હાર્દિક પંડ્યા બન્યો વિશ્વનો નંબર વન T20 ઓલરાઉન્ડર, ચાહકો થયા ખુશ-ખુશાલ
T20 વર્લ્ડ કપમાં ભારતે શાનદાર જીત મેળવ્યા બાદ વધુ એક સારા સમાચાર સામે આવ્યા છે. હાર્દિક પંડ્યાએ ઇન્ટરનેશનલ ક્રિકેટ કાઉન્સિલ (ICC)ની રેન્કિંગમાં નંબર 1 સ્થાન મેળવ્યું છે. ભારતના ઓલરાઉન્ડર પંડ્યાએ ICC રેન્કિંગમાં પ્રથમ વખત સ્થાન મેળવ્યું છે.
ICC T20 વર્લ્ડ કપ 2024માં હાર્દિક પંડ્યાના જોરદાર પ્રદર્શનને કારણે, તે ICC મેન્સ T20I રેન્કિંગ અપડેટમાં નંબર 1 ક્રમાંકિત ઓલરાઉન્ડર બની ગયો છે. આઈસીસીની નવી રેન્કિંગ બાદ હાર્દિક પંડ્યા બે સ્થાનનો ઉછાળો આવ્યો છે. હાર્દિક હવે શ્રીલંકાના સ્ટાર વનિન્દુ હસરાંગા સાથે ટોચના ક્રમાંકિત T20I ઓલરાઉન્ડર બની ગયો છે.
હાર્દિકે ફાઈનલમાં હેનરિક ક્લાસેન અને ડેવિડ મિલરની મહત્વની વિકેટ લઈને મેચને પલટી નાખ્યો હતો અને દક્ષિણ આફ્રિકા સામે ભારતની 7 રને જીતમાં મહત્વની ભૂમિકા ભજવી હતી. T20 વર્લ્ડ કપમાં પણ બેટિંગ અને બોલિંગમાં હાર્દિકનું યોગદાન મજબૂત હતું. જેના કારણે તે આ કેટેગરીમાં નંબર 1 પર પહોંચનાર પ્રથમ ભારતીય ખેલાડી બની ગયો છે.
પંડ્યાના વર્લ્ડ કપ 2024ના આંકડા
પંડ્યાએ T20 વર્લ્ડ કપ 2024ની 8 મેચમાં 144 રન બનાવ્યા, જે દરમિયાન તેની એવરેજ 48 હતી. પંડ્યાએ 7.64ના ઇકોનોમી રેટથી બોલિંગ કરી અને આ 8 વર્લ્ડ કપ મેચોમાં 11 વિકેટ લીધી.
હાર્દિકે અંતિમ ઓવર ફેંકી હતી
હાર્દિક પંડ્યાએ T20 વર્લ્ડ કપની ફાઈનલ મેચમાં 20 રનમાં 3 વિકેટ ઝડપી હતી અને તે 5 રન બનાવીને અણનમ રહ્યો હતો. જ્યાં પંડ્યાએ T20 વર્લ્ડ કપની ફાઈનલની છેલ્લી ઓવર ફેંકી હતી, જ્યાં આફ્રિકાની ટીમને જીતવા માટે 16 રનની જરૂર હતી, પરંતુ પંડ્યાએ માત્ર 8 રન આપ્યા હતા.
T20 વર્લ્ડ કપ 2024માં હાર્દિકની આ સફર
- હાર્દિકે ન્યૂયોર્કમાં આયર્લેન્ડ સામે 27 રન આપીને 3 વિકેટ લીધી હતી.
- હાર્દિકે ન્યૂયોર્કમાં પાકિસ્તાન સામે 7 રન બનાવ્યા હતા. ત્યારબાદ 24 રનમાં 2 વિકેટ લીધી હતી.
- હાર્દિકે ન્યૂયોર્કમાં અમેરિકા સામે 2 વિકેટ ઝડપી હતી
- હાર્દિકે અફઘાનિસ્તાન સામે 32 રનની ઇનિંગ રમી હતી.
- હાર્દિકે પહેલા તોફાની શૈલીમાં બાંગ્લાદેશ સામે 50* રન બનાવ્યા, પછી એક વિકેટ લીધી.
- હાર્દિકે ઓસ્ટ્રેલિયા સામે 27 રનની અણનમ ઇનિંગ રમી હતી.
- હાર્દિકે ઈંગ્લેન્ડ સામેની સેમીફાઈનલ મેચમાં 23 રન બનાવ્યા હતા.
- હાર્દિકે ફાઇનલમાં 20 રન આપીને ત્રણ વિકેટ ઝડપી હતી.
જસપ્રીત બુમરાહની રેન્કિંગમાં પણ સુધારો થયો છે
ભારતના સ્ટાર ફાસ્ટ બોલર જસપ્રીત બુમરાહને T20 વર્લ્ડ કપમાં 15 વિકેટ લેવા બદલ ‘પ્લેયર ઓફ ધ ટુર્નામેન્ટ’નો એવોર્ડ મળ્યો હતો. તે 12મા રેન્કિંગ પર આવી ગયો છે. 2020 પછી આ તેનું સર્વોચ્ચ પ્રદર્શન છે.
ટી20 ઓલરાઉન્ડર અને બોલિંગ રેન્કિંગમાં આ ફેરફાર થયો
T20I ઓલરાઉન્ડર રેન્કિંગના ટોપ 10માં ઘણા ફેરફારો થયા છે. માર્કસ સ્ટોઇનિસ, સિકંદર રઝા, શાકિબ અલ હસન અને લિયામ લિવિંગસ્ટોન એક સ્થાન ઉપર પહોંચી ગયા છે. જ્યારે મોહમ્મદ નબી ચાર સ્થાન સરકીને ટોપ 5માંથી બહાર થઈ ગયો છે. પુરુષોની T20I બોલિંગ રેન્કિંગમાં, એનરિચ નોર્સિયા સાત સ્થાન આગળ વધીને કારકિર્દીના સર્વશ્રેષ્ઠ બીજા સ્થાને પહોંચી ગયો છે, જેણે ટોચના ક્રમાંકિત આદિલ રશીદને 675 રેટિંગ પોઈન્ટ્સ સાથે પાછળ છોડી દીધો છે.