રાજકોટમાં પોલીસ કમિશ્નર કપલ બોક્ષ પર પ્રતિબંધનું જાહેરનામું બહાર પાડશે ?

સુરતમાં ગ્રીષ્મા વાળી ઘટના બાદ કપલ બોક્ષ પર પ્રતિબંધ ફરમાવતા જાહેરનામું આજે પણ યથાવત

રાજકોટમાં જાહેરનામા માટે મોટી દુર્ઘટનાની જોવાથી રાહ !! : અનેક સ્થળે ખુલ્લેઆમ કપલ બોક્ષ કેફે ધમધમે છે

સુરતમાં ચકચારી ગ્રીષ્મા વેકરિયા નામની યુવતીની ફેનિલ દ્વારા ઘાતકી હત્યા કરવામાં આવી હતી. જેમાં બંને કપલ બોક્ષ કેફેમાં મળતા હોવાની કબૂલાત ફેનિલે આપતાની સાથે જ પોલીસ દ્વારા સુરતના અનેક કપલ બોક્ષ કેફેમાં દરોડા પાડવામાં આવ્યા હતા અને કેફે માલિકોની ધરપકડ કરવામાં આવી હતી. બાદ પોલીસ કમિશનર દ્વારા કપલ બોક્ષ પર પ્રતિબંધ ફરમાવતું જાહેરનામું બહાર પડાયું હતું. જેને આ વર્ષે પણ પોલીસ યથાવત રાખવામાં આવ્યું છે. ત્યારે રાજકોટમાં અનેક સ્થળે ચાલતા કપલ બોક્ષને બંધ કરવા શુ પોલીસ કમિશ્નર અહી પણ જાહેરનામું બહાર પડશે કે કેમ ? તે જોવાનું રહ્યું છે.

કોફીશોપ, હોટલો, કાફે, રેસ્ટોરન્ટો વગેરેની આડમાં એકાંતમાં બેસી કોઈ જોઈ ન શકે તેવી બંધ જગ્યા કપલ બોક્ષ ઉભા કરી તેમાં અસામાજિક પ્રવૃતિઓ ચાલે છે. જેમાં અશ્લિલ કૃત્યો, નશીલા કેફી દ્રવ્યોનું સેવન થતું હોવાનું જણાતા આ પ્રકારની અનૈતિક અને અસામાજિક પ્રવૃતિઓને કારણે નાની વયના યુવક-યુવતીઓ ભોગ બનતા હોય છે.આ બદીને કારણે મૃત્યુ, રેપ, અને બ્લેકમેઈલિંગના બનતા કિસ્સાઓને ધ્યાને લઈ તેના નિવારણ માટે સુરતમાં પોલીસ કમિશનર અનુપમસિંહ ગેહલોત દ્વારા કોફીશોપ, હોટલો, કાફે, રેસ્ટોરન્ટો, વિગેરે જગ્યાઓએ એકાંતમાં બેસી કોઈ જોઈ ન શકે તેવી બંધ જગ્યા કપલ બોક્ષ કેબિન બનાવવા પર પ્રતિબંધ મૂક્યો છે.ત્યારે છેલ્લા બે વર્ષથી સુરતમાં આ જાહેરનામું યથાવત રાખવામાં આવ્યું છે.

પરંતુ રાજકોટમાં ઘણી જગ્યાઓ પર હાલ આ પ્રકારના કપલ કેફે ચલાવવામાં આવી રહ્યા છે. અને છતાં પણ પોલીસ કમિશ્નર દ્વારા આ કેફે પર કોઈ પ્રકારની કાર્યવાહી કે પ્રતિબંધ લગાવવામાં આવ્યો નથી જેથી શુ પોલીસ કમિશ્નર દ્વારા રાજકોટમાં પણ કપલ બોક્ષ કેફે પર કાયદો લાગુ કરવામાં આવશે કે કેમ તે પણ જોવાનું રહ્યું છે હાલ તો ભવિષ્યમાં કોઈ મોટી દુર્ઘટના બની તો તેની જવાબદારી કોના શિરે જશે ? અને શું? આ કેફેને બંધ કરાવવા માટે શહેર પોલીસ કોઈ મોટી ઘટનાની રાહ જોઈ રહી છે કે શું?

આત્મીય કોલેજની સામે અને કેકેવી ચોકમાં બે કપલ બોક્ષ બે-રોકટોક ચાલે છે

રાજકોટમાં હજુ પણ ઘણી જગ્યાએ કપલ બોક્ષ ધમધમી રહ્યા છે જેથી હજુ પણ રાજકોટમાં આ કપલ બોક્ષ પર પ્રતિબંધ મૂકવામાં આવે તેવો કોઈ નિયમ કે જાહેરનામું બહાર પાડવામાં આવ્યું નથી જો આ પ્રકારની પ્રવૃત્તિ ગેરકાયદેસર હોય તો શું તેના પર સ્થાનિક પોલીસ કાર્યવાહી કરી શકે કે નહીં તે પણ એક પ્રશ્ન છે. રાજકોટમાં આત્મીય કોલેજની સામે ‘ ક ‘ નામથી શરૂ થતું કપલ બોક્ષ ઘણા વર્ષોથી ધમધમી રહ્યું છે જ્યારે કેકેવી હોલ ચોકમાં ‘કાર્ટૂનના કેરેક્ટર’ નામથી કપલ બોક્ષ કેફે ચાલી રહ્યું છે. આ બંને કેફેમાં કપલો પાસેથી કલાકે 300-400 રૂપિયા લઈ એકાંતમાં બેસવા દેવામાં આવે છે જેથી શું આ પ્રકારના કેફે પોલીસના ધ્યાનમાં છે કે તેમની મીઠી નજર હેઠળ ચાલી રહ્યા છે તે પણ ચર્ચાઓ થઈ રહી છે.