સર્વેશ્વર ચોકમાં શિવમ કોમ્પલેક્સની દુકાન ખુલશે તો થશે પોલીસ ફરિયાદ !

હજુ સુધી સ્ટ્રક્ચરલ રિપોર્ટ આવ્યો ન હોય છતાં દુકાન-શો રૂમ ખૂલી ગયાનું ધ્યાન પર આવતાં જ મહાપાલિકાની ટીમ દોડી ગઈ: તાકિદે રિપોર્ટ કરાવી લેવા અને તેમાં સબ સલામત' હશે તો જ કોમ્પલેક્સ ખુલવા દેવાશે-મ્યુ.કમિશનર

ગણેશોત્સવ દરમિયાન લોકોની અવર-જવર સૌથી વધુ રહે છે તે સર્વેશ્વર ચોકમાં શિવમ કોમ્પલેક્સનો વોંકળા પરનો સ્લેબ તૂટી પડતાં એક વૃદ્ધા મોતને ભેટ્યા હતા તો ૩૦ લોકોને નાની-મોટી ઈજા થઈ હતી.

આ દૂર્ઘટના બન્યા બાદ શિવમ કોમ્પલેક્સને વપરાશ માટે બંધ કરી દેવાનો નિર્ણય લેવામાં આવ્યો હોય અંદાજે બે મહિનાથી કોમ્પલેક્સની ૯૦ જેટલી દુકાન-શો રૂમ બંધ હાલતમાં પડેલા છે.

દરમિયાન અમુક વેપારીઓ દ્વારા દુકાન, શો-રૂમ ખોલ્યા હોવાનું ધ્યાન પર આવતાં જ મહાપાલિકાની ટીમે દોડી જઈને તેને બંધ કરાવ્યા હતા સાથે સાથે એવી કડક ચેતવણી પણ આપી હતી કે જો હવે તેઓ દુકાન કે શો-રૂમ ખોલશે તો તેમની સામે પોલીસ ફરિયાદ કરવામાં આવશે.

આ અંગે મ્યુનિસિપલ કમિશનર આનંદ પટેલેવૉઈસ ઑફ ડે’ સાથેની વાતચીતમાં જણાવ્યું કે દૂર્ઘટના બન્યા બાદ શિવમ કોમ્પલેક્સનો સ્ટ્રક્ચરલ એન્જિનિયર મારફતે ફિઝિબિલિટી રિપોર્ટની પ્રક્રિયા શરૂ કરવામાં આવી છે અને જ્યાં સુધી રિપોર્ટ ન આવે ત્યાં સુધી કોમ્પલેક્સનો વપરાશ ન કરવા સુચના આપી હોવા છતાં અમુક વેપારીઓ દ્વારા દુકાન અથવા શો-રૂમ ખોલવામાં આવતા હોવાથી તેને ખતરારૂપ ગણી શકાય તેવું છે એટલા માટે જ મહાપાલિકા દ્વારા જે વેપારીઓએ દુકાન કે શો-રૂમ ખોલ્યા હતા તે બંધ કરાવાયા છે અને હવે જો આ લોકો ફરીથી પોતાનો વેપાર શરૂ કરશે તો તેમની સામે પોલીસ ફરિયાદ નોંધાવવામાં આવશે કેમ કે આ મુદ્દો ઘણો જ ગંભીર છે.

કમિશનરે જણાવ્યું કે ફિઝિબિલિટી રિપોર્ટ માટે કોમ્પલેક્સના એસોસિએશનને મહાપાલિકાની જરૂર હોય તો તેની પૂરેપૂરી તૈયારી છે પરંતુ હજુ સુધી રિપોર્ટ રજૂ કરાયો ન હોવાથી કોમ્પલેક્સનો ઉપયોગ કરવા દેવાશે નહીં.