કાલથી દીપોત્સવ: રમાએકાદશી અને વાઘબારસ એક સાથે

શહેર રોશનીથી ઝળહળી ઉઠ્યું,તહેવારોની ઊજવણીની રંગત:શનિ-રવિથી લોકો દિવાળી ટ્રીપ પર ઉપડી ગયા:બજારોમાં ખરીદીની જમાવટ

આવતીકાલે સોમવારથી રમા એકાદશી સાથે દીપોત્સવ પર્વનો મહાપ્રારંભ થશે. પંચ દિવસીય દીપોત્સવ પર્વ માટે શહેર આખામાં રોનક છવાઈ ગઈ છે.રોશનીના ઝળહળાટ સાથે, રંગોની રોનક અને દીપપ્રજ્વલિત સાથે વર્ષનો સૌથી મોટો તહેવાર શરૂ થઈ ગયો છે.
સોમવારે આસો વદ અગિયારસને રમાએકાદશી સાથે ઘરે ઘરે દિવા અને રંગોળી સાથે ઉલ્લાસભેર દિવાળીના પર્વને બતાવવામાં આવશે. અગિયારસ સાથે વાઘબારસ પણ એક સાથે હોવાથી બંને તહેવાર એક સાથે ઉજવાશે.

આસો વદ અગિયારસને સોમવારે સવારના 7.52 સુધી અગિયારસ તિથિ છે ત્યારબાદ આખો દિવસ અને રાત્રિ દરમિયાન બારસ તિથિ છે દરેક પંચાંગ પ્રમાણે આ દિવસે વાઘબારસ છે.

મંગળવારે તારીખ 29 ના સવારે 10:30 વાગ્યાથી ધનતેરસ શરૂ થશે. સોમવારે વાઘબારસ ના મુહૂર્ત પર વેપારીઓ નવા વર્ષના ચોપડા ખરીદે છે. આ શનિ રવિ થી જ તહેવારોની ઉજવણીનો માહોલ શહેરમાં છવાઈ ગયો છે. નોકરિયાત અને વ્યવસાયકારો શનિ-રવિ ની રજા નો લાભ લઇ ફરવા માટે નીકળી ગયા છે જેથી કરીને એક અઠવાડિયા સુધી તેમને રજા મળે.

બજારમાં પણ દિવાળી નીકળી છે ઘણા લાંબા સમય બાદ વેપારીઓને પણ સારું વેપાર થતા તહેવાર ની ઉજવણીનું મહત્વ વધ્યું છે.આખું  શહેર અને અલગ અલગ ચોક પણ રોશનીથી દિપી ઉઠયા છે. આ વર્ષે તિથિની અવઢવના લીધે દિવાળી પર્વ પાંચ નહીં પણ છ દિવસ સુધી ઉજવાશે.