હાર્દિક માટે દેશ કે વડોદરા કરતા IPL મોટી છે !!
આઈપીએલના બે મહિના પહેલાં હાર્દિક ઈજાગ્રસ્ત થઈ જાય છે એ તો વળી કેવું ? પૈસા કમાવ પરંતુ દેશ-રાજ્યને અગ્રતા આપો-પ્રવીણ કુમાર
આઈપીએલ-૨૦૨૪માં મુંબઈ ઈન્ડિયન્સ એક નવા કેપ્ટન સાથે મેદાને ઉતરશે. આ વખતે રોહિત શર્માની જગ્યાએ હાર્દિક પંડ્યાના હાથમાં ટીમની કમાન છે. જો કે આ મામલે ભારતીય ક્રિકેટ ટીમના પૂર્વ ખેલાડી પ્રવીણ કુમારે આકરાં શબ્દોમાં હાર્દિક પંડ્યાની ટીકા કરતાં કહ્યું કે તેના (હાર્દિક) માટે દેશ અને તેનું રાજ્ય વડોદરા કરતા આઈપીએલ મોટી છે !
સોશ્યલ મીડિયા પર વાયરલ થઈ રહેલા એક વીડિયોમાં ભારતીય ક્રિકેટ ટીમના પૂર્વ ખેલાડી પ્રવીણ કુમારને મુંબઈ ઈન્ડિયન્સની કેપ્ટનશિપ બદલવા પર આકરો સવાલ પૂછવામાં આવ્યો હતો કે શું મુંબઈ ઈન્ડિયન્સે હાર્દિકને કેપ્ટન બનાવવામાં ઉતાવળ કરી છે કે હાર્દિકને કેપ્ટન બનાવવાનો નિર્ણય યોગ્ય છે ? આ અંગે પ્રવીણે કહ્યું કે પાછલા મહિનાથી હાર્દિક ક્રિકેટથી દૂર છે. હાર્દિક આઈપીએલના બે મહિના પહેલાં ઈજાગ્રસ્ત થઈ જાય છે ! તમે દેશ માટે નથી રમતા સાથે સાથે ઘરેલું ક્રિકેટમાં વડોદરા વતી પણ નથી રમતા અને માત્ર આઈપીએલ માટે જ રમો છે જે વસ્તુ વ્યાજબી નથી. પૈસા કમાવા જ જોઈએ અને તેના માટે તમને કોઈ રોકી ન શકે પરંતુ તમારા માટે દેશ અને તમારું રાજ્ય હંમેશા પહેલાં હોવા જોઈએ. જો કે તમે (હાર્દિક) એવું નથી કરતા અને માત્ર આઈપીએલને જ મહત્ત્વ આપી રહ્યા છો.
ઉલ્લેખનીય છે કે પ્રવીણ કુમાર આઈપીએલમાં મુંબઈ ઈન્ડિયન્સ, રોયલ ચેલેન્જર્સ બેંગ્લોર અને કિંગ્સ ઈલેવન પંજાબ વતી રમી ચૂક્યો છે. પ્રવીણે યુવા ખેલાડીઓને સલાહ આપી કે આઈપીએલની જગ્યાએ આંતરરાષ્ટ્રીય ક્રિકેટને મહત્ત્વ આપવું જોઈએ અને પોતાના કરિયરમાં બન્ને વસ્તુઓમાં સંતુલન જાળવવાની કોશિશ કરવી જોઈએ.
