રાજકોટ એરપોર્ટને મળશે 10 હજાર લીટર પાણીની ક્ષમતા ધરાવતું ફાયર ફાઈટર

દુબઈથી ખાસ આયાત કરાશે: દેશમાં સૌ પ્રથમ ભાવનગર એરપોર્ટને આ જ પ્રકારનું 6000 લીટર પાણીની કેપેસિટી ધરાવતું અતિ આધુનિક ફાયર ફાઈટર મળ્યું:ફાયરના જવાનોની ટ્રેનિંગ શરૂ

રાજકોટ હીરાસર એરપોર્ટને અતિ આધુનિક ફાયર ફાઇટર મળશે. જેમાં 10000 લીટર પાણીની ક્ષમતા રહેશે. તાજેતરમાં ભાવનગર એરપોર્ટને દેશનું સૌપ્રથમ અતિ આધુનિક ફાયર ફાઈટર આપવામાં આવ્યું છે.જેમાં 1300 લીટર ફોમની સંગ્રહ શક્તિ સાથે 6000 લિટર પાણીની ક્ષમતા છે. હાલમાં ભાવનગર ખાતે આ ફાયર ફાઈટર નો કઈ રીતે ઉપયોગ કરવો તેના માટે તાલીમ આપવા માટે દુબઈથી ખાસ ટીમ આવી છે તેમાં ભાવનગર ઉપરાંત રાજકોટ એરપોર્ટના ફાયરના કર્મચારીઓને ટ્રેનિંગ આપવામાં આવી રહી છે.

સૌરાષ્ટ્રનું પ્રથમ ઇન્ટરનેશનલ એરપોર્ટ હીરાસર ગ્રીનફિલ્ડ એરપોર્ટ બન્યું છે. પ્રથમ ફેઝમાં કામ  ચાલી રહ્યું છે. આગામી 25 વરસને ધ્યાને રાખીને તબક્કાવાર રાજકોટ ઇન્ટરનેશનલ એરપોર્ટ પર ડેવલોપમેન્ટ કરાશે. ટૂંક સમયમાં એટલે કે બીજા ફેઈઝમાં રડાર લાગશે. તેના માટે થોડા સમય પહેલા ઓથોરિટી નિરીક્ષણ કરી ગઈ છે.

ભાવનગર એરપોર્ટ મુસાફરોને સુવિધા આપવામાં સમગ્ર ગુજરાતમાં પ્રથમ ક્રમે રહ્યું છે. આ સફળતા વચ્ચે સમગ્ર દેશમાં સર્વપ્રથમ અતિ આધુનિક ટેકનોલોજી સાથેનું ફાયર ફાઈટર જે નાફકો કંપનીનું છે તે ભાવનગર એરપોર્ટ ને ફાળવવામાં આવ્યું છે. જેમાં મુખ્ય સુવિધામાં ઓટોમેટેડ ટ્રાન્સમિશન સિસ્ટમ સાથે 6000 લીટર પાણીની ક્ષમતા ધરાવે છે. આ ઉપરાંત ઉંચા ઉષ્ણતામાન, ભેજ સાથે કામ કરવાની કેપેસિટી અને ઓપરેટ કરવામાં પણ સરળ છે.

ભાવનગરમાં ઓપરેટ થઈ ગયા બાદ રાજકોટ હીરાસર એરપોર્ટમાં પણ ટૂંક સમયમાં 10000 લીટર પાણીની ક્ષમતા સાથે ફાયર ફાઈટર કાર્યરત કરાશે, જેના પહેલા રાજકોટના કર્મચારીઓને તાલીમ આપવા ભાવનગર મોકલ્યા છે.