રાજકોટ જિલ્લામાં મતદારોને સ્લીપ વિતરણ શરૂ

સૌપ્રથમ વખત આ ચૂંટણીમાં ક્યુઆર કોડ અને લોકેશન વાળી કાપલીઓનું બીએલઓ દ્વારા ડોર ટુ ડોર વિતરણ

રાજકોટ : આગામી તા.7મી મે ના રોજ યોજાનાર લોકસભા ચૂંટણી માટે તંત્ર દ્વારા તમામ તૈયારીઓ પૂર્ણ કરી લેવામાં આવી છે ત્યારે ચૂંટણીપંચ દ્વારા લોકસભા ચૂંટણીમાં સૌ પ્રથમ વખત જ દરેક મતદાન મથકોના લોકેશન વાળી સ્લિપનું વિતરણ શરૂ કરી દેવાયું છે અને આગામી તા.2જી મે સુધીમાં તમામ મતદારોને મતદાર કાપલીનું વિતરણ પૂર્ણ કરી લેવા જિલ્લા ચૂંટણી અધિકારી દ્વારા સૂચના આપવામાં આવી છે.

પ્રાપ્ત વિગતો મુજબ 10-રાજકોટ લોકસભા બેઠકનું ચૂંટણી ચિત્ર સ્પષ્ટ થતા જ તંત્ર ચૂંટણી તૈયારીમાં કામે લાગ્યું છે, હાલમાં રાજકોટ લોકસભા બેઠક માટે  ભાજપ-કોંગ્રેસ અને બસપા સહિત 9 ઉમેદવારો મેદાનમાં છે ત્યારે ચૂંટણીતંત્ર દ્વારા આગામી તા.7ના રોજ યોજાનાર મતદાન પ્રક્રિયા માટે તમામ બુથ લેવલ ઓફિસર એટલે કે બીએલઓને પ્રત્યેક મતદારોને ઘેર ઘેર મતદાર કાપલી પહોંચતી કરવા માટે કામે લગાડવામાં આવ્યા છે, નોંધનીય છે કે ચૂંટણીપંચ દ્વારા લોકસભા ચૂંટણીમાં સૌ પ્રથમ વખત જ ક્યુઆર સ્કેન કરતા જ જે તે મતદાન મથકનું લોકેશન દર્શાવતી વોટર સ્લીપ વિતરણ કરવામાં આવી રહી છે.

વધુમાં જાણવા મળતી વિગતો મુજબ 10 – રાજકોટ લોકસભા બેઠક માટે હાલમાં સુધારેલી મતદાર યાદી મુજબ 21,12,273નો સમાવેશ થતો હોય આ તમામ મતદારોને ઘેર-ઘેર વોટર સ્લીપ મળી જાય તે માટે ચૂંટણીતંત્ર દ્વારા આગામી તા.2જી મે સુધીમાં વોટર્સ સ્લીપ વિતરણની કામગીરી પૂર્ણ કરવા આદેશ જારી કરવામાં આવ્યા હોવાનું સૂત્રો જણાવી રહ્યા છે.