આજથી ‘ગાબા’માં ભારત-ઓસ્ટ્રેલિયા વચ્ચે પ્રતિષ્ઠા બચાવવા જંગ

ઑસ્ટ્રેલિયાએ ગાબા ટેસ્ટ માટે પ્લેઈંગ 11 કરી જાહેર, જોશ હેઝલવુડનો ટીમમાં સમાવેશ

ભારત અને ઑસ્ટ્રેલિયા વચ્ચે પાંચ મેચોની બોર્ડર-ગાવસ્કર ટ્રોફી 2024-25 ની ત્રીજી મેચ 14 ડિસેમ્બરથી બ્રિસ્બેનના ગાબા સ્ટેડિયમમાં રમાશે. ભારતે પ્રથમ મેચ 295 રનથી જીતી હતી, જ્યારે યજમાન ટીમે બીજી મેચ 10 વિકેટથી જીતીને શ્રેણી 1-1 થી બરાબર કરી હતી. હવે તમામ ચાહકોની નજર ત્રીજી ટેસ્ટ મેચ પર છે, જેના વિશે યજમાન ઑસ્ટ્રેલિયાએ તેની પ્લેઇંગ 11ની જાહેરાત કરી છે, જેમાં એડિલેડ ટેસ્ટ મેચમાં જીત છતાં મોટો ફેરફાર કરવામાં આવ્યો છે, જેની પુષ્ટિ ઓસ્ટ્રેલિયાના કેપ્ટન પેટ કમિન્સે પોતે મેચના એક દિવસ પહેલા યોજાયેલી પ્રેસ કોન્ફરન્સમાં કરી હતી.

ઑસ્ટ્રેલિયાના સુકાની પેટ કમિન્સે કહ્યું કે ગત મેચ માટે સંપૂર્ણ રીતે ફિટ ન રહેલા ઝડપી બોલર જોશ હેઝલવુડને આ ટેસ્ટ મેચ માટે ફિટ કરી દેવામાં આવ્યો છે અને તે સ્કોટ બોલાન્ડની જગ્યા લેશે. હેઝલવુડ સાઇડ સ્ટ્રેઇનને કારણે એડિલેડમાં રમાયેલી પ્રથમ ટેસ્ટમાંથી બહાર થઈ ગયો હતો. બોલાન્ડની વાત કરીએ તો તેણે એડિલેડ ટેસ્ટ મેચમાં ખૂબ જ સારી બોલિંગ કરી હતી, જેમાં તે 5 વિકેટ લેવામાં સફળ રહ્યો હતો. હેઝલવુડે બ્રિસ્બેન ટેસ્ટ મેચ માટે પ્લેઇંગ 11માં સામેલ થતાં પહેલાં ફિટનેસ ટેસ્ટ પણ કરાવ્યો હતો, જેમાં તે પાસ થયો હતો.

જોશ હેઝલવુડની બ્રિસ્બેન ટેસ્ટ મેચ માટે પ્લેઇંગ 11માં વાપસી પાછળનું સૌથી મોટું કારણ ભારતીય ટીમ સામે તેનો શાનદાર રેકોર્ડ પણ છે, જેમાં તેણે અત્યાર સુધીમાં 16 ટેસ્ટ મેચમાં 25.55 ની એવરેજથી 56 વિકેટ ઝડપી છે, જેમાં તેણે ચાર વખત એક ઇનિંગમાં 5 વિકેટ પણ લીધી છે. હેઝલવુડ સિવાય, ઑસ્ટ્રેલિયાના પ્લેઇંગ 11માં અન્ય કોઈ ફેરફાર કરવામાં આવ્યો નથી, જે સ્પષ્ટ કરે છે કે તેઓ ત્રણ મુખ્ય ઝડપી બોલરો અને એક સ્પિનરને મેદાનમાં ઉતારશે.

ઑસ્ટ્રેલિયા પ્લેઇંગ 11: ઉસ્માન ખ્વાજા, નાથન મેકસ્વિની, માર્નસ લાબુશેન, સ્ટીવ સ્મિથ, ટ્રેવિસ હેડ, મિશેલ માર્શ, એલેક્સ કેરી, પેટ કમિન્સ, મિશેલ સ્ટાર્ક, નાથન લિયોન, જોશ હેઝલવુડ

સચિન બાદ કોહલી પૂરી કરશે આ અનોખી સદી

મેદાનમાં ઉતરતાની સાથે જ એક મોટો રેકોર્ડ પોતાના નામે કરી લેશે

સ્ટાર બેટ્સમેન વિરાટ કોહલી આ મેચમાં મેદાનમાં ઉતરતાની સાથે જ એક મોટો રેકોર્ડ પોતાના નામે કરી લેશે. ઓસ્ટ્રેલિયા સામે આંતરરાષ્ટ્રીય ક્રિકેટમાં કિંગ કોહલીની આ 100મી મેચ હશે. તે કાંગારૂઓ સામે 100 ટેસ્ટ મેચ રમનાર વિશ્વનો માત્ર બીજો ખેલાડી બની જશે. કોહલીએ ઓસ્ટ્રેલિયા સામે અત્યાર સુધીમાં 27 ટેસ્ટ, 49 વનડે અને 23 T-20 મેચ રમી છે, અત્યાર સુધી રમાયેલી આ 99 મેચોમાં તેણે 50.24ની શાનદાર એવરેજથી 5326 રન બનાવ્યા છે.

ઓસ્ટ્રેલિયા સામે સૌથી વધુ મેચ રમવાનો વર્લ્ડ રેકોર્ડ સચિન તેંડુલકરના નામે છે. સચિન તેંડુલકરે કાંગારૂઓ સામે કુલ 110 મેચ રમી છે જેમાં તેણે 49.68ની શાનદાર એવરેજથી 6707 રન બનાવ્યા છે.

ઓસ્ટ્રેલિયા સામે સૌથી વધુ મેચ રમનાર ખેલાડીઓ

સચિન તેંડુલકર- 110
વિરાટ કોહલી- 99*
ડેસમન્ડ હેન્સ – 97
એમએસ ધોની- 91
વિવ રિચાર્ડસ- 88