સરફરાઝ, રાહુલ બાદ હવે શુભમન ગીલને ઈજા : પર્થ ટેસ્ટમાંથી થઈ શકે બહાર

ભારત-ઑસ્ટે્રલિયા વચ્ચે ૨૨ નવેમ્બરથી પાંચ મેચની ટેસ્ટ શ્રેણી શરૂ થવા જઈ રહી છે. આ શ્રેણી માટે ખેલાડીઓ જોરદાર પ્રેક્ટિસ કરી રહ્યા છે. જો કે તે પહેલાં ટીમ ઈન્ડિયાનું ટેન્શન વધી ગયું છે. રોહિત શર્મા રમશે કે નહીં તે હજુ નક્કી નથી ત્યાં હવે શુભમન ગીલને ઈજા થઈ જતાં તે પણ બહાર થઈ જાય તેવી શક્યતા સેવાઈ રહી છે.

ગીલને પર્થમાં ઈન્ડિયા `એ’ વિરુદ્ધ મેચ દરમિયાન આંગળીમાં ઈજા થઈ હતી. મેચ દરમિયાન સ્લિપમાં કેચ પકડતી વખતે તેને આંગળીમાં ઈજા પહોંચી હતી જેને ગંભીર ગણવામાં આવી રહી છે. આ જ કારણથી પર્થમાં તેનું રમવું નિશ્ચિત નથી. મેડિકલ ટીમ તેના ઉપર નજર રાખી રહી છે અને તે પહેલી મેચમાં રમશે કે નહીં તેનો નિર્ણય ટૂંક સમયમાં લેવાશે.

આ પહેલાં સરફરાઝ ખાન અને કે.એલ.રાહુલ પણ ઈજાગ્રસ્ત થયા હોવાથી ટીમની ચિંતામાં દરરોજ વધારો થઈ રહ્યો છે.