અનેક `પેચીદી’ દરખાસ્તો સાથે આજે મહાપાલિકાની સ્ટેન્ડિંગ કમિટીની બેઠક

પાછલી ચાર સ્ટેન્ડિંગથી `લટકતી’ આવતી મોટામવાનો રોડ પહોળો કરવાની દરખાસ્ત મંજૂર થશે કે ફરી રહેશે પેન્ડીંગ ? સર્વેશ્વર ચોકની ઘટના બાદ ગત બેઠકમાં અનિર્ણિત રહેલી જર્જરિત મિલકતોનો સર્વે કરવાની દરખાસ્ત આ વખતે મંજૂર થાય તેવી શક્યતા

વૉર્ડ નં.૧૧-૧૨ (પાર્ટ)માં ડે્રનેજ લાઈન નાખવા, શ્વાન હડકવા વિરોધી રસીકરણનો કોન્ટ્રાક્ટ આપવા, રેલનગરમાં બગીચો બનાવવા, આશ્રયસ્થાનોનું સંચાલન સંસ્થાઓને સોંપવા, વધુ પે એન્ડ પાર્કિંગ ઉભા કરવા સહિતની ૪૧ દરખાસ્તો અંગે લેવાશે નિર્ણય

રાજકોટ મહાપાલિકામાં વિવિધ વિકાસકામોને મંજૂરી આપવા માટે આજે સ્ટેન્ડિંગ કમિટીની બેઠક મળશે. આ વખતે કમિટીના એજન્ડામાં કુલ ૪૧ દરખાસ્તો સામેલ છે જેમાં અમુક પેચીદી' મતલબ કે પાછલી બેઠકોથીલટકતી’ આવતી દરખાસ્તો પણ સમાવિષ્ટ છે. આ દરખાસ્તોમાં ખાસ કરીને પાછલી ચાર સ્ટેન્ડિંગથી પેન્ડીંગ રહેલી મોટામવાના રોડને ૩૦માંથી ૪૫ મીટરનો કરવાની દરખાસ્ત મુખ્ય છે જેના ઉપર શાસકો નિર્ણય જ લઈ શકતા નથી અને દર વખતે અભ્યાસાર્થે તેને પેન્ડીંગ રાખી દેવામાં આવે છે ત્યારે આ વખતની બેઠકમાં દરખાસ્ત મંજૂર થાય છે કે નહીં તેના પર સૌની નજર રહેશે. આ ઉપરાંત સર્વેશ્વર ચોકમાં વોંકળાનો સ્લેબ તૂટી પડવાની ઘટના બન્યા બાદ શહેરની તમામ જર્જરિત મિલકતોનો સર્વે કરી તેનો રિપોર્ટ તૈયાર કરવા માટે સ્ટ્રક્ચરલ એન્જિનિયરની નિમણૂક કરવાની દરખાસ્ત અંગે નિર્ણય લેવામાં આવશે જે પાછલી બેઠકમાં પેન્ડીંગ રખાઈ હતી.

આ ઉપરાંત એજન્ડામાં સામેલ અન્ય દરખાસ્તો ઉપર નજર કરવામાં આવે તો તેમાં વૉર્ડ નં.૧૧ (પાર્ટ) અને ૧૨ (પાર્ટ)માં ડે્રનેજ પાઈપલાઈન નાખવા તેમજ હાઉસ કનેક્શન ચેમ્બર બનાવવા, મહાપાલિકા દ્વારા જુદા જુદા હાઉસિંગ પ્રોજેક્ટસ માટે સોશ્યો ઈકોનોમિક સર્વે કરવા એજન્સીની નિમણૂક કરવા, શ્વાસ હડકવા વિરોધી રસીકરણનો કોન્ટ્રાક્ટ આપવા રેલનગરમાં બગીચો બનાવવા, આશ્રયસ્થાનોનું સંચાલન સ્વૈચ્છિક સંસ્થાઓને સોંપવા, શહેરમાં વધુ પે એન્ડ પાર્કિંગના પોઈન્ટ ઉભા કરવા સહિતની ૪૧ દરખાસ્તો અંગે ચેરમેન જયમીન ઠાકરના અધ્યક્ષસ્થાને કમિટી નિર્ણય લેશે.

ઢોરપકડ શાખા માટે વધુ બે ટે્રક્ટરની ખરીદી કરાશે

શહેરમાં દિવસેને દિવસે રખડું ઢોરનો ત્રાસ વધી રહ્યો હોય તેને પકડવા માટે ઢોરપકડ શાખા માટે વધુ બે ટે્રક્ટરની ખરીદી કરવાની દરખાસ્ત સ્ટેન્ડિંગ કમિટીના એજન્ડામાં મુકવામાં આવી છે. આ ઉપરાંત ટે્રક્ટર-લોડર ખરીદવાની દરખાસ્ત અંગે કમિટી દ્વારા નિર્ણય લેવામાં આવશે.

વૉર્ડ નં.૧૨માં પીજીવીસીએલ ઑફિસથી આવાસ યોજના સુધીના રોડને મેટલિંગ કરાશે

સ્ટેન્ડિંગ કમિટીના એજન્ડામાં સામેલ ૪૧ દરખાસ્તો પૈકી વૉર્ડ નં.૧૨માં વાવડી ટીપી સ્કીમ નં.૧૫ના ૧૮ મીટર ટીપી રોડ (પીજીવીસીએલ ઑફિસથી આવાસ યોજના) સુધીને મેટલિંગ કરવાના કામ અંગે કમિટી મંજૂરીની મ્હોર લગાવે તેવી શક્યતા છે.