ભારતની 2011 વર્લ્ડ કપ જીતના હીરો યુવરાજ સિંહ પર બનશે બાયોપિક : મેકર્સની જાહેરાત

ભારતીય ક્રિકેટ ટીમની 2011 વર્લ્ડ કપ જીતના હીરો યુવરાજ સિંહને દેશ ક્યારેય ભૂલી શકશે નહીં. વર્લ્ડ કપમાં મેન ઓફ ધ ટુર્નામેન્ટ રહેલા યુવરાજે બેટ અને બોલ બંને વડે ભારતીય ટીમના વર્લ્ડકપ અભિયાનને આગળ વધારવામાં મોટો ફાળો આપ્યો હતો. જ્યાં એક તરફ તે ગ્રાઉન્ડ 3પર પોતાનું સર્વસ્વ આપી રહ્યો હતો, ત્યારે તેનું શરીર એક અલગ જ યુદ્ધ લડી રહ્યું હતું.

વર્લ્ડકપની જીત બાદ ખબર પડી કે યુવરાજ જે રીતે ક્રિકેટના મેદાન પર અન્ય દેશોને હરાવવામાં ભારતનો હીરો હતો તેવી જ રીતે તેણે વાસ્તવિક જીવનમાં પણ કેન્સરને હરાવ્યું હતું. દેશભરના ક્રિકેટ પ્રેમીઓ ભારતીય ક્રિકેટના સૌથી પ્રતિકાત્મક ડાબા હાથના ખેલાડીઓમાંના એક યુવરાજની વાર્તાને સિનેમાના પડદા પર જોવા આતુર છે. હવે આવા લોકો માટે એક મોટા સમાચાર છે. હવે યુવરાજ સિંહના જીવન પર બોલિવૂડ ફિલ્મ બનવા જઈ રહી છે.

યુવરાજના જીવન પર બાયોપિકની જાહેરાત

મોટી પ્રોડક્શન કંપની ટી-સિરીઝના માલિક ભૂષણ કુમારે રવિ ભાગચંદકા સાથે મળીને યુવરાજ સિંહની બાયોપિકની જાહેરાત કરી છે. ‘એનિમલ’, ‘કબીર સિંહ’ અને ‘તાનાજી’ જેવી ફિલ્મોના નિર્માતા ભૂષણે કહ્યું કે તે યુવરાજ પરની બાયોપિકને લઈને ખૂબ જ ઉત્સાહિત છે.

તેણે કહ્યું, ‘યુવરાજ સિંહનું જીવન જુસ્સા, નિશ્ચય અને ઉત્સાહની આકર્ષક કથા છે. આશાસ્પદ હીરો, ક્રિકેટિંગ હીરો અને પછી રિયલ લાઈફ હીરો બનવાની તેની વાર્તા ખૂબ જ પ્રેરણાદાયી છે. હું એક એવી સ્ટોરી લાવવા માટે એક્સાઈટેડ છું જે મોટા પડદા પર જોવા અને સાંભળવા લાયક છે અને તેની અસાધારણ સિદ્ધિઓની ઉજવણી કરું છું.

યુવરાજે પોતાની બાયોપિક વિશે આ વાત કહી

યુવરાજે તેની બાયોપિક બનવા વિશે કહ્યું, ‘હું ખૂબ જ સન્માનની લાગણી અનુભવી રહ્યો છું કે મારી વાર્તા ભૂષણ જી અને રવિ દ્વારા વિશ્વભરના લાખો ચાહકોને બતાવવામાં આવશે. દરેક ઉતાર-ચઢાવ દરમિયાન ક્રિકેટ મારો સૌથી મોટો પ્રેમ અને મારી શક્તિનો સ્ત્રોત રહ્યો છે. હું આશા રાખું છું કે આ ફિલ્મ લોકોને તેમના જીવનના પડકારોને પાર કરવા અને તેમના સપનાઓને અતૂટ જુસ્સા સાથે પૂર્ણ કરવા માટે પ્રેરણા આપશે.

તમને જણાવી દઈએ કે, યુવરાજ સિંહની બાયોપિકને કો-પ્રોડ્યુસ કરી રહેલા રવિ ભાગચંદકાએ ક્રિકેટના દિગ્ગજ સચિન તેંડુલકર પર ‘સચિનઃ અ બિલિયન ડ્રીમ્સ’ બનાવી છે. હાલમાં તે આમિર ખાનની ફિલ્મ ‘સિતારે જમીન પર’માં કામ કરી રહ્યો છે. યુવરાજ સિંહની બાયોપિક તેનો બીજો પ્રોજેક્ટ હશે, જે એક ક્રિકેટરની વાર્તા લઈને આવશે.

યુવરાજ સાથેના પોતાના કનેક્શન અંગે રવિએ કહ્યું, ‘યુવરાજ ઘણા વર્ષોથી સારો મિત્ર છે. હું સન્માનિત છું કે તેણે તેની અદ્ભુત ક્રિકેટ સફરને સિનેમેટિક અનુભવમાં પરિવર્તિત કરવા માટે અમારા પર વિશ્વાસ કર્યો. યુવી માત્ર વર્લ્ડ ચેમ્પિયન નથી, પરંતુ દરેક રીતે એક સાચો લિજેન્ડ છે. મેકર્સે હજુ સુધી યુવરાજની બાયોપિક માટે કાસ્ટ અને ક્રૂની જાહેરાત કરી નથી. આ ફિલ્મમાં યુવરાજની ભૂમિકા કોણ ભજવશે તે જોવું રસપ્રદ રહેશે.