રાજકોટમાં ક્ષત્રિયો કરતાં ૧૦ ગણું મોટું `શક્તિ પ્રદર્શન’ કરશે ભાજપ

રૂપાલા ૧૬મીએ ભાજપની ટોચની નેતાગીરીની હાજરીમાં ઉમેદવારી નોંધાવશે

બહુમાળી ચોકમાં હજારો લોકો કેસરિયા સાફા-પાઘડી પહેરીને સભામાં ઊમટી પડશે

સભા બાદ રેલી યોજી કલેક્ટર કચેરીએ ઉમેદવારી પત્ર રજૂ કરશે: ભાજપ દ્વારા તડામાર તૈયારી શરૂ

સભામાં કોઇ જ કાંકરિચાળો ન થાય તે માટે પોલીસ એલર્ટ
૧૬ એપ્રિલે રૂપાલા રાજકોટની બેઠક પર ઉમેદવારી પત્રક ભરે તે પહેલાં બહુમાળી ભવન ચોકમાં જંગી જાહેરસભાને સંબોધન કરનાર હોવાથી સ્થિતિને ધ્યાનમાં રાખી પોલીસ દ્વારા ચુસ્ત બંદોબસ્ત જાળવવામાં આવશે. સભા કે ઉમેદવારી વખતે કોઈ જ પ્રકારનો કાંકરિચાળો ન થાય તે માટે ૧૬ એપ્રિલે વહેલી સવારથી જ પોલીસ દ્વારા મોરચો સંભાળી લેવામાં આવશે.

`વોઇસ ઓફ ડે’ ફરી અગ્રેસર…

રાજકોટ બેઠકના ઉમેદવાર પુરુષોત્તમ રૂપાલા દ્વારા અપાયેલા નિવેદન બાદ અહીં જ નહીં બલ્કે આખા ગુજરાતમાં દાવાનળની સ્થિતિ નિર્માણ પામી. ક્ષત્રિય સમાજ કોઈપણ ભોગે રૂપાલાની ટિકિટ રદ્દ થાય તે માટે અડગ હતો. એક તબક્કે રૂપાલાની ટિકિટ રદ્દ થઈ રહ્યાની અટકળો પણ વહેતી થઈ રહી હતી અને મિનિટે મિનિટે સમીકરણો બદલાઈ રહ્યા હતા. આટલી પ્રવાહી પરિસ્થિતિ વચ્ચે પણ વોઈસ ઓફ ડે' દ્વારા ૭ એપ્રિલે જ રૂપાલા ૧૬ એપ્રિલે ફોર્મ ભરી રહ્યાનો અહેવાલ પ્રસિદ્ધ કરવામાં આવ્યો હતો અને ફોર્મ ભરતા પહેલાં તેઓ બહુમાળી ભવન ચોકમાં સભાને સંબોધન કરશે તે સહિતની વિગતો જાહેર કરવામાં આવી હતી જેના એક જ દિવસ બાદ રૂપાલા ૧૬મીએ ફોર્મ ભરી રહ્યાની સત્તાવાર જાહેરાત કરાઈ હતી. આમવોઇસ ઓફ ડે’ સચોટ અહેવાલ અંગે ફરી અગ્રેસર રહ્યું છે…

ગુજરાતની ૨૬ પૈકી અત્યંત વિવાદાસ્પદ બની ગયેલી રાજકોટ લોકસભા બેઠક ઉપર કેન્દ્રીય મંત્રી પુરુષોત્તમ રૂપાલા આગામી ૧૬ એપ્રિલે પોતાની ઉમેદવારી નોંધાવનાર હોવાની જાહેરાત થઈ ચૂકી છે. રૂપાલા પોતાનું ફોર્મ ભરે ત્યારે ભાજપની ટોચની નેતાગીરી ઉપસ્થિત રહેશે. ખાસ વાત એ છે કે ઉમેદવારી નોંધાવતાં પહેલાં રૂપાલાના સમર્થનમાં જંગી જાહેરસભા યોજાશે જેમાં ૨૫,૦૦૦થી વધુ લોકો ઉપસ્થિત રહેનાર હોવાનું જાણવા મળી રહ્યું છે. તાજેતરમાં જ બહુમાળી ભવન ચોકમાં મોટી સંખ્યામાં ક્ષત્રિય આગેવાનોએ ઉપસ્થિત રહીને જિલ્લા કલેક્ટરને રૂપાલાની વિરુદ્ધમાં આવેદનપત્ર પાઠવ્યું હતું ત્યાં જ રૂપાલાની જાહેરસભા થશે અને તેમાં મેદનીની દૃષ્ટિએ ક્ષત્રિયો કરતાં ૧૦ ગણું મોટું શક્તિ પ્રદર્શન' કરવામાં આવશે. રૂપાલાની સભા વખતે હજારો લોકો કેસરિયા સાફા-પાઘડી પહેરીને ઉપસ્થિત રહેશે. તાજેતરમાં જ રૂપાલાએ એક સભાને સંબોધન કરતી વખતે તેઓ જ્યારે ઉમેદવારી ફોર્મ ભરે ત્યારે લોકોને સાફા-પાઘડીમાં ઉપસ્થિત રહેવા હાકલ કરી હતી જેનુંમાન’ રાખવા માટે શહેર ભાજપ દ્વારા હાજર રહેનાર તમામને પાઘડી અથવા કેસરિયા સાફા પહેરાવાઈ તેવી શક્યતા સેવાઈ રહી છે. સભા યોજ્યા બાદ રેલી સ્વરૂપે રૂપાલા કલેક્ટર કચેરીએ પહોંચી ત્યાં પોતાની ઉમેદવારી રજૂ કરશે.

આ અંગે મહાપાલિકાની આરોગ્ય સમિતિના ચેરમેન અને વોર્ડ નં.૧૪ના કોર્પોરેટર કેતનભાઈ પટેલે પત્રકારો સાથેની વાતચીતમાં જણાવ્યું કે પુરુષોત્તમ રૂપાલાની સભા તેમજ ઉમેદવારીને લઈને ભાજપ દ્વારા તડામાર તૈયારીઓ શરૂ કરી દેવામાં આવી છે.
લોકોની મેદની વધુ સંખ્યામાં એકઠી થઈ જાય તો તેના માટે કેવી વ્યવસ્થા કરવી તેનું નિરીક્ષણ શરૂ કરી દેવામાં આવ્યું છે. આ સભામાં રાજકોટ જિલ્લા ઉપરાંત અન્ય જિલ્લામાંથી પણ લોકો મોટી સંખ્યામાં આવી પહોંચશે.

ખાસ કરીને કેન્દ્રીય મંત્રી દરજ્જાના નેતા જ્યારે કોઈ બેઠક પર પોતાની ઉમેદવારી નોંધાવે ત્યારે મુખ્યમંત્રી સહિતના દિગ્ગજો ઉપસ્થિત રહેતા હોય છે ત્યારે રૂપાલાની સભા વખતે મુખ્યમંત્રી ભૂપેન્દ્રભાઈ પટેલ ઉપરાંત ભાજપ પ્રદેશ પ્રમુખ સી.આર.પાટીલ, સંગઠન મંત્રી રત્નાકર સહિતના ખાસ હાજર રહે તેવી શક્યતા ભાજપ વર્તુળો સેવી રહ્યા છે.