પડધરી ખાતે રૂ.૭૦ લાખના ખર્ચે બનનાર સ્પોર્ટ્સ સંકુલનું ભૂમિપૂજન કરાયુ

કૃષિમંત્રી રાઘવજીભાઈ પટેલના હસ્તે પડધરી ખાતે રૂ.૨૭ કરોડથી વધુના ૨૨૭ વિકાસના કામોનું ઈ-લોકાર્પણ તથા ઈ-ખાતમુહૂર્ત

રાજકોટ : કૃષિ મંત્રી રાઘવજીભાઈ પટેલે વિકાસ સપ્તાહ અંતર્ગત પડધરીની કવિ દાદ સરકારી વિનયન અને વાણિજ્ય કોલેજ ખાતે રૂ.૭૦ લાખના ખર્ચે બનનાર કોલેજના સ્પોર્ટ્સ ગ્રાઉન્ડનું ભૂમિ પૂજન કરી ખાતમુહૂર્ત કર્યું હતું. આ સાથે કાર્યક્રમ સ્થળેથી રૂ.૨૭ કરોડથી વધુ રકમના ખર્ચે બનનારા રાજકોટ જિલ્લાના ૨૨૫ થી વધુ વિકાસના વિવિધ કામોનું  ઈ-લોકાર્પણ તથા ઈ-ખાતમુહૂર્ત કર્યુ હતુ.

રાજકોટ જિલ્લાને વિકાસના કામોની ભેટ આપતાં કૃષિ મંત્રી રાઘવજીભાઈ પટેલે જણાવ્યું હતું કે, વિકાસ સપ્તાહના ભાગરૂપે રાજકોટ જિલ્લામા રૂપિયા ૨૭ કરોડથી વધુ રકમના ખર્ચે બનનારા ૨૨૫ થી વધુ વિકાસના વિવિધ કામોનું ઈ-ખાતમુહૂર્ત તથા ઈ-લોકાર્પણ કરવાનો અવસર પ્રાપ્ત થયો છે. કોલેજના મેદાનમાં રમત સંકુલનું ભૂમિ પૂજન કરી ભવિષ્યમાં આ મેદાન પડધરીના યુવાનો તથા રમત પ્રેમીઓની ઉપયોગી બનશે તેવી આશા વ્યક્ત કરવાની સાથે વિકાસ સપ્તાહમાં કાર્યરત જિલ્લા વહીવટી તંત્રને શુભકામના પાઠવી હતી.

જિલ્લા કલેકટર પ્રભવ જોષીએ આ તકે સ્વાગત પ્રવચનમાં રાજ્ય સરકાર દ્વારા વિકાસ સપ્તાહની ઉજવણીની રૂપરેખા આપી જણાવ્યું હતું કે, આ રમત સંકુલ પડધરીના રમતવીરોને તથા પોલીસ જેવી ભરતી માટે તૈયારી કરતા યુવાનોને ઉપયોગી બનશે.આ સ્પોર્ટસ કોમ્પ્લેકસના નિર્માણ થકી ભવિષ્યની પેઢી રમત-ગમત ક્ષેત્રે પ્રગતિ કરી શકશે, તથા શારીરિિક સજ્જતા પ્રત્યે યુવાનોમાં જાગૃતિ આવશે.  

કાર્યક્રમમાં ઉપસ્થિત ટંકારા-પડધરીના ધારાસભ્ય દુર્લભજી દેથરીયાએ જણાવ્યું હતું કે, વડાપ્રધાન નરેન્દ્રભાઈ મોદીના નેતૃત્વમાં રાષ્ટ્રનો વિકાસ થઈ રહ્યો છે. મુખ્યમંત્રી ભુપેન્દ્રભાઈ પટેલની સરકાર વિવિધ યોજનાઓની હારમાળા લઈને લાભાર્થીના આંગણે પહોંચીને  યોજનાઓનો લાભ આપે છે, જેનાં કારણે નાગરિકોની સુખાકારીમાં વધારો થઈ રહ્યો છે.આ તકે રમતગમતમાં રાજ્ય કક્ષાએ પહોંચેલા યુવાનોને પ્રમાણપત્ર પાઠવી સન્માનિત કરાયા હતા. પૂર્વ પ્રાથમિક શિક્ષણની સુંદર પ્રવૃત્તિમય કામગીરી કરવા બદલ આંગણવાડીની બહેનોને પણ પ્રમાણપત્ર પાઠવી સન્માનિત કરાયા હતા. કાર્યક્રમમાં જિલ્લા પંચાયતના પ્રમુખ પ્રવિણાબેન રંગાણી, ધોરાજીના ધારાસભ્ય મહેન્દ્રભાઈ પાડલીયા, જિલ્લા વિકાસ અધિકારી નવનાથ ગવ્હાણે, પ્રાંત અધિકારી વિમલ ચક્રવર્તી, પડધરીના સરપંચ વિજયભાઈ પરમાર, પૂર્વ ધારાસભ્ય બાવનજીભાઈ, અગ્રણી રોહિતભાઈ ચાવડા, શૈલેષભાઈ ગજેરા સહિતના  હાજર રહ્યા હતાં.