૮૦ ફૂટ રોડ પર ગેસની લાઈટ ફાટી: જેસીબી-બાઈક-કેબિન સળગ્યા

ગેસ લાઈન ઉપર જેસીબીની ચાંચ અડી જતાં બનેલી ઘટના: ફાયરસ્ટાફ દોડી ગયો

શહેરના ૮૦ ફૂટ રોડ પર અજય વે-બ્રિજ પાસે શુક્રવારે બપોરે ગેસ લાઈનની કામગીરી વખતે જેસીબીની ટાંચ લાઈનને અડી જતાં ધડાકાભેર ફાટી હતી જેના કારણે આગ લાગતાં જેસીબી, બાઈક કેબિન સળગી ગયા હતા. આ ઘટનાની જાણ થતાં જ ફાયર બ્રિગેડનો સ્ટાફ ઘટનાસ્થળે દોડી ગયો હતો અને આગને સમયસર કાબૂમાં લઈ લેતાં મોટી દૂર્ઘટના અટકી હતી. ગેસ લાઈન ફાટવાને કારણે લાગેલી આગ એટલી વિકરાળ હતી કે જેસીબી સળગી ગયું હતું. સદ્નસીબે અંદર બેઠેલો ડ્રાયવર બહાર નીકળી જતાં તેનો જીવ બચી ગયો હતો. આ ઉપરાંત ત્યાં પડેલાં બે સ્કૂટર તેમજ કેબિન પણ ભડભડ સળગ્યા હતા. આગ લાગી ત્યારે ત્યાં કોઈ વ્યક્તિ હાજર ન હોવાથી મોટી દૂર્ઘટના સ્હેજમાં અટકી હતી. આગને કાબૂમાં લેવા માટે બે ફાયર ફાયટરને સ્થળ પર મોકલાયા હતા.