પાકિસ્તાન પ્રવાસ માટે ન્યુઝીલેન્ડ ટીમની જાહેરાત

૧૮ એપ્રિલથી પાંચ મેચની ટી-૨૦ શ્રેણી રમાશે: બ્રેસવેલને કેપ્ટન બનાવી સૌને ચોંકાવ્યા

ન્યુઝીલેન્ડે પાકિસ્તાન પ્રવાસ માટે પોતાની ૧૫ ખેલાડીઓની ટી-૨૦ ટીમની જાહેરાત કરી છે. ટીમ ન્યુઝીલેન્ડ પાકિસ્તાન પ્રવાસે પાંચ ટી-૨૦ મુકાબલા રમશે. કિવિ ટીમે અનુભવી ઓલરાઉન્ડર માઈકલ બ્રેસવેલને આ શ્રેણી માટે ટીમનો કેપ્ટન બનાવીને સૌને ચોંકાવ્યા છે. ટીમ રોબીન્સનને પહેલી વખત ન્યુઝીલેન્ડ ટીમમાં જગ્યા મળી છે અને આ ટીમમાં અનકેપ્ડ વિલ ઓ રુડકીને પણ સામેલ કરાયો છે. ન્યુઝીલેન્ડને અનેક મુખ્ય ખેલાડીઓની સેવા મળશે નહીં કેમ કે અનેક ખેલાડીઓ આઈપીએલ અથવા તો અન્ય કારણોથી રમી શકવાની સ્થિતિમાં નથી. ટે્રન્ટ બોલ્ટ, ડેવોન કૉનવે, લોકી ફર્ગ્યુસન, મેટ હેનરી, ડેરિલ મીચેલ, ગ્લેન ફિલિપ્સ, રચિન રવીન્દ્ર, મીચેલ સેન્ટનર અને કેન વિલિયમસન વિવિધ આઈપીએલ ટીમનો હિસ્સો છે. જ્યારે ટોમ લેથમ, વિલ યંગ, કોલિન મનરો, ટીમ સાઉધી સહિતના ખેલાડી વ્યક્તિગત કારણોસર ટીમથી દૂર છે.

શ્રેણીનો કાર્યક્રમ
મેચ તારીખ સ્થળ

પહેલી ટી-૨૦ ૧૮ એપ્રિલ રાવલપિંડી
બીજી ટી-૨૦ ૨૦ એપ્રિલ રાવલપિંડી
ત્રીજી ટી-૨૦ ૨૧ એપ્રિલ રાવલપિંડી
ચોથી ટી-૨૦ ૨૫ એપ્રિલ લાહોર
પાંચમી ટી-૨૦ ૨૭ એપ્રિલ લાહોર