ફનવર્લ્ડ સિવાય એક પણ ગેઈમ ઝોન પાસે ફાયર NOC નથી !

મનપાના પાપે રાજકોટમાં રામરાજ’ને પ્રજા દુ:ખી
અગ્નિકાંડ બાદ ફાયર વિભાગે કરેલા ચેકિંગમાં ઘટસ્ફોટ: ક્રિસ્ટલ, રિલાયન્સ, કોસ્મોપ્લેક્સ સહિતનાએ બિલ્ડિંગ એનઓસીના આધારે ગેઈમ ઝોન શરૂ કર્યો

રાજકોટના ટીઆરપી ગેઈમ ઝોનમાં ભીષણ આગકાંડ બાદ મહાપાલિકા તંત્ર રઘવાયું બનીને દોડતું થઈ ગયું છે. એકંદરે મનપાના પાપે રાજકોટમાં રામરાજ’ને પ્રજા સુખી નહીં બલ્કે દુ:ખી હોય તેવી રીતે મનપાની લાપરવાહીના કારણે જ આટલી મોટી દૂર્ઘટના બની જવા પામી છે. બીજી બાજુ હવે ઘોડા છૂટી ગયા પછી તબેલાને તાળાં મારવાની માફક મનપાના ફાયર વિભાગે અલગ-અલગ ૧૧ ગેઈમ ઝોનમાં તપાસ કરતાં એકમાત્ર ફનવર્લ્ડ સિવાય બીજા કોઈ પાસે ફાયર એનઓસી જ નહીં હોવાનું ધ્યાન પર આવ્યું છે. આમ તો દૂર્ઘટનાના દિવસે જ પોલીસ કમિશનર દ્વારા તમામ ગેઈમ ઝોન બંધ કરી દેવાનો હુકમ કરવામાં આવ્યો હોવાથી અત્યારે એક પણ ગેઈમ ઝોન ચાલું નથી.

આ અંગે મનપાના અધિકારીએ જણાવ્યું કે ફાયર વિભાગ દ્વારા ક્રિસ્ટલ મોલ, રિલાયન્સ મોલ, કોસ્મોપ્લેક્સ મલ્ટીપ્લેક્સ, બોમ્બે સુપરમાં વાઉ ગેઈમ ઝોન (કૂવાડવા રોડ), વૂફી ગેઈમ ઝોન (૧૫૦ ફૂટ રોડ), વેસ્ટર્ન ગેઈમ ઝોન (નાનામવા), નોકઆઉટ ગેઈમ ઝોન (સરિતા વિહાર), ઈન્ફીનિટી (કાલાવડ રોડ), ફન બ્લાસ્ટ (નંદનવન રેસ્ટોરન્ટ સામે) તેમજ બાલભવન પાસે ફાયર એનઓસી ન હોવાનું ધ્યાન પર આવ્યું હતું. જ્યારે એકમાત્ર ફનવર્લ્ડ પાસે ફાયર એનઓસી હોવાનું જાણવા મળ્યું છે. ઉપરોક્ત ગેઈમ ઝોન પૈકી રિલાયન્સ, ક્રિસ્ટલ મોલ તેમજ કોસ્મોપ્લેક્સ મલ્ટીપ્લેસ પાસે ફાયર નહીં બલ્કે બિલ્ડિંગ એનઓસી હોવાથી તેના આધારે ગેઈમ ઝોન ચલાવાઈ રહ્યો હતો. હવે તમામને ગેઈમ ઝોન અંગેના તમામ માપદંડ પર ખરા ઉતર્યા બાદ જ શરૂ કરવા દેવામાં આવશે.

તાલુકા પોલીસ મથકની સામે જ ઈન્ફીનિટી ગેઈમ ઝોન ચાલતો’તો
ટીઆરપી ગેઈમ ઝોન જે વિસ્તારમાં આવેલો છે તે તાલુકા પોલીસ મથકની હદમાં નોકઆઉટ, વૂફી, ફનબ્લાસ્ટ અને ઈન્ફનિટી ગેઈમ ઝોન આવેલા છે. આ પૈકી ઈન્ફીનિટી ગેઈમ ઝોન તાલુકા પોલીસ મથકની એકદમ નજીક ચાલતો હોવા છતાં પોલીસ દ્વારા ક્યારેય ત્યાં સઘન ચેકિંગ કરવામાં આવ્યું ન હોવાનું ધ્યાન પર આવ્યું છે. આ ઉપરાંત તેના પાસે લાયસન્સ છે કે નહીં તેની ખરાઈ પણ કરાઈ છે કે કેમ તે એક પ્રશ્નાર્થ છે.