સૌરાષ્ટ્ર યુનિવર્સિટીમા ડીનની નિમણૂકને લઈ વિવાદ ઘેરાયો

ડીનનું ડીંડવાનું ! આચાર્યોએ કુલપતિ પાસે તો પ્રોફેસરોએ ગાંધીનગર રજુઆત કરી

પ્રોફેસરોએ સ્ટેચ્યુટ અર્થઘટનની ભૂલો સુધારી સિનિયર પ્રોફેસરોને ડીન તરીકે પસંદ કરવા શિક્ષણ સચિવ-મંત્રીને રજુઆત કરી

વિવાદનો અખાડો બનેલી સૌરાષ્ટ્ર યુનિવર્સિટીમા ગુજરાત કોમન યુનિવર્સીટી એક્ટ મુજબ ડીનની પસંદગી માટેનું સંભવિત લિસ્ટ જાહેર કરી પ્રોફેસરને બદલે જે તે કોલેજના આચાર્યોને અગ્રતા આપતા વિવાદ ઘરાયો છે, જેમાં ગઈકાલે આચાર્ય મંડળે સૌરાષ્ટ્ર યુનિવર્સિટીના કુલપતિને મળી આચાર્યોની પસંદગી યોગ્ય ગણાવી છે ત્યારે મંગળાવરે સૌરાષ્ટ્ર યુનિવર્સિટીના સિનિયર પ્રોફેસરોએ રાજ્યના શિક્ષણ સચિવ અને શિક્ષણમંત્રીને લેખિત રજુઆત કરી ધ ગુજરાત પબ્લિક યુનિવર્સટીઝ યુનિફોર્મ સ્ટેચ્યુટસના અર્થઘટનની ભૂલો સુધારી સિનિયર પ્રોફેસરોને ડીન તરીકે પસંદ કરવા માંગ કરી હતી.

રાજકોટની સૌરાષ્ટ્ર યુનિવર્સિટી દ્વારા તા.30 સપ્ટેમ્બરના રોજ જુદા-જુદા 14 વિભાગોના સંભવિત કાર્યકારી ડીનની યાદી જાહેર કરી ધ ગુજરાત પબ્લિક યુનિવર્સટીઝ યુનિફોર્મ સ્ટેચ્યુટસ 2024 મુજબ ગ્રાન્ટ ઇન એઇડ કોલેજોમાં ફરજ બજાવતા સિનિયર મોસ્ટ પ્રોફેસરો અને તે પ્રાપ્ય ન થતા સિનિયર મોસ્ટ આચાર્યોને જે તે ફેકાટીના ડીન (કાર્યકારી) તરીકે જાહેર કરવાના થાય છે. ઉપર્યુક્ત મળેલ માહિતીમાં જે ફેકલ્ટીમાં સરકારી ગ્રાન્ટ ઇન એઇડ કોલેજોમાં પ્રોફેસર આચાર્ય ઉપલબ્ધ ન હોય તેવી સ્થિતિમાં શૈક્ષણિક હિતમાં જે તે ફેકલ્ટીના યુનિવર્સિટી અનુસ્નાતક ભવનમાં ફરજ બજાવતા સિનિયર મોસ્ટ પ્રોફેસરને ડીન તરીકે જાહેર કરવાના થાય છે. જે ફેકલ્ટીમાં સરકારી / ગ્રાન્ટ ઇન એઇડ કોલેજો નથી તેવી ફેકલ્ટીના સ્વનિર્ભર કોલેજોના સિનિયર મીસ્ટ પ્રોફેસર / આચાર્યને ડીન (કાર્યકારી) તરીકે જાહેર કરતા વિવાદ સર્જાયો છે.

વધુમાં સૌરાષ્ટ્ર યુનિવર્સિટીના આ નિર્ણયને કારણે અનુસ્નાતક વિભાગમાં સિનિયર પ્રોફેસરોએ અન્યાય થતા સ્થાનિકે રજુઆત કરવામાં આવ્યા બાદ મંગળવારે સૌરાષ્ટ્ર યુનિવર્સિટીના ડો.ભરત રામાનુજ, ડો.રવિસિંહ ઝાલા, ગાંધીનગરના ડો.મેહુલભાઈ દવે, ડો.દિપીકાબેન પટેલ ડો.દુષ્યંત નિમાવત, ડો.પાવાગઢી સહિતના પ્રોફેસરોએ રાજ્યના શિક્ષણ સચિવ અને શિક્ષણ મંત્રી ઋષિકેશભાઈ પટેલને રૂબરૂ મળી  ધ ગુજરાત પબ્લિક યુનિવર્સટીઝ યુનિફોર્મ સ્ટેચ્યુટસના અર્થઘટનની ભૂલો સુધારી યોગ્ય અર્થઘટન થાય તે માટે રજૂઆતો કરી હતી.

ડીનની નિમણૂકમાં ભાજપ કોંગ્રેસ ભાઈ ભાઈ

સૌરાષ્ટ્ર યુનિવર્સિટીમાં ડીનની પસંદગીનો વિવાદ વકર્યો છે, ખાસ કરીને કોંગ્રેસી મૂળના એક આચાર્યની કાર્યકારી ડીન તરીકે પસંદગી કરવામાં આવી હોય ભાજપનું એક જૂથ સમસમી ઉઠ્યું હોવાનું અને સૂત્રો જણાવી રહ્યા છે ત્યારે ધ ગુજરાત પબ્લિક યુનિવર્સટીઝ યુનિફોર્મ સ્ટેચ્યુટસની અમલવારીને લઈ હાલમાં વિવાદ સર્જાતા અનુસ્નાતક ભવનના પ્રોફેસર મેદાને આવી જતા નવા ડીનને એડવાન્સમાં મળી રહેલી શુભકામનાઓ ઉપર પણ બ્રેક લાગી હોવાનું સૂત્રો જણાવી રહ્યા છે.