મવડી મેઈન રોડ પર `વ્યવસ્થિત’ પાર્કિંગ શોધી આપનારને મળવું જોઈએ ઈનામ !!

સ્ટાર સીનર્જી હોસ્પિટલ પાસે પોતાનું પાર્કિંગ નહીં હોવાથી દર્દીઓ તો ઠીક ડૉક્ટર સહિતનો સ્ટાફ પણ `જગ્યા મળે ત્યાં પાર્કિંગ’
કરીને જતો હોવાનો વેપારીઓ- લતાવાસીઓનો આક્ષેપ

રાજકોટમાં જેટલી ટ્રાફિક સમસ્યા મોઢું ફાડી રહી છે એટલી જ અને કદાચ તેના કરતા પણ વધુ પાર્કિંગની સમસ્યા વકરવા લાગી છે. આ પાછળ ખાસ કરીને મહાપાલિકાની ટાઉન પ્લાનિંગ શાખાની આળસ' કહો કેઅણઆવડત’ અથવા તો જાણીજોઈને દાખવાઈ રહેલી લાપરવાહી જ જવાબદાર છે. શહેરના લગભગ દરેક વિસ્તારમાં અત્યારે ટ્રાફિક-પાર્કિંગની સમસ્યા જોવા મળી રહી છે ત્યારે મવડી મેઈન રોડ ઉપર તો સ્થિતિ એવી છે કે અહીં વ્યવસ્થિત વાહન પાર્ક કરવાની જગ્યા શોધી આપનારને મહાપાલિકાએ ઈનામ જાહેર કરવું પડશે !!

વોઈસ ઓફ ડે' દ્વારા આખા મવડી મેઈન રોડ પર રિયાલિટી ચેક કરવામાં આવ્યું હતું. અંદાજ પ્રમાણે અહીં ૫૦૦ જેટલી દુકાનો સહિતના વ્યવસાયિક એકમો આવેલા છે તેમાંથી ૫૦% મતલબ કે ૨૫૦એ પાર્કિંગની જગ્યામાં કોઈને કોઈ દબાણ કરી લીધું છે !

આશ્ચર્યજનક વાત એ છે કે આ દબાણને સરકારી તંત્ર દરરોજ જોઈ રહ્યું છે પરંતુ કશી જ કાર્યવાહી કરવાનું તેને સૂઝી રહ્યું નથી. અહીં આવેલી અનેક દુકાનોએ પાર્કિંગની જગ્યામાં કપડાની પબ્લીસિટી કરતા સ્ટેચ્યુ (પુતળા) ગોઠવી રાખ્યા છે જેના કારણે વાહન તો પાર્ક થઈ શકતા નથી બલ્કે અહીંથી ચાલવું પણ મુશ્કેલ બની જાય છે.

આવું જ કંઈક અન્ય દુકાનો બહાર પણ જોવા મળ્યું જ્યાં પાર્કિંગની જગ્યા જ ન હોવાને કારણે વાહનો આડેધડ ખડકાઈ ગયા છે. દરમિયાન આ વિસ્તારના લતાવાસીઓ તેમજ દુકાનદારો સાથે વાતચીત કરવામાં આવતાં તેમણે રોષપૂર્વક જણાવ્યું કે મવડી મેઈન રોડ ઉપર કોરોનાકાળથી સ્ટાર સીનર્જી હોસ્પિટલ શરૂ થઈ છે જેની પાસે પોતાનું આગવું પાર્કિંગ છે જ નહીં !

અહીં દાખલ દર્દીઓના ખબર-અંતર પૂછવા આવનારા લોકો ગમે ત્યાં વાહન પાર્ક કરી દેતા હોવાથી હોસ્પિટલ આસપાસ આવેલી દુકાનોની હાલત કફોડી થઈ જવા પામી છે કેમ કે ગ્રાહકોએ વાહનો ટપી ટપીને દુકાન સુધી પહોંચવું પડી રહ્યું છે ! લોકોએ તો એવું પણ કહ્યું કે હોસ્પિટલના ડૉક્ટર તેમજ અન્ય સ્ટાફ હોસ્પિટલ આજુબાજુ અથવા પાછળની સાઈડ મકાનો સામે વાહનો મુકીને ચાલ્યા જતા હોવાથી લોકોએ મુશ્કેલી વેઠવી પડી છે. આ અંગેની રજૂઆતો અનેક વખત કરવામાં આવી છતાં કોઈ જ કાર્યવાહી કરવામાં આવતી નથી.

અત્રે મહત્ત્વની વાત એ પણ ગણવી રહી કે આ પ્રકારની અગવડ પડતી હોય તો જવાબદાર સામે કાર્યવાહી કરવાની સત્તા ટાઉન પ્લાનિંગ શાખા, દબાણ હટાવ શાખા સહિતના હાથમાં છે પરંતુ કમનસીબે તેમને આન્યુસન્સ’ દેખાઈ જ રહ્યું નથી. આટલું ઓછું હોય તેમ ટ્રાફિક પોલીસની ટોઈંગ વાહન પણ અહીં કેમ મૂંગી થઈ જતી હશે તે લોકોને સમજાઈ રહ્યું નથી.

`છાપરા-ઓટલા’ તોડ ઝુંબેશ બંધ થઈ’ને દબાણકર્તાઓને ભાવતું મળી ગયું !
મહાપાલિકા દ્વારા ક્યારે કઈ ઝુંબેશ શરૂ કરાય અને ક્યારે કઈ ઝુંબેશ બંધ કરી દેવાય તે કોઈ કલ્પી શકે તેમ નથી ! આવી જ એક ઝુંબેશ અગાઉ છાપરા-ઓટલા તોડવાની શરૂ કરાઈ હતી જે લાંબો સમય સુધી ચાલી હતી. જો કે અચાનક જ આ ઝુંબેશ બંધ કરી દેવામાં આવતાં દબાણ કરનારાઓને ભાવતું મળી ગયું હોય તેવી રીતે પાર્કિંગની જગ્યામાં મન પડે ત્યાં દબાણ ખડકી રહ્યા છે.

ખુદ મહાપાલિકાનો એકરાર: ૧ વર્ષમાં ૯૬ લોકોએ પાર્કિંગની જગ્યા દબાવી
મહાપાલિકાની ટાઉન પ્લાનિંગ શાખા પાસેથી સત્તાવાર રીતે જાણવા મળતી વિગતો પ્રમાણે ૧ જાન્યુઆરીથી ૩૧ ડિસેમ્બર-૨૦૨૩ દરમિયાન રાજકોટમાં ૯૬ લોકો એવા છે જેમણે પાર્કિંગની જગ્યા દબાવીને ત્યાં કોઈને કોઈ દબાણ ઉભું કરી લીધું છે. દાવા પ્રમાણે ૯૬માંથી ૮૯ ફરિયાદોનો ઉકેલ ટીપી શાખાએ લાવી દીધો છે મતલબ કે ૮૯ જગ્યાએથી દબાણ દૂર કર્યું છે જ્યારે ૭ હજુ પણ પેન્ડીંગ છે ત્યારે આ પ્રકારની કાર્યવાહી ટીપી શાખા દ્વારા નિયમિત કેમ ચલાવવામાં આવતી નથી તે પણ યક્ષપ્રશ્ન છે.