રણજી ટ્રોફી માટે મુકેશ કુમારને ટીમ ઈન્ડિયામાંથી છૂટો કરાયો
ભારતીય ટીમ મેનેજમેન્ટે ઈંગ્લેન્ડ વિરુદ્ધ ત્રીજી ટેસ્ટ પહેલાં ફાસ્ટ બોલર મુકેશ કુમારને ટીમમાંથી છૂટો કર્યો છે. મુકેશ બિહાર વિરુદ્ધ રણજી ટ્રોફીની મેચમાં બંગાળ વતી રમી રહ્યો છે. તેણે વિશાખાપટ્ટનમમ ટેસ્ટ મેચ રમી હતી. ૨૩ ફેબ્રુઆરીથી રાંચીમાં રમાનારી ચોથી ટેસ્ટ મેચ માટે તે ભારતીય ટીમ સાથે જોડાઈ જશે. મુકેશને વિશાખાપટ્ટનમ ટેસ્ટમાં સીરાજની જગ્યાએ સામેલ કરાયો હતો. જો કે ઈંગ્લેન્ડના બેટરોએ તેનો સરળતાથી સામનો કર્યો હતો એટલા માટે તેણે ઓછી ઓવર જ ફેંકી હતી. પહેલી ઈનિંગમાં તેણે સાત ઓવર ફેંકી ૪૪ રન આપ્યા હતા તો બીજી ઈનિંગમાં પાંચ ઓવરમાં ૨૬ રન આપીને એક વિકેટ મેળવી હતી. તેને એકમાત્ર વિકેટ ઈંગ્લેન્ડના ૧૦ નંબરના ખેલાડી શોયેબ બસીરની મળી હતી.
