એઈમ્સમાં એક નહીં, સાત જગ્યાએ POP તૂટ્યું છે !!

એકેડેમિક, ગાયનેક સહિતના સાત વિભાગમાં મોટું લીકેજ', સેન્ટ્રલી એ.સી.નું પાણી આમ-તેમ ફરતું હોવાથી બાંધકામ પડી રહ્યું છે નબળું

ટોચના અધિકારીપુત્રને કામ સોંપાયું હોય તેમાં લોટ, પાણી'ને લાકડા જેવો ઘાટ, જ્યારે બીજો પુત્ર ગુપચુપ રીતેવહીવટી વિભાગ’માં ગોઠવાઈ ગયો

આ જ અધિકારીના પત્નીના અત્યંત નજીકના એવા મહિલા ડૉક્ટર પૂરતી લાયકાત ન હોવા છતાં ચાર વર્ષથી એક જગ્યાએ ચીપકેલા, તેમના પતિદેવ પણ હોસ્પિટલમાં વૈભવી ઠાઠ ભોગવતાં હોવાનો ગણગણાટ

એઈમ્સ ટોબેકોમુક્ત' હોવાની સુફિયાણી વાત વચ્ચે એક અધિકારી ચેમ્બરમાં ફૂંક્યે રાખે છે સિગરેટ તો બીજા ઓફિસમાં જ તમાકુ ખાઈને પીચકારી કચરાટોપલીમાં મારે છે !!

ગુજરાતની સૌપ્રથમ એઈમ્સ હોસ્પિટલ રાજકોટમાં તૈયાર થઈ રહી છે. હજુ તો સંપૂર્ણ રીતે તેનું કામ પણ પૂરું થયું નથી ત્યાં જ એક બાદ એક વિવાદો સામે આવી રહ્યા છે. તાજેતરમાં જ મહિલા ડૉક્ટરે માનસિક સતામણી સહિતના આક્ષેપો સાથે ટોચ લેવલે ફરિયાદ કરીને ખળભળાટ મચાવી દીધા બાદ અહીં કેવીલાલીયાવાડી’ ચાલી રહી છે તેના ઉપરથી પરદો ઉંચકાઈ રહ્યો છે. જે પ્રમાણે અહીં વિવાદો અને નબળા કામની ફરિયાદો થઈ રહી છે તેને જોતાં જાણકારો સ્પષ્ટ કહી રહ્યા છે કે એઈમ્સ હોસ્પિટલનું એક અંગ નહીં બલ્કે અઢારેય અંગ વાંકા છે !! તાજેતરમાં જ હોસ્પિટલની કેન્ટીનમાં પ્લાસ્ટર ઑફ પેરિસ (પીઓપી) તૂટ્યું હોવાનો વીડિયો સામે આવ્યો હતો ત્યારે વરવી વાસ્તવિક્તા એ છે કે એક નહીં બલ્કે સાત-સાત જગ્યાએ આ પ્રકારે પીઓપી ખરી પડ્યું અથવા તો તૂટી પડ્યું છે. આ પાછળ માત્રને માત્ર નબળા કામને કારણે ભેજ ઉતરવો જ જવાબદાર છે.

બહુ ટૂંકા ગાળાની અંદર કેન્ટીન ઉપરાંત ગાયનેક સહિતના સાત વિભાગોમાં મોટું લીકેજ હોવાનું અને ગમે ત્યારે પ્લાસ્ટર ઓફ પેરિસ તેવી ભીતિ સેવાઈ રહ્યાનું એઈમ્સના જાણકાર વર્તુળો જણાવી રહ્યા છે. આવું થવા પાછળનું મુખ્ય કારણ સેન્ટ્રલી એ.સી.નું પાણી આમ-તેમ ફરતું હોવાનું છે.

વળી, આ કામ બીજું કોઈ નહીં બલ્કે હોસ્પિટલના ટોચના એક અધિકારીના પુત્ર કે જેને મહિને સવા લાખ પગાર ચૂકવવામાં આવે છે તે સંભાળી રહ્યો હોવાની ચર્ચાઓ પણ ચાલી રહી છે. અધિકારીના એન્જિનિયર પુત્રને એ.સી. તેમજ રેફ્રિઝરેશનની કામગીરી સોંપવામાં આવી છે. વાત આટલેથી જ પૂરી થઈ રહી નથી. આ જ અધિકારીનો અન્ય એક પુત્ર વહીવટી તંત્રમાં નોકરી કરી રહ્યો છે. આટલું ઓછું હોય તેમ એ અધિકારીના પત્નીનાં સગા પૂરતી લાયકાત ન હોવા છતાં છેલ્લા ચાર વર્ષથી એક જ જગ્યા શોભાવી રહ્યા છે. સામાન્ય રીતે એઈમ્સમાં ૧૧ મહિનાના કરારથી ડૉક્ટર કાર્યરત થતા હોય છે અને ૧૧ મહિના પૂર્ણ થાય એટલે તેની કામગીરી બરાબર હોય તો કરાર રિન્યુ કરવામાં આવતો હોય છે પરંતુ અહીં એવું કશું જ કરવામાં આવ્યું ન હોવાની વાતો પણ વહેતી થવા પામી છે. આ જ ડૉક્ટરના પતિ પણ હોસ્પિટલમાં વૈભવી ઠાઠ ભોગવી રહ્યાનું જાણકારો જણાવી રહ્યા છે.

એઈમ્સ હોસ્પિટલ એ રાજકોટ જ નહીં બલ્કે આખા ગુજરાતનું ઘરેણું' ગણાય છે એટલા માટે તેનેટોબેકોમુક્ત’ રાખવાની મસમોટી જાહેરાત કરી દેવાઈ હતી પરંતુ સ્થિતિ જાણે કે વિપરિત હોય તેવી રીતે અહીં એક ટોચના અધિકારી આખો દિવસ સિગરેટ ફૂંક્યે રાખતાં હોવાનું તો અન્ય એક અધિકારી ઓફિસમાં જ તમાકુ ખાઈને તેની પીચકારી કચરાટોપલીમાં મારતાં હોવાનું પણ સામે આવ્યું છે.

ઓપરેશન થિયેટરમાં ભેજ આવવા લાગ્યો: નિયમોનું થયું ‘બાળમરણ'

આઈઆઈટીના નિયમો પ્રમાણે ફૂગ કે ભેજ હોય ત્યાં ઓપરેશન થઈ શકતું નથી

રાજકોટ એઈમ્સ હોસ્પિટલમાં જાણે કે નિયમોનુંબાળમરણ’ જ થઈ રહ્યું હોય તેમ એક બાદ એક નિયમ નેવે મુકીને કામ કરવામાં આવી રહ્યું છે. અહીં ચાર ઓપરેશન થિયેટર બનાવવામાં આવ્યા છે પરંતુ લગભગ દરેકમાં ભેજ આવવા લાગ્યો હોવાનું જાણકારો જણાવી રહ્યા છે. આઈઆઈટીના નિયમ પ્રમાણે ફૂગ કે ભેજ જ્યાં હોય તે જગ્યામાં દર્દીનું ઓપરેશન થઈ શકતું નથી કેમ કે જો આવી જગ્યા પર ઓપરેશન થાય તો દર્દીને ભેજ અને ફુગમાં રહેલા બેક્ટેરિયા અસર કરી શકે છે. એઈમ્સમાં અત્યારે ભેજ વચ્ચે જ ઓપરેશન કરવામાં આવી રહ્યા હોવાનું અથવા તો નિયમો નેવે મુકીને કામ કરવામાં આવી રહ્યાનું સ્પષ્ટ થઈ રહ્યું છે.

ભારે કરી: કેન્દ્રીય આરોગ્ય મંત્રીને પણ ઉઠા ભણાવી દેવાયા
તાજેતરમાં યોજાયેલી તીરંગા યાત્રામાં સામેલ થવા માટે કેન્દ્રીય આરોગ્ય મંત્રી જે.પી.નડ્ડા રાજકોટ આવ્યા હતા. અહીં કાર્યક્રમ પતાવી તેઓ એઈમ્સ હોસ્પિટલે પહોંચ્યા હતા. આ વેળાએ હોસ્પિટલમાં આયુષ્યમાન કાર્ડની સેવા મળી રહી ન હોવાની ફરિયાદો સામે આવતાં હોસ્પિટલના તંત્રવાહકોએ ત્રણ જ દિવસમાં આ સેવા શરૂ થઈ જશે તેવી સુફિયાણી વાતો કરીને નડ્ડાને ઉઠા ભણાવી દીધા હતા. એઈમ્સમાં આયુષ્યમાન કાર્ડ ચાલે તે માટે રાજ્ય અને કેન્દ્ર સરકાર દ્વારા મંજૂરી આપી દેવામાં આવી છે પરંતુ બેન્કો તેમજ વીમા કંપનીઓ સાથે હોસ્પિટલ દ્વારા એમઓયુ કરવામાં આવી રહ્યા ન હોવાનું સામે આવી રહ્યું છે ત્યારે આવું શા માટે થઈ રહ્યું હશે તે તો જવાબદારો જ જાણતાં હોવા જોઈએ. સત્ય એ છે કે કેન્દ્રીય મંત્રી ગયાને એક મહિના કરતા વધુ સમય વીતી ગયો હોવા છતાં હજુ સુધી આયુષ્યમાન કાર્ડની સેવા શરૂ થઈ શકી નથી.

આ છે વરવું સત્ય: અધિકારીને એક સાંસદનું જબરું પીઠબળ
એક વાત એવી પણ સામે આવી રહી છે કે એઈમ્સ હોસ્પિટલના એક અધિકારીને સાંસદનું જબરું પીઠબળ મળી રહ્યું હોવાથી તેમનો વાળ પણ વાંકો થઈ રહ્યો નથી અને એટલા માટે જ તેઓ પોતાની રીતે કામ કરી રહ્યા છે. હવે આ સાંસદ અને અધિકારી વચ્ચેના સંબંધોને કારણે એઈમ્સ હોસ્પિટલના સ્ટાફ અને દર્દીઓએ ક્યાં સુધી ભોગવવાનું રહેશે તો તો સરકાર જ જાણતી હોવી જોઈએ. આ જ અધિકારી પત્નીના નામે સિક્યોરિટી એજન્સી પણ સંચાલિત કરી રહ્યાની વાત ચર્ચાઈ રહી છે.