પ્રી સ્કૂલ સંચાલકોએ સરકારને મનાવી લીધી: 3 નિયમોમાં સુધારો કરશે
રાજ્યવ્યાપી આંદોલન બાદ સંચાલકો ગાંધીનગર પહોંચે તે પહેલાં શિક્ષણ વિભાગ ઝુક્યું:હવે 5 વર્ષનો નોટરાઈઝડ ભાડાકરાર,વર્ગદીઠ ફીના બદલે શાળાદીઠ ફી સહિતની માંગણીનો સ્વીકાર: ટૂંક સમયમાં સત્તાવાર જાહેરાત
આખરે રાજ્ય સરકારે પ્રી સ્કૂલ સંચાલકોની માંગણી સ્વીકારવા તૈયાર થતા હવે ટૂંક સમયમાં નિયમોમાં ફેરફાર આવશે. ગુજરાતમાં ચાલતી પ્રિ સ્કૂલ માટે સરકારે આકરા નિયમોની અમલવારી શરૂ કરતાં સંચાલકોમાંથી વિરોધ ઉભો થયો હતો અને આ બાબતે રાજ્ય વ્યાપી આંદોલન શરૂ થયું હતું.
નવા વર્ષની શરૂઆત સાથે સંચાલકો અને શિક્ષણ વિભાગના અધિકારીઓ વચ્ચે બેઠક મળી હતી જેમાં મહત્વની ત્રણ માંગણીઓનો અધિકાર કરવામાં આવ્યો છે અને તેને ટૂંક સમયમાં સત્તાવાર જાહેરાત કરવામાં આવશે.
જેમાં 15 વર્ષનો રજીસ્ટર ભાડા કરાર, એજ્યુકેશન બીયુ પરમિશન, દર વર્ષે વર્ગ દીઠ 5000 રજીસ્ટ્રેશન ફી, ટ્રસ્ટ કે સંસ્થાનું રજીસ્ટ્રેશન કરાવવું સહિતના નિયમો લાવવામાં આવ્યા હતા. આ કડક નિયમોનો શાળા સંચાલકોએ વિરોધ ઉઠાવ્યો હતો છેલ્લા ઘણા સમયથી ચાલી રહેલું આંદોલન હવે ગાંધીનગર સુધી પહોંચવાની તૈયારીમાં હતું તે પૂર્વે સંચાલકો અને સરકાર વચ્ચે મળેલી મિટિંગમાં મૌખિક ખાતરી આપવામાં આવી છે.
જેમાં 15 વર્ષના રજીસ્ટર્ડ ભાડા કરાર ના બદલે પાંચ વર્ષનો નોટરાઈઝડ ભાડાકરાર, વર્ગ દીઠ 5000 ભરવાની જોગવાઈ સામે તેમાં બદલાવ કરીને આખી શાળા માટે રૂપિયા 10,000 ની ફી રજીસ્ટ્રેશન પેટે નક્કી કરવામાં આવી છે આ ઉપરાંત ફ્રી પ્રાઇમરી સ્કૂલના રજીસ્ટ્રેશન માટે ફેબ્રુઆરી મહિનામાં મુદત પૂરી થતી હતી જેને હવે છ મહિના સુધી વધારવામાં આવી છે.
આ અંગે શાળા સંચાલક મંડળના પ્રમુખ ભાસ્કર પટેલે જણાવ્યું હતું કે, નવા નિયમો સાથે રજીસ્ટ્રેશન કરાવવું અઘરું હતું આથી હજુ અનેક રજીસ્ટ્રેશન ની પ્રક્રિયા કરી ન હતી ગઈકાલે સરકાર સાથે મળેલી મિટિંગમાં નિયમો હળવા થતા હવે આગામી સમયમાં તમામ સ્કૂલ રજીસ્ટ્રેશન કરાવશે.
