રસ્તો ૧૫૦ ફૂટનો : પાર્કિંગ કરવા માટે ૧ ફૂટ જગ્યા મળી જાય તો ઘણું કહેવાશે !!

બાલાજી હોલ નજીક જ્યાં મનપાએ સાયકલ ટે્રક બનાવ્યો છે ત્યાં સાયકલ તો ક્યાંય નથી દેખાતી, દેખાય છે તો
માત્રને માત્ર ફોર-વ્હીલર અને ટુ-વ્હીલરના ખડકલા !

ઓમ નગર સર્કલે નો-પાર્કિંગ ઝોનમાં વાહનનું પાર્કિંગ, આ દૃશ્ય જોઈને ‘નો-પાર્કિંગ’નું બોર્ડ પણ હસતું હોય છે

રાજકોટનો એક પણ એવો વિસ્તાર નહીં હોય જ્યાં ટ્રાફિક સમસ્યા સર્જાતી ન હોય…આ સમસ્યા સર્જાવા પાછળ અનેક પરિબળો જવાબદાર છે પરંતુ સૌથી મુખ્ય કોઈને ગણવું હોય તો ઠેર-ઠેર પાર્કિંગની સુવિધાના નામે મીંડા'ને જ ગણવું પડે...શહેરનો વિકાસ દિવસેને દિવસે વધી રહ્યો છે મતલબ કેમહાકાય’ કોમર્શિયલ-રેસિડેન્શિયલ બિલ્ડિંગ નિર્માણ પામી રહ્યા છે પરંતુ સચોટ કહી શકાય તેવી પાર્કિંગ સુવિધા ઉભી કરવામાં સૌ નિષ્ફળ નિવડ્યા હોય અને વ્યવસ્થા કરાવી શકવામાં મહાપાલિકા તંત્ર વામણું પૂરવાર થઈ રહ્યું હોય લોકો આ સમસ્યામાં વધુને વધુ પીલાઈ રહ્યા છે. આવી જ કંઈક હાલત શહેરના પોશ' ગણાતા ૧૫૦ ફૂટ રિંગરોડની છે જ્યાં જુઓ ત્યાં પાર્કિંગને લઈને અવ્યવસ્થા ઉડીને આંખે વળગી રહી છે.

વોઈસ ઓફ ડે’ દ્વારા ચલાવાઈ રહેલી ઝુંબેશને લોકોમાંથી પ્રચંડ પ્રતિસાદ મળી રહ્યો છે ત્યારે તેને દિવસેને દિવસે વધુ સઘન બનાવવામાં આવનાર છે. દરમિયાન ૧૫૦ ફૂટ રિંગરોડ ઉપર કરવામાં આવેલા `રિયાલિટી ચેક’માં પાર્કિંગને લઈને અનેક અવ્યવસ્થા ધ્યાન ઉપર આવી હતી. ખાસ કરીને ૧૫૦ ફૂટ રિંગરોડ પર બાલાજી હોલ પાસે ચેકિંગ કરવામાં આવતાં ત્યાં મહાપાલિકા દ્વારા એક સાઈકલ ટે્રક બનાવવામાં આવ્યો છે અને તે સાયકલ ટે્રક હોવાનું બોર્ડ પણ લગાવવામાં આવ્યું છે સાથે સાથે અહીં નો-પાર્કિંગ હોવાનું બોર્ડ પણ લગાવ્યું છે. જો કે આ બોર્ડ માત્ર શોભાના ગાંઠિયા સમાન બની ગયુંહોય તેવીરીતે અહીં ટુ-વ્હીલરની સાથે જ ફોર-વ્હીલરની લાઈન લાગેલી કેમેરામાંકેદ થઈ છે. એકંદરે અહીં પાર્ક કરનારા લોકોને નિયમ કે કાયદાની કશી જ પડી નથી તે વાત સ્પષ્ટ થઈ ચૂકી છે !

બાલાજી હોલ પાસે જ અમુક દુકાનો આવેલી છે જ્યાંની ફૂટપાથ ઉપર નો-પાર્કિંગનું બોર્ડ લગાવેલું છે ત્યાં પણ વાહનોના ખડકલા ધ્યાન પર આવ્યા છે. એકંદરે આ પ્રકારે વાહનો પાર્ક થયેલા જોઈને ત્યાં લાગેલું બોર્ડ પણ હસતું જ હોવું જોઈએ !!
ત્યાંથી થોડા આગળ જતાં નાનામવા મેઈન રોડ ઉપર ૩૬૫ દિવસ માટે ફોર-વ્હીલર રસ્તા ઉપર જ પાર્ક થયેલી હોવાનું સ્થાનિક લોકોએ રોષભેર જણાવ્યું હતું. જ્યાં આ ગાડી પાર્ક કરાયેલી છે ત્યાંથી થોડે જ દૂર એક કોમ્પલેક્સ આવેલું છે જ્યાં પાર્કિંગની સચોટ વ્યવસ્થા ન હોવાને કારણે લોકોએ આ રીતે બહાર વાહન પાર્ક કરવું પડી રહ્યું છે પરિણામે ટ્રાફિકજામ-અકસ્માત સહિતની ઘટનાઓ બની રહી છે.

આ વિસ્તારમાં આર.કે.પ્રાઈમ નામનું કોમ્પલેક્સ આવેલું છે જ્યાં પણ બહાર નો-પાર્કિંગનું બોર્ડ લાગેલું છે. આશ્ચર્યની વાત એ છે કે અહીં હોસ્પિટલ, ક્લિનિક, બેન્ક સહિતના કાર્યરત છે છતાં ત્યાં પાર્કિંગ સેન્સનો અભાવ લોકોને અકળાવી રહ્યો છે. અહીં તો મોટાભાગે રસ્તા ઉપર ફોર-વ્હીલર જ પાર્ક થયેલી જોવા મળી હતી.

આર.કે.પ્રાઈમ બિલ્ડિંગમાં `લાખેણી’ ઓફિસો ભરચક્ક થઈ ગઈ પરંતુ સેલરમાં ભાગ્યે જ કોઈ વાહન પાર્ક કરવા જતું હોવાની રાવ

તમને પણ સતાવી રહી છે પાર્કિંગની સમસ્યા ? તો આ નંબર ઉપર જણાવો ૯૯૧૩૨ ૮૫૮૦૧
રાજકોટનો કોઇપણ વિસ્તાર એવો નહીં હોય જયા પાર્કિંગની સમસ્યા ન ઉદ્ભવતી હોય ત્યારે `વોઇસ ઓફ ડે’ દ્વારા લોકોની પીડાને તંત્ર સુધી પહોંચાડી તેનો સુચારું ઉકેલ આવે તે દિશામાં ઝુંબેશ ચલાવવામાં આવી રહી છે. રાજકોટના કોઇપણ વિસ્તારમાં કોઇપણ વ્યક્તિને પાર્કિંગને લઇને કોઇ સમસ્યા સતાવી રહી હોય અથવા તો આ સમસ્યા વિશે તેમણે તંત્રને રજૂઆત કરી હોવા છતાં કોઇ નિવેડો ન આવી રહ્યો હોય તો હવે આવા લોકો અમારો સંપર્ક સાધી શકશે. તમારે વધુ કંઇજ નથી કરવાનું માત્ર તમને જયા પાર્કિંગની સમસ્યા સતાવી રહી હોય તે સ્થળનો ફોટો તેમજ તમારું નામ અને સમસ્યા જે વિસ્તારમાં સર્જાતી હોય તે વિસ્તારનું નામ સહિતની વિગતો મો.નં.૯૯૧૩૨ ૮૫૮૦૧ ઉપર મોકલી શકાશે. આ પછી તસવીરને અખબારમાં પ્રસિધ્ધ કરી તંત્રનો કાન આમળવામાં આવશે સાથે સાથે બને એટલી ઝડપથી ઉકેલ લાવવા પ્રયાસ કરાશે.