ઘોર બેદરકારી ! રાજકોટ, જામનગર અને મોરબીની સરકારી દવા વરસાદમાં ઓગળી ગઈ
રાજકોટ, જામનગર અને મોરબી જિલ્લાને સપ્લાય થતી દવા બગડી :મોરબી રોડ ઉપર ઓવરબ્રિજ પાસે આવેલ ગુજરાત મેડિકલ સર્વિસ કોર્પોરેશનના વેરહાઉસમાં લાલીયાવાડી
રાજકોટ : રાજકોટ, જામનગર અને મોરબી જિલ્લાની સરકારી હોસ્પિટલ અને દવાખાનાઓમાં જ્યાંથી દવા, ઇન્જેક્શન, બાટલા સહિતની મેડિકલ સામગ્રી સપ્લાય થાય છે તેવા ગુજરાત મેડિકલ સર્વિસ કોર્પોરેશનના વેરહાઉસની ઘોર બેદરકારી સામે આવી છે, આ વેર હાઉસના મેનેજર સહિતના સ્ટાફે લાખોની કિંમતની દવા, ઓઈન્ટમેન્ટ, ઇન્જેક્શન અને સિરીંજ સહિતની ચીજવસ્તુઓ વરસાદમાં ખુલ્લામાં ઉતારી હોવાથી દવાઓ ઓગળી જવાની સ્થાને અન્ય મેડિકલ સામગ્રી પણ નકામી બની હોવાનું સામે આવ્યું છે.
રાજકોટ -મોરબી રોડ ઉપર ઓવરબ્રિજ નીચે આવેલ જીએમએસસીએલ એટલે કે, ગુજરાત મેડિકલ સર્વિસ કોર્પોરેશન લિમિટેડના વેરહાઉસમાં ગુજરાત સરકાર અને કેન્દ્ર સરકાર દ્વારા મોકલવામાં આવતી દવાઓનો સંગ્રહ કરી બાદમાં રાજકોટ સિવિલ હોસ્પિટલ તેમજ જામનગર અને મોરબી જિલ્લામાં આવેલ સિવિલ હોસ્પિટલ અને અન્ય સરકારી દવાખાનાઓમાં વિવિધ દવાઓ, ઇન્જેક્શન, બાટલા, ઓઈન્ટમેન્ટ, સિરિંઝ સહિતની તમામ મેડિકલ સામગ્રી મોકલવામાં આવે છે ત્યારે તાજેતરમાં આવેલ ભારે વરસાદ સમયે ગોડાઉન મેનેજર અને સ્ટાફ દ્વારા બેદરકારી દાખવી કિંમતી દવાઓને ગોડાઉનમાં રાખવાને બદલે બહાર ખુલ્લામાં ઉતારી દેતા હાલમાં લાખો રૂપિયાની દવા સહિતની સામગ્રી પાણીમાં પલળી જતા સરકારને લાખોની નુકશાની સહન કરવાનો વારો આવ્યો છે.
બીજી તરફ રાજકોટ, જામનગર અને મોરબી જિલ્લા માટેના ગુજરાત મેડિકલ સર્વિસ કોર્પોરેશન લિમિટેડના ગોડાઉનમાં સામે આવેલી ઘોર બેદરકારી મામલે વેરહાઉસ મેનેજર મનીષ કુબાવતનો ટેલિફોનિક સંપર્ક કરવા પ્રયાસ કરતા તેઓનો મોબાઈલ સ્વીચ ઓફ આવ્યો હતો. ઉલ્લેખનીય છે કે, આ અગાઉ પણ ગુજરાત મેડિકલ સર્વિસ કોર્પોરેશન લિમિટેડનું ગોડાઉન વિવાદમાં ઘેરાયું છે ત્યારે હાલમાં લાખો રૂપિયાની દવા પલળી જતા સમગ્ર મામલે ગાંધીનગરથી તપાસના આદેશ છૂટ્યા હોવાનું જાણવા મળે છે.
