તંત્રને ચૂનો ! નવાગામમાં બાબુ ચૂનાની પાણી ચોરી, નળ જોડાણ કટ્ટ

રાજકોટ : કાળઝાળ ઉનાળામાં પાણીની સમસ્યા વકરતા રાજકોટ શહેર અને રૂડાના અનેક ગામોમાં ટેન્કર ચલાવવા પડી રહ્યા છે ત્યારે રાજકોટની ભાગોળે આવેલ નવાગામમાં નર્મદા લાઇનમાંથી પાણી મેળવતી ગ્રામપંચાયતે બાબુ ચૂનો બનાવતી ઇન્ડસ્ટ્રીઝને તોતિંગ નળ કનેક્શન આપી દીધું હોવાનું બહાર આવતા જિલ્લા કલેકટર પ્રભવ જોશીએ રૂડાની ટીમને દોડાવતા અંતે રૂડાના આદેશ બાદ સરપંચે બાબુ ચૂનો ઇન્ડસ્ટ્રીઝનું નળ કનેક્શન કાપી નાખ્યું હતું.

રાજકોટ સહીત સૌરાષ્ટ્ર, ગુજરાતમાં પાન-માવાના ઉપયોગમાં લેવાતો ચૂનો બનાવતી રાજકોટની જાણીતી બાબુ ચૂનો ઇન્ડસ્ટ્રીઝ દ્વારા પાણી ચોરી કરવામાં આવતી હોવાની ફરિયાદ જિલ્લા કલેકટર પ્રભવ જોશીને મળતા આ ચોંકાવનારી બાબતે રૂડાના અધિકારીઓને તાબડતોબ દોડાવી તપાસ કરવા આદેશ આપ્યા હતા, રૂડાની ટીમે કરેલી તપાસમાં બાબુ ચૂનો ઇન્ડસ્ટ્રીઝ દ્વારા ડાયરેક્ટ પાઈપલાઈનથી નહીં પરંતુ ગ્રામપંચાયતમાંથી ગેરકાયદેસર રીતે કનેક્શન મેળવી પાણીનો મોટાપ્રમાણમાં ઉપયોગ કરવામાં આવતું હોવાનું સામે આવ્યું હતું.

બીજી તરફ સમગ્ર મામલે રૂડાના અધિકારીઓની ટીમે ગ્રામ પંચાયતને તાકીદે ઇન્ડસ્ટ્રીઝને આપવામાં આવેલ ગેરકાયદેસર નળ કનેક્શનને કાપવા તાકીદ કરતા ગ્રામ પંચાયતના સરપંચે બાબુ ચુનોને આપવામાં આવેલ ગેરકાયદેસર નળ કનેક્શન કાપી નાખ્યું હતું.

કારખાનામાં કામ કરતા શ્રમિકો માટે કનેક્શન આપ્યું હતું : સરપંચ

પાણીની મસમોટી લાઇનમાંથી તોતિંગ કનેક્શન મેળવી ગામ આખાને ચૂનો ખવડાવતા બાબુ ચુનોને ગેરકાયદેસર નળ કનેક્શન આપવા મામલે નવાગામના સરપંચે જણાવ્યું હતું કે, બાબુ ચૂનો ફેકટરીમાં 150 જેટલા શ્રમિકો કામ કરતા હોવાથી કનેક્શન આપ્યું હતું પરંતુ રૂડાનો આદેશ અવતા હાલમાં નળ કનેક્શન કાપી નાખવામાં આવ્યું છે અને હવે રૂડાની મંજૂરી લઈ કનેક્શન આપવામાં અંશે.

રૂડાએ કડક પગલાંને બદલે નળ જોડાણ કટ્ટ કરી સંતોષ માન્યો

પાન અને મસાલામાં ઉપયોગમાં લેવામાં આવતા ચૂનો બનાવવામાં મોટાપ્રમાણમાં પાણીનો ઉપયોગ કરવામાં આવતો હોવાથી બાબુ ચૂનો ઇન્ડસ્ટ્રીઝે પોતાની જળ જરૂરત પૂર્ણ કરવા શોર્ટ કટ્ટ અપનાવી રૂડા દ્વારા નવાગામના નાગરિકો માટે આપવામાં આવતા નર્મદા યોજના સહિતની યોજનામાંથી પીવાના પાણીનો ગેરકાયદે ઉપયોગ કર્યાનું સામે આવ્યું છે, છેલ્લા લાંબા સમયથી આ રીતે ગેરકાયદેસર રીતે પાણી મેળવવામાં આવતું હોવા છતાં રૂડાએ ઊંડાણપૂર્વક તપાસ કરવાને બદલે માત્રને માત્ર સરપંચ મારફતે નળ કનેક્શન કપાવીને સંતોષ માની લેતા આશ્ચર્ય સર્જાયું છે.