પંચરત્ન, બટરસ્કોચ, કાજુ ક્રંચી….ચીકીમાં નવો સ્વાદ

દિવાળીથી ધમધમતી ચીકી માર્કેટ હજુ ‘ઠંડી’:30 ટકા વેપાર ઓછો:વિદેશમાં પણ રાજકોટની ગોળવાળી ચીકી અને ખજૂરપુરીની ડિમાન્ડ વધુ

ઠંડીની જેમ હજુ ચીકીની માર્કેટ પણ  ‘ઠંડી’ છે. દર વર્ષે દિવાળી એ ગરમાવો પકડી લે છે પરંતુ આ વર્ષે હજુ હાડ થિજાવી દે તેવી ઠંડી પડી ન હોવાથી 30 ટકા માંગ ઓછી છે. જોકે આવતા અઠવાડિયાથી અંબાલાલ પટેલની આગાહી છે કે ઠંડી પડશે…. બસ શિયાળો બરાબર જામશે એટલે તુરત જ ચીકીના વેચાણમાં પણ ગરમાવો આવી જશે તેવી આશા વેપારીઓને છે.

દર વર્ષની જેમ આ વર્ષે પણ રાજકોટની વિશ્વવિખ્યાત ચીકીમાં નવી વેરાઈટીઓ આવી છે. જાણીતા સંગમ ચીકીના વેપારીએ જણાવ્યું હતું કે, રેગ્યુલર ચીકીમાં આ વર્ષે નવી વેરાઈટી આવી છે જેમાં ગોળની પંચરત્ન ચીકી, બટરસ્કોચ,કાજુ ક્રંચ, વાઈટ ચોકલેટનો નવો સ્વાદ સ્વાદપ્રેમીઓને મળશે.

રાજકોટની ચીકી દેશભરમાં પ્રખ્યાત છે તો વિદેશમાં પણ ચીકીની સોડમ ફેલાયેલી હોવાથી હજારો કિલો ચીકી એક્સપોર્ટ થાય છે, ખાસ કરીને ડિસેમ્બર થી ફેબ્રુઆરી મહિનામાં એનઆરઆઈ લોકો તેમના વતનમાં આવતા હોય છે ત્યારે પણ તેમની સાથે ચીકીના ઓર્ડરો આવે છે.

અત્રે ઉલ્લેખનીય છે કે, સોમનાથદાદાને પ્રસાદમાં પણ રાજકોટની ચીકી ધરાવવામાં આવે છે. આવતા સપ્તાહથી ચીકીનું ધૂમ વેચાણ શરૂ થશે.કડકડતી ઠંડી વચ્ચે શિંગની ગોળ વાળી ચીકી, સુગર લેસ ખજૂર પુરી, બોન બોન ચીકીની ડિમાન્ડ ખૂબ રહે છે.ચીકીના ઓથેન્ટિક ટેસ્ટની સાથે બાળકોને ભાવે તેવી ચોકલેટ ફ્લેવરની ચીકીની પણ ડિમાન્ડ રહે છે આ ઉપરાંત ડાયાબિટીસના દર્દીઓ પણ ચીકી ખાઈ શકે તે માટે સુગર ફ્રી ચીકી માર્કેટમાં ઉપલબ્ધ હોય છે.