રાજકોટમાં સ્કોર્પિઓ ચાલકે અકસ્માતની હારમાળા સર્જી….

રાજકોટમાં શહેરમાં એક પૂરપાટ આવતી કારે ત્રણ બાઇક અડફેટે લીધી છે. આ ગોઝારા અકસ્માતમાં શાકભાજીની લારી ચલાવનાર વ્યક્તિને માથામાં ગંભીર ઇજા પહોંચી છે. આ દુર્ઘટનાને કારણે સ્થાનિકોમાં ભારે રોષ છવાયો છે. આ કાર નાનકડી ગલીમાંથી વધારે સ્પીડમાં જતી હતી જાણે કોઇ રેસ ચાલતી હોય. આ અકસ્માત બાદ સ્થાનિક પોલીસે ગુનો નોંધીને વધુ કાર્યવાહી હાથ ધરી છે.

આ અંગે સ્થાનિક વ્યક્તિએ જણાવ્યુ કે, આ ગાડી 100ની સ્પીડમાં હતી. તેણે શાકવાળાને અડફેટે લીધો હતો. જેને માથામાં ગંભીર ઇજા પહોંચી છે. તેને 108ની મદદથી હાલ હોસ્પિટલ ખસેડી દેવામાં આવ્યો છે. કાર એક ઘરની દીવાલને અથડાવી દીધી હતી જેના કારણે તે તૂટી ગઇ છે. સારા નસીબે કોઇ વૃદ્ધ કે બાળકો આ રસ્તા પર હતા નહીં. સામાન્ય રીતે અહીં બાળકો પણ રમતા હોય છે. જો તેવું હોત તો શું થાત.

આ ઉપરાંત તેમણે વધુમાં જણાવ્યુ કે, આ ગાડીમાંથી યુવાન છોકરો બહાર નીકળ્યો હતો. તે યુવાને કહ્યુ હતુ કે, તમે લોકો ફરિયાદ ન કરો હું બધા રૂપિયા આપી દઇશ. આ સાથે તેમણે એમ પણ જણાવ્યુ કે, આ કાર ચાલક 18થી 20 વર્ષનો હોય તેવું લાગી રહ્યુ હતુ.

આ પૂરપાટ કારે જે ઘરની દીવાલ તોડી હતી તે મહિલાએ જણાવ્યુ છે કે, હું રસોડામાં રસોઇ કરતી હતી. ત્યારે એકદમ જોરથી અવાજ આવ્યો અને મેં આવીને જોયું તો મારા ઘરમાં દીવાલ, નીચેની લાદી, બારશાખ આ બધું જ તૂટી ગયું છે. અમે આ ઘર થોડા સમય પહેલા જ રિનોવેટ કરાવ્યુ છે.

કારનો અકસ્માત સર્જનાર નબીરો કેવલ રમેશ ગાણોલીયા એ કહ્યું કે, કારની સ્પીડ કેટલી હતી તે તો મને ખ્યાલ નથી. પરંતુ કારનું લીવર ચોંટી ગયું હતું. આ પહેલા મેં કાર ક્યારેય કાર ચલાવી ન હતી.