ભારત-પાકિસ્તાન મેચની વધુ ૧૪૦૦૦ ટિકિટ મિનિટોમાં ખતમ’

બપોરે ૧૨ વાગ્યાથી વેચાણ શરૂ કર્યું'ને થોડી જ વારમાં બધી વેચાઈ પણ ગઈ ! ક્રિકેટરસિકોમાં નિરાશા

અમદાવાદ બીસીસીઆઈએ અમદાવાદના નરેન્દ્ર મોદી સ્ટેડિયમ પર ભારત-પાકિસ્તાન વચ્ચેની મેચ માટે વધુ ૧૪૦૦૦ ટિકિટ વેચવા કાઢી હતી જેનું વેચાણ શરૂ થતાં જ મિનિટોમાં પૂર્ણ થઈ જતાં અનેક ક્રિકેટરસિકોને નિરાશા સાંપડી છે. બીસીસીઆઈએ આ ટિકિટનું વેચાણ ૮ ઑક્ટોબરે બપોરે ૧૨ વાગ્યાથી શરૂ કર્યું હતું પરંતુ થોડી જ વાર બાદ વેબસાઈટ પર ટિકિટ ખરીદવાનો પ્રયાસ કરવામાં આવતાં અનેકને નિષ્ફળતા સાંપડી હોવાનું જાણવા મળી રહ્યું છે. અમુક અમુક ટિકિટ માટે તોસોલ્ડ આઉટ’ મતલબ કે ટિકિટ વેચાઈ ગઈ છે તેવું જ લખાણ લખેલું આવી રહ્યું હતું.

ક્રિકેટરસિકોએ ઘણી વખત પ્રયાસ કર્યો છતાં ટિકિટ મળી ન શકતાં અંતે થાકી-હારીને ટિકિટ ખરીદવાનું જ માંડી વાળ્યું હતું !
બોર્ડે ત્રીજી વખત ટિકિટ રિલિઝ કરવાનો નિર્ણય ક્રિકેટરસિકોની નારાજગી બાદ લીધો હતો. ભારતીય બોર્ડે વર્લ્ડકપની શરૂઆત પહેલાં ઑગસ્ટના અંતમાં વર્લ્ડકપની ચાર લાખ ટિકિટ રિલિઝ કરી હતી જે મિનિટોમાં જ વેચાઈ ગઈ હતી જેના કારણે ક્રિકેટરસિકો ભડક્યા હતા અને સોશ્યલ મીડિયા પર બીસીસીઆઈની ઝાટકણી કાઢી હતી. આ પહેલાં ૩ સપ્ટેમ્બરે ભારત-પાક. મેચની ટિકિટ વેચાઈ હતી. પહેલાં તો ટિકિટ વેચાણ વેબસાઈટની હોમ સ્ક્રીન રિફ્રેશ થઈ રહી હતી પરંતુ થોડી જ વારમાં ટિકિટ સોલ્ડ આઉટ થવાની જાણકારી અપાઈ હતી આવામાં કોઈને ટિકિટ ખરીદવાની તક મળી ન્હોતી.