અડધું રાજકોટ જે પાણી પીવે છે તેમાં આટલો કચરો !!

હરવા-ખરવા-ખાવા-પીવામાં રાજકોટવાસીઓને તોલે કોઈ ન આવે તેવી રીતે જ્યાં ત્યાં ગંદકી કરવામાં પણ અહીંના લોકોને કોઈ પહોંચી શકે તેમ નથી તેવું કહેવામાં હવે કોઈ અતિશ્યોક્તિ ન રહેવી જોઈએ. ઉપરોક્ત તસવીર પહેલી નજરે જોયા બાદ એમ લાગે કે આ રેતીનો ઢગલો હશે પરંતુ ધ્યાનથી જોશો તો ખ્યાલ આવશે કે આ રેતી નહીં બલ્કે કચરાનો ઢગલો છે. આ તસવીર ન્યારી ડેમ વિસ્તારની છે જ્યાં તબીબો, મહિલાઓ, બાળકો સહિત 35 લોકોએ સફાઈ કરી અઢી ટન કચરો બહાર કાઢ્યો છે. એકંદરે ડેમની અંદર આડેધડ કચરો ફેંકતાં લોકોને આ તસવીર જોઈને શરમ આવવી જોઈએ કેમ કે કચરામાં મોટાભાગે પ્લાસ્ટિકની કોથળીઓ, શ્રીફળ સહિતની વસ્તુઓ જ મળી આવી છે. તબીબો ડૉ.હિમાંશુ ખોયાણી, ડૉ.ગૌરાંગ વાઘાણી ઉપરાંત સાયકલિસ્ટ તુષાર ગોકાણી તેમજ રોટરી ક્લબના સભ્યો દ્વારા સવારે 7 વાગ્યાથી ન્યારી ડેમની સફાઈ શરૂ કરી હતી જે 11ઃ30 વાગ્યા સુધી ચાલી ત્યાં સુધીમાં અઢી ટન કચરો નીકળ્યો હતો જેના નિકાલ માટે ત્રણેક જેટલા ડમ્પરના ફેરા મારવા પડ્યા હતા. એકંદરે 35 લોકોની ટીમ દ્વારા પહેલી વખત ન્યારી ડેમની સફાઈ કરવામાં આવી છે એટલા માટે લોકોએ અહીં કચરો નાખવાનું ટાળવું જોઈએ કેમ કે ડેમને ચોખ્ખો રાખવો સૌની ફરજ છે. અત્રે એ વાત પણ નોંધવી રહી કે અડધું રાજકોટ અહીંનું પાણી પીવે છે ત્યારે તેમાં આટલો કચરો જોઈને વિચલિત થવું સ્વાભાવિક છે.