પરપ્રાંતીયો-ઈમિટેશન-ચાંદીના ગઢ’ બી-ડિવિઝન પોલીસ મથક વિસ્તારમાં ચોરટાંઓનોઉપાડો’

બી-ડિવિઝન પોલીસ મથકનો એક્સ-રે
૯૨ દિ’માં એક ઘરફોડ ચોરી થઈ તેનો પણ ભેદ ઉકેલાયો નથી: નાની-મોટી ચોરીને અંજામ આપનારા ૧૬માંથી સાત હજુ પોલીસ પકડથી દૂર
મારામારી, ગંભીર અકસ્માત, જુગાર, દારૂની હેરાફેરીના ગુન્હા પણ માતબર
પેડક રોડ, સંતકબીર રોડ, પારેવડી ચોક, રણછોડનગર સહિતના ૧૮ ચોરસ કિલોમીટર વિસ્તારની સુરક્ષા કરે છે ૮૪ જવાનો

રાજકોટના જો કોઈ વિસ્તારમાં પરપ્રાંતીયો રહેતા હોય તો તેમાં એ-ડિવિઝન બાદ બીજા ક્રમે બી-ડિવિઝન પોલીસ મથક વિસ્તારને ગણવો પડે. આવું એટલા માટે કેમ કે બી-ડિવિઝન પોલીસ મથકની હદમાં ઈમિટેશન માર્કેટ મોટાપાયે ધમધમે છે સાથે સાથે ચાંદીની હેરફેર પણ આ વિસ્તારમાંથી નોંધપાત્ર થઈ રહી હોય છે. તહેવારો હોવાથી ઈમિટેશન તેમજ ચાંદીના કાચા-પાકા માલની અવર-જવર પણ મોટાપાયે થઈ રહી છે ત્યારે તેમાં કોઈ પ્રકારનો બનાવ ન બની જાય તે માટે બી-ડિવિઝન પોલીસ મથકના સ્ટાફે અત્યારથી જ એલર્ટ થઈ જવું પડ્યું છે. બીજી બાજુ ૯૨ દિવસની અંદર અહીં નોંધાયેલા ગુન્હાઓ પ્રમાણે ચોરટાંઓનો ત્રાસ પણ વધુ હોવાનું સામે આવી રહ્યું છે.

જૂલાઈથી સપ્ટેમ્બર સુધીના ૯૨ દિવસમાં બી-ડિવિઝન પોલીસ મથકના ચોપડે એક લૂંટનો બનાવ નોંધાયો છે જેનો ઉકેલ લાવી દેવામાં સ્ટાફને સફળતા સાંપડી છે. સાથે સાથે એક ઘરફોડ ચોરી પણ નોંધાઈ છે જેનો ભેદ અહીંનો સ્ટાફ ઉકેલી શક્યો નથી. આ ઉપરાંત નાની-મોટી ચોરીના ૧૬ બનાવ નોંધાયા છે જેમાંથી ૯ પકડાઈ ચૂક્યા છે તો સાત હજુ પણ ફરાર રહેવામાં સફળ રહ્યા છે. આ ઉપરાંત મારામારી, ગંભીર અકસ્માત, જુગાર, દારૂની હેરાફેરીના ગુન્હા પણ માતબર સંખ્યામાં ૯૨ દિવસની અંદર નોંધાયા હોવાનું પ્રાપ્ત થયેલા આંકડા પરથી લાગી રહ્યું છે.

બી-ડિવિઝન પોલીસ મથક વિસ્તારમાં પેડક રોડ ઉપરાંત સંતકબીર રોડ કે જેને ઈમિટેશન અને ચાંદીનું માર્કેટ ગણવામાં આવે છે તે પણ સામેલ છે. આ ઉપરાંત રણછોડનગર, ભગવતીપરા સહિતના રહેણાક વિસ્તારો પણ આ જ પોલીસ મથકની હદમાં આવે છે. એકંદરે આ પોલીસ મથકનો હદ વિસ્તાર ૧૮ ચોરસ કિલોમીટરનો છે જેની રક્ષા કરવાની જવાબદારી એક પીઆઈ, ચાર પીએસઆઈ સહિત ૮૪ લોકોના ખભે રહેલી છે.