાડી નાખતાં કહ્યું કે હવે અહીંથી રમવું જ નથી.
આ પછી શમીએ બંગાળ તરફથી રમવા ટીમ ઈન્ડિયામાં એન્ટ્રી કરી હતી. અત્યારે તે કેવું રમી રહ્યો છે તે સૌ કોઈ જાણે છે.